Thinghmui Thianhnak
(Mat 8.1-4; Luk 5.12-14)
1 Bawipa nih Moses sinah hitin a ti: 2 “Mah hihi mithinghmui nih aa thianh ni ca i phunglam a si lai; tlangbawi sinah kalpi a si lai; 3 tlangbawi cu riahhmun lengah a chuak lai i a zoh lai. Cun mithinghmui chung i thinghmui zawtnak cu a dam ahcun, 4 tlangbawi nih cun thianh awk a simi caah cun a nungmi va thiang pahnih le sidar thing le thil sen le husop lak a fial hna lai; 5 cun tlangbawi nih ti luangmi cungah tlak um chungah va pakhat cu thah awkah nawl a pek hna lai. 6 A nungmi va cu sidar thing le thil sen le husop he a lak hna lai i ti luangmi cung i thahmi va thi chungah khan a nungmi va he cun a hnim hna lai; 7 cun thinghmui zawtnak in thianh awk a simi cu voi sarih a theh lai i amah cu a thiang tiah a thanh lai i a nungmi va cu ramlak ah cun a thlah lai. 8 Cun thianh awk a simi nih cun a hnipuan a suk hna lai i a sam vialte aa meh dih lai i ti in aa kholh lai i amah cu a thiang lai; cun cu hnuah cun riahnak hmun chungah cun a lut lai, sihmanhsehlaw amah buk lengah ni sarih a um lai. 9 Cun ni sarih ni ah a lu cung sam vialte aa meh dih lai; a khahmul le a mittlang hmul vialte aa meh dih lai. Cun a hnipuan kha a suk hna lai i a pum kha ti in aa kholh lai i amah cu a thiang lai.
10 “Cun ni riat ni ah do a tlami tuufa a pa pahnih le tuufa a nu pakhat kum khat a simi do a tlami le changvut thawinak i changvut dip ephah cheu hra cheu thum chiti he cawhmi le chiti thawl khat a lak lai. 11 Cun tlangbawi a thianhtu nih cun thianh dingmi le mah thil hna hi Bawipa hmaiah, tonnak thlam innka ah khan a chiah hna lai. 12 Cun tlangbawi nih tuufa a pa pakhat kha a lak lai i phungbuar thawinak caah a thawi lai, chiti thawl khat he cun, cun hninh thawinak caah a hninh hna lai, Bawipa hmaiah; 13 cun tuufa cu sual thawinak le khangh thawinak an thahnak hmun, hmun thiang chungah khan, a thah lai; zeitintiah phungbuar thawinak cu sual thawinak bantukin tlangbawi ta a si; a thiang bik a si. 14 Tlangbawi nih cun phungbuar thawinak sathi cu tlawmpal in a lak lai i thianh awk dingmi orhlei hnakhaw par le a orhlei siapi le a orhlei kepi ah a neh lai. 15 Cun tlangbawi nih thawl chung chiti cu tlawmpal in a lak lai i amah kehlei zapei kuar ah a thlet lai, 16 cun a kehlei kut zapei kuar i a ummi chiti cu a orhlei kutdong in a tawh lai i chiti cu tlawmpal in Bawipa hmaiah voi sarih a theh lai. 17 Cun a kut chung i a taangmi chiti cu tlawmpal in thianh awk a simi orhlei hnakhaw par le a orhlei siapi le a orhlei kepi cungah, phungbuar thawinak thi cungah khan a thuh lai; 18 tlangbawi kut chungah a tang rihmi chiti cu thianh awk a simi lu ah khan a thuh lai. Cun tlangbawi nih amah caah cun Bawipa hmaiah remnak a serpiak lai. 19 A thian lonak in thianh awk a simi caah khan remnak serpiak awkah tlangbawi nih sual thawinak kha a pek lai. Cun a hnuah khangh thawinak kha a thah lai i 20 tlangbawi nih khangh thawinak le changvut thawinak cu biakṭheng cungah a thawi hna lai. Cuticun tlangbawi nih remnak a serpiak lai i amah cu a thiang lai.
