Maw Bawipa ka nunnak hi ka lu in ka ke tiang, ka si ning ka ruah lengmang i nitin tein ka tonmi thilkip le ka ngeihmi na thluachuah kip ka ruah tikah hin nangmah dah ti lo nih cun a ka lawmhter khomi le hnangamnak tling tein a ka pe kho zungzal mi hi zeihmanh an um lo. Maw Bawipa ka nun nih nangmah cu an hlam i ti hal in an hal, vawlei ro nih ti a duh bantukin ka thlarau nih Bawipa an duh. Bawipa nangmah lawng ka thlarau tihal diriamh tertu le nunnak ti pe khotu cu na si. Ka zangfah law na lawmhnak ka hrawmh ve ko, na thluachuah cu ka lakkanh hlah. Ni khat hnu nikhat in na thluachuah cu ka relter law kaa lawmhnak hi kan nun chung vialte na Bia ah si ko seh.
Maw Bawipa nangmah tel loin kan nun hi a car i zei tikhmanh ah ti a hmu bal lomi leiro lak i a kheumi thinkung bantuk a si. Ka hna cu a uai i ka kung an re, thei ka tlai lo i duh ka nunnak zeihmanh an um lo. Nikhat hnu nikhat ka nun nih nan khamh lawmhnak kha a hlam i na velngeihnak i thlarau ruati kha a hlam zungzal. Maw Bawipa ka nun nih nangmah cu an hlam i ti hal in an hal, vawlei ro nih ti a duh bantukin ka thlarau nih Bawipa an duh.
Maw Bawipa ka nun nih nangmah an hlam. Ka thlarau rawl a ttam i ka thlarau ti hal nih ka dang tiang a carter hna. Ka rawlttam damnak le ka ti hal diriamhnak cu ka kawl lengmang nain ka hmu lo. Aw zeizong vialte cu nangmang sin in a rami an si kha na ka hngalter! Ka zangfah law na khamh lawmhnak cu ka pe zungzal ko. Maw Bawipa ka nun nih nangmah cu an hlam i ti hal in an hal, vawlei ro nih ti a duh bantukin ka thlarau nih Bawipa an duh.
Maw Bawipa nangmah tello in cun ka nun hi lawmhnak le daihnak, hnangamnak nih an ka kaltak i vawlei sualnak le harsatnak nih an ka rialdip cuahmah. Ka nun nih a phurhmi thilrit hi keimah hnak in a ngan deuh i a ka rihtuk i ka inkhawhnak lung an dong cuahmah. Maw Bawipa na saihnam cu ka beiter law ka thilrit cu ka chang ko cang! Maw Bawipa ka nun nih nangmah cu an hlam i ti hal in an hal, vawlei ro nih ti a duh bantukin ka thlarau nih Bawipa an duh. Na Thiang Thlarau ruah cu vawlei cung mi vialte cungah sur cang sehlaw keimah le ka innchungkhar, ka miphun nih an i lawmhnak nganbik le an diriamhnak cu na Khamh lawmhnak le Thlarau rawl hi si cang ko seh. Bawipa miphun vialte sinah Na Thlarau ruah surter ko cang. Amen!
SALM 63:1
Maw Pathian, nangmah cu ka Pathian na si, nangmah cu kan ngai. Ka nunnak nih hin an hlam i ka thlarau nih tihal in an hal; vawlei ro nih ti a duh bantuk khin an duh.