Zumhnak

Zumhnak

Zumhnak cu Biatak in ra mi a si. Mizeihmanh nih zumhnak ka ngei a ti i cu zumhnak nih Khrih Zisuh chung ah hruai lo in nitin a pumsa duhnak chung a nun ahcun cu zumhnak cu Biatak ni a hmuhmi zumhnak si lo in amah thinlung in a ra mi zumhnak a si. Zumhnak cu biatak in a ra mi a si caah cu zumhnak a ngei mi paoh nihcun cu zumhnak nih cun biatak chung ah a hruai hna i cu chung ahcun Pathian he remnak an hmu. Rom 1:16-17 ahcun fiang tein kan hmuh mi cu Thawngtha cu ka zahpi lo, zeicahtiah a zummi vialte caah khamhnak hmual a si a ti. Thawngtha um hlah sehlaw zumhnak a um hnga lo. Cucaah zumhnak cu Thawngtha thawngin kan hmuh mi a si i cu zumhnak cu kan chung i a nun tikah kan nun kha thawngtha ah a ser i cu tik ah Pathian he remnak kan hmu. Zumhnak hmuitinh cu Pathian he remnak a si. Pathian he remnak nihcun zungzal nunnak a chuah pi. Cucaah zumhnak ngeih kan duh hi vancung kainak ding ah siloin Pathian he remnak ding ah a si awk a si. Pathian he remnak hmuh a duhmi paoh nih cun Bawipa nawl ngaih an i zuam cu cu a nawl cu zumhnak lawng in tuah khawh a si caah Thawngtha kha kawl in zumhnak chung i an nun tikah Pathian he remnak an hmu i cu Pathian he remnak thawng cun zungzal nunnak cu an ta a si.

Hebru 11:6 ahcun mi zeihmanh nih zumhnak lo in Pathian lungton khawh a si lo tiah kan hmuh. Cu nih fiang tein a langhter mi cu Pathian lungton lo in Pathian pennak chung ah luh khawh a si lo ti a fiang. Cucaah mi zeihmanh nih vancung pennak chung i luh a duh ahcun zumhnak in Pathian pehtlaih a herhnak kong kha fiang tein a lang. Zumhnak in a nung kha zumtu an si. Nihin ah nang le kei teh zumhnak in kan nung maw? Mah le mah zumtu ah i hmuh tung i Pathian thinlung ah a zumtu rak si lo a fawi te. Asi kun ah zeitindah Pathian thinlung ahcun a zumtu kan si le si lo cu kan i hngalh khawh lai ti hi biahalnak nganpi a si.

Nihin khrihfa ka si ai timi paoh nihcun zumhnak in kan nun awk a si i cu zumhnak nih cu nitin kan nun ah zumhawktlak sinak a chuahter tikah zumtu kan sinak tette a khan awk a si. Nun i zumhnak tette a um lo ahcun zumhnak hi ka ngei taktak maw ti hi mah le mah van i bih than kan herh taktak. Daithlang ngai in ka zumh ko ti tung i kan ngeihmi zumhnak nih Pathian lung a rak ton lo sual ahcun kan zumhnak nih a kan khamh kho taktak lai maw ti hi ruah lo awk a tha lo mi thil a si. Ca thiang nih cun zumhnak nung le zumhnak thi kong hi fiang tein a tial. Jeim chung ah tuahnak ai tel lo mi zumhnak cu zumhnak thi a si a ti. Pathian cu a nungmi a si caah zumhnak nung lawng in pehtlaih khawh a si fawn.

Nihin ah nang le kei teh kan zumhnak a nung maw? A nungmi paoh cu a cawl a cang i cu a cawlcanghnak nih cun a nun kha a langhter. Cu ve bantuk in kan ngeihmi zumhnak cu a nungmi a si ahcun kan chung ah a cawl a cang ve awk kha a si. Zumhnak cu zeitindah kan chung ah a cawlcangh ti hi fiang tein langhter ka van i zuam tuah lai. Tahchunhnak ah Telephone Handset cu mi he aw in pehtlaihnak ngeih kan duh tik ah a chung ah sim card rawn a herh i cu lawng cun zaa rih lo in cu simcard cu nun ter a hau. Handset cu kan pum hi hei si sehlaw sim card cu Biatak hei ti ko usih. Handset chung i simcard rawn sawsawh in mi he biakchawnh khawh a si rih lo. Cu simcard cu activate (nunter) a si hnu lawng ah pehthlaih kan duh mi hna he pehtlaih khawh a si. Cu ve bantuk in kan nunnak ah Biatak kha tuahnak in activate - nunter a si tik ah lawng thlarau a si mi Pathian he pehtlaih khawh a si. Cu Pathian he nitin kan nunnak i pehtlaihnak nihcun kan chung ah zumhnak a um ti kha fiang tein a langhter i cu zumhnak cu Pathian lung a tong mi zumhnak a si. Bawipa nih cu zumhnak nan ngeih khawh nakhnga a tak i a theihmi biatak kha nihin tuahnak a nunter nan cung Bawipa sunparnak lang ko seh.