Zumtu tampi nih hin a zei cem hi dah kan i lawmh cemmi le kan i buaipi cemmi cio hi asi hnga ti hi ka ruat tawn! Pathian nih a hmanmi Thlarau fale bia hi maw kan i lawmhpi zungzal in kan ceih khim cio ko hnga? Kanmah leiin teh chim awk zeital kan ngei ve cang awk asi hnga lo maw? Biatak asimi Jesuh Khrih kan zumhmi Pa hi a zultu hna nih thihnak in a thawh hnu zongah an hmuh lawng si loin a tongh tiang hmanh in an rak tongh asi lo ma? Zumnak in Thiang Thlarau kan co hnu ah hin zei hi hme kan buai hnawh cemmi hi an si. Amah he umtti, nuntti le a aw theih hi a si awk a si hnga lo maw? Zei hi hme na duh cemmi le na kawl cemmi an si ne? Unau mi nih chimnak lawngah maw naa lawmh peng ko lai. Nangmah nih Thiang Thlarau he biaruahnak le na chungah a umnak tehte a um ve rih lo ahcun zeitindah zumhnak tling taktak le mi vialte caah cun zohchunhtlak cun Khrih caah cun na nun khawh rua hnga! Ka chim duhmi hi ka zumh ko ti caan lawng asi ti lo eh! Zeitluk in dah Thiang Thlarau he pehtlaihnak na ngeih ve cang ti hi asi? Zeitlukin dah an chawnh cang? Zeitlukin dah Baibal na relmi na nunpimi hna hi na chungah biatak in a tling cang?
Nunnak Petu Thawngtha tiin Mail, Facebook, Viber le Blog in ka nunnak ah Thiang Thlarau hruainak in ka chungah a kangmi pawl hi Thawngtha ka rak ttial tawn hna. Nan rak rel cio tawn caah hin ka lawm ko. Cu hnakin kaa lawmh deuh dingmi cu lungthin tak tein nan chungah rian a tuan i nan i nunpimi tu hi asi deuh. Sihmanhsehlaw minung tampi caah cun a ttha tuk, Amen kan hei ti khin a dih lengmang ko lai ti zong khi ka hei hmuhchih khawh ko! Ka chim duhmi cu Keimah ttialmi le chimmi lawng si loin Biatak chimtu, Tialtu vialte hna sin hin zei hi dah na nunpinak ah theitlai a ngeimi asi ti hi asi ko. Sullam ngei huaha loin nung ti hna hlah sih ti hi ka duh cemmi cu asi. Thawngtha poahpoah nih hin nunnak taktak a phurh zungzal awk asi i minung nunnak a remh in a thlen awk asi. Cucu Jesuh Khrih nih fialmi Thawngtha rian taktak cu asi i ngaih nuam men in Thawngtha kan chim can zong asi ti loh! Thawhgtha ka van in hrawmh ve mi hna hi Ka lungthin, zumhnak le ka thlarau telhchin in ka ttial ve mi hna an si i Hawi nih an tuah ai pat tiin Pathian riantuan le Pathian bia hi kan phuan awk hrimhrim awk asi loh. Zeizong vialte Sertu Pa kong dawh kan phurh i kan chim tiah! Nawlchih ka duhmi cu lungthin taktak in asi lomi thil tampi hi attha ti le Amen timi kan hmangmi hi zumtu taktak nih cun a ngol in kan ngol diam cang ding an si! Biatak tu hi kan ttanh awk le biatak cungah fek tein kan dir awk asi cang. Thawngtha na theihmi le na relmi hi caan tampi ahcun na lungthin an tongh ngaimi zong a um ve ko lai nain na nunpi lo ahcun an tlau zau lai i pakpalawng an si ko lai. Na zumhnak in na cohlan i na nunpi lawngah Thawngtha hi sullam a ngei lai i na nun ah Thlarau in thluachuah a phurtu cu asi ko lai. Biatak ka timi hi ''Biatak cu Jesuh Khrih asi i Jesuh Khrih cu Thiang Thlarau in kan chungah a kan umpitu hi'' asi. Amen...
