Bread of Life

A tang i Pathian ralthuam tling phun (6) ka ttialmi hna hi mit in hmuh khawhmi asi lo nain a takin zumtu nih kan nun ah kan hman a herh taktak mi le kan i nunpi awk le mah thilthuam hi kan i hruk hrimhrim awk an si. Cu lawnglawng ah khuachia pa kan tei khawh peng ve lai. Mit hmuh in si loin zumhnak in van cuan ve law naa hruk lo mi an um sual ve maw? Minung nih hnipuan kan i hruk tikah tling tein kan i hruk zungzal cu chim hau lo asi i zumhnak in ral kan dohnak ah hin teh thlarau thuam tling naa hruk ve maw?

Nihin kan vawlei ahhin zumtu phunnih in kan um. Cucu Biaknak minung le Khrih minung kan si. Mah pahnih sining hi a leng tahnak cun an i lo taktak nain chunglei ahcun fak taktak in dannak an ngei. Cathiang nih theipi hmangin tahchunhnak a lak pah lengmang. Theipi hi phunhninh a um ve. Theipi veve an si ko nain pakhat cu a thei ei awk tha in a um lo lio ah pakhat cu ei tikah nunnak a si. An leng zohnak cun theitha nak hmanh zong in theichia nih zoh a co deuh tawn. Asinain a chung van hlai tikah theichia cu herhte le fihnung in a khat.

Pathian nih a duhmi biaknak taktak cu Thlarau le biatak in biaknak hi a si tiah cathiang nih fiang tein a langhter. Cucaah mi zeihmanh hmanh nih Pathian he remnak hmuh a duh ahcun Thlarau le biatak in a biak hrimhrim a herhnak kong kha fiang tein a lang. Cucaah Johan thawngtha 4:23-24 ahcun "Sihmanhsehlaw Pathian a bia taktak mi nih cun Thlarau le biatak in an biak can kha a ra lio i hika hi a phan cang. Hi bantukin a biami hna hi Pa nih a duhmi cu a si. Pathian cu thlarau a si i a biatu hna nih cun thlarau le biatak in an biak awk a si," tiah a ti.

Cathiang nih nun phun hnih a langhter. Cu hna cu Adam nun le khrih nun hi an si. Adam nun cu minung pumsa duhnak nih a ukmi nun kha a si. Khrih nun cu Thiangthlarau nih a ukmi nun a si. Adam hrin a si mi paohpaoh cu minung fimnak kan ti mi chiatha thleidannak nih a kan uk dih hna. Cu chiatha thleidannak nih cun Pathian hi a hngal kho ngaingai lo i a lung zong a tong kho lo. Sihmanhsehlaw Thiangthlarau tu nihcun Pathian duhnak a hngalh lawng siloin Pathian duhnak tuah cu ai lawmhnak sang bik a si.

Zumhnak cu Biatak in ra mi a si. Mizeihmanh nih zumhnak ka ngei a ti i cu zumhnak nih Khrih Zisuh chung ah hruai lo in nitin a pumsa duhnak chung a nun ahcun cu zumhnak cu Biatak ni a hmuhmi zumhnak si lo in amah thinlung in a ra mi zumhnak a si. Zumhnak cu biatak in a ra mi a si caah cu zumhnak a ngei mi paoh nihcun cu zumhnak nih cun biatak chung ah a hruai hna i cu chung ahcun Pathian he remnak an hmu. Rom 1:16-17 ahcun fiang tein kan hmuh mi cu Thawngtha cu ka zahpi lo, zeicahtiah a zummi vialte caah khamhnak hmual a si a ti. Thawngtha um hlah sehlaw zumhnak a um hnga lo.

Dawtnak kan ti tikah Pathian sin in a ra mi dawtnak le minung kan sinak kan thinlung in a ra mi dawtnak tiin phun hnih a um. Pathian sinin a ra mi dawtnak cu minung nih kan ngeih cio mi dawtnak he an i khat lo. Mi vialte hi kanmah le kan si khawhning cio cun dawtnak hi kan ngei dih cio hna. Sihmanhsehlaw minung kan i dawtnak cu duhdanhnak a ngei I dawtu lawng dawt khawhnak phun khi a si. Johan 3:16 ahcun Pathian nih vawlei hi a dawt hringhran caah a fapa ngeihchunte kha a pek ti kan hmuh.

Zumtu kan nunnak ah nitin thazaang a kan petu cu ruahchannak a si. Khrihfa kan lam thluan i zeithil kan tonmi kip ah teinak a kan petu cu ruahchannak a si. Salm 31:24 ahcun "Bawipa cungah a ruahchannak a chiami vialte hna, lungthawng le thazaang thawng in um ko u!" a ti. Mi tampi nih kan ruahchannak a dik lo ruang ah zumnak in kaar kan hlang kan ti cuahmah lio ah inntuar khawhnak le teinak kan ngei kho tuawn lo. Kan i ruahchannak ai palh tikah inntuar khawhnak ka ngei kho lo.

Nihin laimi tampi nunnak ah khrih mui kan cuan khawhlonak a ruang tampi lak ah pakhat a biapi tuk mi cu Hrinnaknak kong ahhin a si. Mi zeimaw nih ka hrinthan a ti ko lai nain a nun ah cathiang nih hrinthan nun a ti mi a um lo ahcun Pathian thinlung ah hrinthanmi a si loh ti kha a langhter. Mah hmuhning nakin Pathian hmuhning hi kan luat ding taktak cu a si. Mi cheu khat nihcun khamh I fiannak khi hrinthannak hmuh ah an rel sual tawn. Cathiang tu nih cun khamhnak kong cu a chim nain khawmhnak nih a chuakpi mi zungzal nunnak nan ngei awk a si a ti.

Mi tampi nih nawlbia he zumhnak kong hi a cohlanning kan i palh caah mi cheu nih nawlbia in Pathian lungton an i zuam i mi cheu nih zumhnak kan ngei an ti i nawlbia kan hlawt caah an nun ah khrih mui an cuang kho lo. Matthai 5:17 ahcun "Moses Nawlbia hna le Profet hna cawnpiaknak kha hrawh awkah ka ra lo, tiah ka ruat hlah u. Annih kha hrawh awkah siloin an cawnpiaknak kha tlinter awk tu ah ka ra." a ti. Zumhnak cu zisuh thawngin kan hmuhmi a si caah zumhnak a ngeimi paoh nihcun zisuh bia bantukin kan nun ah zumhnak thawngin nawlbia hi kan tlinter awk hrimhrim a si.