Minung vialte le ahleiin zumtu vialte nih kan i ruahchanmi lakah a nganbikmi cu Pa Pathian sinah kan phan lai timi zumhnak kan ngeihmi le ruahchannak kan ngeihmi hi asi. Pa Pathian sin phanh kan timi cu Vancungkhua ah ka kai lai tiah kan zumhmi le kan i ruahchan lengmangnak hmun cu asi. Pa Pathian sin kan phanh khawhnak dingah hin Pathian hrimhrim nih lam a kan serpiak i cucu Fapa Jesuh Khrih in Thawngtha a kan chimnak hin asi. Fapa Jesuh in Thawngtha a chimmi cu nan sualnak cu senduk in sen ko hmanh sehlaw Pathian nih minung vialte khamhtu caah a run thlahmi a Fapa hi nan zumh i nan sualnak nan mertak hna ahcun nan sualnak cu kan ngaihthiam hna lai i hawrha bantukin ka ranter lai tiah ati. Pathian nih minung vialte hi khamhnak hmu dih hna seh ti a duh cem nain a hmulomi tampi an um lai ti cu a fiang ko. Biatak cu Pathian nih hin Amah sin kan phanh khawhnak dingah Fapa Jesuh Khrih in a kan hnuh dih cio i lam a kan serpiak cio dih ko, cubantuk tthiamtthiam in Fapa zong nih Pa Pathian lam serpiakmi a cohlang i a zummi paohpaoh cu Pa Pathian sin a kan phakpi ve taktak. Pa Pathian sin kan phan cang timi le kan phan hrimhrim lai ti Aamahkhan cu Thiang Thlarau kan chungah an kan chiahpiaknak hin asi.
Vawlei takpum hrim in na nun lio ah hin Pathian nih Thawngtha a phuanmi na zumh, na cohlannak thawngin Fapa sin an phanhpi i Fapa sin na phanh hnu ah Fapa zong nih cun zungzal nunnak kan pek cang tiah biakam kan si ve i zungzal nunnak kan hmu lai timi kan i ruahchannak cu Pa Pathian sin kan phan lai kan ti lengmang mi cu asi. Pathian sin kan phan hrimhrim laimi le zungzal nunnak taktak cu vawlei kan nun chungah a ngeitu kan si cang tinak Aamahkhan cu Thiang Thlarau nih na chungah ka um cang a tinak hin asi. Thiang Thlarau lawng hmanh si loin Pathian Thlarau le Khrih Thlarau hrimhrim zong kan chungah an um chih. Amen! Pathian Thlarau le Khrih Thlarau kan chungah an um ning cu hiti hin asi: Jesuh Khrih nih azultu hna kan caah Pa Pathian sinah thla a cammi cu ka Pa Nang ka chungah um law Kei an chungah ka um lai, an chung kan umnak thawng cun pakhat taktak an si lai, anmah thawngin mi vialte nih Nangmah thlahmi ka si kha an hngalh lai i Keimah na ka dawt bantukin annih na dawt hna zong kha an hngalh chih ve lai tiah a rak ti. Minung kan chung hrimhrim ah hin Pa, Fapa, Thiang Thlarau nih hmunhma an van lak, cucu nunnak taktak kan ngeih cangnak le Pathian sin kan phan hrimhrim lainak Aamahkhan hna cu an si. Na taksa in na nun lio hrimhrim ah hin Pa Pathian in Fapa sinah, Fapa in Pa Pathian sinah, Fapa le Pathian in Thiang Thlarau sinah phakpi kan si i mah hna na hmuh, na ton, na ngeih lo ahcun thih hnu thawhtthannak cu na caah ruahchan awk a um hrimhrim lo..
Nihin zumtu vialte nih ka ttialmi hna hi zeitlukin dah nan ruah cio cu ka thei lo nain a tu hrim ah hin thuk deuh in nan ka ruahpi dingah le a tak in mipi sinah nan phanhpi cio dingah ka duh ngaingai. Cucu biatak asi i Jesuh Khrih hrimhrim nih Pa Pathian sin phanhnak lam taktak cu hitihin asi tiah a chimmi le a kan cawnpikmi hna cu a si. Minung tampi nih hin Khamhnak hi Jesuh Khrih sin lawnglawng in kan ruah dih cio men lai nain biatak cu Jesuh Khrih sin lawngin si loin Pa Pathian he, An Pahnih tuin asi. Pa Pathian le Fapa Jesuh Khrih nih an rian an limmi a tlinnak a vun langhnak zong cu Thiang Thlarau kan chungah a umnak hin an langhter tthiamtthiam ve. Pa Pathian le Jesuh Khrih an rianttuannak tlam a tling cang ti a langh lengmangnak cu Thiang Thlarau cawlcanghnak kan chungah kan hmuhnak le theihnak hin asi zungzal ve. Thiang Thlarau rianttuannak le cawlcanghnak na hmuh tik paoh ah hngalh dingmi cu Pa Pathian le Fapa Jesuh Khrih lungtlinnak aum timi hi hngalh zungzal ding asi. Khamhnak tling hmuh khawhmak ding ahhin Pa Pathian le Fapa Jesuh Khrih rianttuanttinak le lungtlinnak a umtti hmasa zungzal. Pathian nih Fapa Jesuh kut chungah nawl ngeihnak vialte a pek dih taktak cang ko nain Jesuh Khrih nih achim lengmang mi cu Ka Pa nih ka sin na phanhnak dingah an hnuh hna dah ti lo le lam an serpiak hna dah ti lo ahcun Keimah sin phanhnak lam, lamdang a um lo tihi asi lengmang. Na nun chungah Pathian in Fapa Jesuh, Fapa Jesuh in Pathian, Pathian le Fapa Jesuh Khrih in Thiang Thlarau na hmuh, na ton, na ngeih lo ahcun Vancungkhua cu na caah a hlat taktak hi asi. Na nun chungah Vancung Pennak chung i na um lo ahcun thih hnu thawhtthannak cu ruahchan awk aum lo ti awk asi ko.