Ka lungthin dihlak le ka zumhnak dihlak he sawm kan duhmi hna cu nihin i na zumhnak le Thiang Thlarau he hawikomhnak na ngeihnak ah hin na di a riam maw ti hi asi? Minung nunnak ah hin Phaisa hi i zat ti a um ballo cu na theih theu lai dah! Cu ve bantukin Thiang Thlarau he i pehtlaihnak le hawikomhnak ah hin i zat ti a um ve lo i tam deuh in pehtlaihnak le hawikomhnak ngeihchin lengmang hi duh asi. Zumtu tampi cu a luanciami kum 5, 10 i lawmhnak an ngeihmi kha an i buaipi khim tawn ko. Ziah a luanciami caan kong lawngah cun lawmhnak na ngeih, a tu caan theng te zongah hin Thiang Thlarau in na khah ko lo i lawmhnak in na khah ko lo, Na chungah tehte khan awk tampi he na khah ko lo! Phaisa a duhmi nih ngol hngal loin an kawl lengmang i a hmuh luaimai ko hi teh! Cu ve bangin Jesuh Khrih he nuntti peng le Thiang Thlarau in khah peng na duh taktak tham ahcun kanmah hnak in pei Amah nih kanmah he nuntti le umtti cu a duh deuh tiah! Cuccah pei thihnak tiang hmanh ai thim phah hi! Halleluijah. Na zumhnak ah hin hngakchia bangin au sawh men hlah! Zeitlukin dah Thiang Thlarau he umtti na duh kha na Pa chim law kan zumhmi Pa le a kan Khamhtu Pa kong hi fiang hlang tein kan ngeihmi le hmuh theihmi hi ral ttha tein tehte khang ve tuah sih! Ka nun ah a kang tukmi cu zumhnak i kar kan hlannak le Thawngtha biatak kan aupinak ah hin Thiang Thlarau he kan i pehtlaihnak hna hi a tlawm tuk in ka hmu i chim ding an petu le an hmuhsaktu hi Amah asi hnga lo maw ti hi asi! Zei hi dah na caah Thiang Thlarau taktak hi asi!
David Siangpahrang nih a chimmi bia te hi kan chimh hmanh hna lai. Rak i cawn ve law, rak i nunpi in rak au len ve tiah kan sawm! Kan biakmi kan Pathian hi nunnak pek taktak in biaktlak Pathian asi ti hi na kaa in si loin na thinlung, nunnak taktak he rak chim ve cang! David nih a timi cu maw Bawipa zeihmanh nih a ka phenh lonak hmunthiang ah hin na liannganhnak le na sunparnak he in hmu in inhngal ning law ka hei duh dah tiah a ti! Wow.... Zeitlukindah David nih hin Pathian hmuh le hngalh a duh hi zoh hmanh uh... Hngalh a duh bantuk le hmuh aduh bantukin David bia hi zumtu tampi kan caah thazang kan ngahnak le a thlummi bia an si ko lo maw... Na thih hlan ah hin zei cem hi dah tuah na timhmi te cu asi.... Mi vialte sinah Khamhtu taktak asimi Jesuh Khrih dawtnak a thlummi na ngeihmi hi na hrawmh ve hna hnga lo maw.... David Nun hi cawn awktlak le i nunpi ve awk asi colh ko lo maw? Na kaa lawng in Pathian hi hmuh le hngalh na duh ahcun zeitikhmanh ah na hmu in na hngal bal lai lo!!! Kannih zumtu tampi cu kaa in Pathian hmuh kan duh nain Baibal hmanh kan rel huam loh, thla zong kan cam huam loh, pumh hmanh hi hnekchom kan hau! A hleiin Pathian biatak aupitu hi kan i ralrin ngaingai awk le hawi hleiin kan i biatak caan asi cang. Thiang Thlarau he ai tong taktak cangmi hna nun cu zaat a um ti lo i Amah loin kan nun khawh ti ttung lo. Amah he lawng umtti le nuntti kan duh cang... Nangteh nihin na dirhmun ah hin maw na di a riamh zungzal ko lai.... Tam chinchin in Thiang Thlarau he nunti, kaltti le pehtlaih duhnak na ngei lai lo maw..... Hi Thawngtha nih na nun ah ttamhalnak an pek ahcun na chung lei Thiang Thlarau hruainak in kalchin lengmang ko. Bawipa nih thluachuahnak in pe ko seh.....
BAWIPA NIH BIATAK TTANH DUHNAK NUN LE TTAMHALNAK NUN IN CHAPCHIN KO SEH....
------
SALM 63:2
Hmunthiang ah cun in hmu ning law zeitluk in dah na lianhngan le na sunpar kha in hngal ning, ti ka duh.