Cubantuk tthiamtthiam in Jesuh Khrih nih a chim tthanmi cu Keimah sin in dah ti lo ahcun Ka Pa sin phanhnak lam a um ve lo tiah a ti. Pa Pathian nih dah Fapa Jesuh Khrih sin an phanhpi ti lo ahcun Fapa sin phannak lam a um lo i Fapa sin na phanh lo ahcun Pa sin phanhnak lam a um ve tthiamtthiam lo i Fapa sin na phanh taktak ko ahcun Fapa nih cun an tlaupi hrimhrim lai lo ti cu a fiang. Fapa Jesuh Khrih sinah Pa Pathian nih an phanhpi lo ahcun Fapa sin phanhnak lam a um lo bantukin Fapa nih dah Pa Pathian sin an phanhpi lo ahcun Pa Pathian sin phanhnak lam, lamdang a um ve hrimhrim lo tihi Jesuh Khrih nih ahlan i a cawnpiakmi hna le nihinni tiang khamhnak kan hmuhnak lam a kan cawnpiak ning cu asi. Pa Pathian nih Fapa sinah a kan hnuh i lam a kan serpiak bantukin Fapa zong nih Pa Pathian sin tiang a kan phanhpi ve tihi biatak Thawngtha cu asi. Pa Pathian sin phanhnak ding ah hin Pathian hrimhrim nih Fapa sinah a kan hnuh i lam a kan serpiak, Pa Pathian nih Fapa sinah a hnuhmi vialte le lam aserpiakmi hna cu Fapa Jesuh Khrih zong nih Pa Pathian sin tiang a kan phanhpi ve taktak. Biatak cu Jesuh Khrih loin Pa Pathian sin phanhnak lam a um lo bantukin Fapa Jesuh Khrih sin phanhnak lam zong hi Pa Pathian nih a kan hnu le lam a kan serpiak dah tilo ahcun Fapa Jesuh Khrih sin phanhnak lam a um ve lo tihi nihin zumtu vialte nih ka ruahpi ve ulaw ti ka duhmi cu asi.. Pathian nih Fapa sin an hnuh lo i Fapa nih Pathian sin an phakpi, Pathian le Jesuh Khrih nih Thiang Thlarau an in pek dah ti lo ahcun Pathian umnak Vancungkhua cu na phan bal lai lo.
- Jesuh nih Keimah sin ratnak dingah hin ka Pa nih an hnuh hna dah ti lo ahcun aho hmanh ka sinah nan ra kho lai lo tiah ati.
- Jesuh Khrih nih Keimah sin ratnak ding ah hin ka Pa nih lam a serpiak hna dah ti lo ahcun aho hmanh ka sinah nan ra kho lai lo tiah a ti tthan.
- Jesuh Khrih nih Keimah sinin dah tilo ahcun aho hmanh ka Pa sin nan phan kho lai lo tiah ati...
- Pa Pathian nih a Fapa Jesuh Khrih in Thawngtha a chim. Azum i acohlang taktak mi nih sual ngeihchihnak cu kan tuah tawnmi sualnak mertaknak he ngaihthiamnak kan hmuh. Ngaihthiamnak tling kan hmuh cu Pathian he remnak kan hmu cang tinak asi. Pathian he remnak a hmu cangmi cu Pathian Fa ah kan cang. Pathian fale kan si cang caah Fapa Jesuh Khrih bantukin kan thi ti lai lo i zungzal nunnak kan ngeih ve lawng hmanh si loin Fapa Jesuh Khrih he rocotu sinak pek kan si. Amen!!!
—-
JOHAN 6:44
A ka thlahtu ka Pa nih ka sinah a hnuh hna dah ti lo ahcun ahohmanh ka sinah an ra kho lo, cun cu hna cu ni hmanung bik ni ah nunnak ah ka thawhter te hna lai.
JOHAN 6:65
Cun aa thawh ṭhan i, "Hi ruangah hin pei, ka Pa nih an caah lam a serpiak hna lo ahcun ahohmanh ka sinah an ra kho lo, tiah ka rak in chimh hna kha a si cu," tiah a ti.
JOHAN 14:6
Jesuh nih, "Keimah hi lam le biatak le nunnak ka si; keimah sinin ti dah lo cun ahohmanh Pa sin an phan kho lo.