21 “Sihmanhsehlaw amah cu sifak a si i cu zat cu a tlinh khawh lo ahcun, amah ca i remnak sernak caah tuufa a pa pakhat phungbuar thawinak i hninh awk caah, changvut dip ephah cheu hra cheu khat chiti he cawhmi changvut thawinak caah, cun chiti thawl khat a lak lai; 22 cun ṭhuro pahnih maw laileng no pahnih dik, a tlinh khawh deuh paohpaoh kha an si fawn lai; pakhat cu sual thawinak a si lai i pakhat cu khangh thawinak a si lai. 23 Cun ni riat ni ah amah thianhnak caah tlangbawi sinah, tonnak thlam innka ah Bawipa hmaiah cun a rak put hna lai; 24 tlangbawi nih phungbuar thawinak tuufa le chiti thawl khat cu a lak hna lai i Bawipa hmai i hninh thawinak caah tlangbawi nih cun a hninh hna lai. 25 Phungbuar thawinak tuufa cu a thah lai i tlangbawi nih phungbuar thawinak sathi cu tlawmpal in a lak lai i thianh awk a simi orhlei hnakhaw par le a orhlei siapi le a orhlei kepi ah a neh hna lai. 26 Cun tlangbawi nih cun chiti cu tlawmpal in amah a kehlei zapei kuar ah a thlet lai i 27 a orhlei kutdong in a kehlei kut chung i a ummi chiti cu Bawipa hmaiah voi sarih a theh lai; 28 cun tlangbawi nih thianh awk a simi a orhlei hnakhaw par le a orhlei siapi ah le a orhlei kepi ah, phungbuar thawinak thi thuhnak hmun ah khan a orhlei kut chung i a ummi chiti cu tlawmpal in a thuh lai; 29 tlangbawi kut ah a tangmi chiti cu thianh awk a simi kha Bawipa hmai i remnak serpiak awkah a lu ah a thuh lai. 30 Cun a tlinh khawhmi paoh, ṭhuro siseh laileng no siseh, 31 pakhat cu sual thawinak caah, pakhat cu khangh thawinak caah, changvut thawinak he hmunkhat ah a thawi lai; cun tlangbawi nih thianh liomi cu Bawipa hmaiah remnak a serpiak lai. 32 Mah hihi thingmui zawtnak a ngei i amah thianhnak caah a tlinh kho lomi ca i phunglam cu a si.”
33 Bawipa nih Moses le Aaron sinah hi bangin a ti: 34 “Co awk i kan pekmi hna Kanaan ram chungah nan luh tikah, nan comi ram chung i inn pakhatkhat ah thinghmui zawtnak ka chiah ahcun, 35 cu inn a ngeitu nih cun a ra lai i tlangbawi kha, ‘Ka inn chungah hin zawtnak phun khatkhat um dawh a si ko,’ tiah a chimh lai. 36 Inn chung i a ummi thil vialte cu thianglo ah thanh a si sual nakhnga lo, zawtnak va zoh awk i tlangbawi a kal hlanah khan, tlangbawi nih inn cu, rak lawnter u, tiah nawl a pek hna lai. Cu hnuah cun tlangbawi cu inn zoh awkah cun a lut lai. 37 Zawtnak cu a zoh lai i zawtnak cu vampang ah a hring deuh a sen deuh in a umnak hmun a hmuh i a leng hawng nakin a thuk deuh a lawh ahcun, 38 tlangbawi cu inn chungin innka in a chuak lai i inn cu ni sarih a hrenh lai. 39 Cun ni sarih ni ah tlangbawi cu a ra ṭhan lai i a zoh lai; cun zawtnak cu inn vampang ah cun a rak karh ahcun, 40 tlangbawi nih cun zawtnak a umnak lung cu la u law, khua lengah hmun thianglo pakhatkhat ah hlonh u, tiah nawl a pek hna lai. 41 Cun innchung cu a velchum in a ziahter hna lai i lung benhnak thung an ziahmi cu khua lengah hmun thianglo pakhatkhat ah an thlet lai; 42 cun lung dang an lak hna lai i kha lung hna umnak ah khan an chiah hna lai i lung benhnak thung dang zong kha an lak lai i inn cu an benh lai.
43 “Lung cu an lak hna i inn cu an ziah i an benh hnuah zawtnak cu inn chungah cun a chuah ṭhan ahcun, 44 tlangbawi cu a va kal lai i a zoh lai; zawtnak cu inn chungah cun a rak lawn ahcun mah cucu inn chung i a fak phun thinghmui zawtnak a si; mah cucu inn thianglo a si. 45 Inn cu an ṭheh lai, a lung hna le a thing hna le inn i lung benhnak thung vialte hna he cun khualeng i hmun thianglo pakhat ah an thiar hna lai. 46 Cu hleiah hrenh lio i cu inn ah a lutmi cu zanlei tiang thianglo a si lai; 47 cu inn chung i a itmi nih cun a thil kha a suk hna lai; cu inn chung i rawl a eimi nih cun a thil kha a suk hna lai.
48 “Sihmanhsehlaw tlangbawi a rat i a zoh i inn cu lungbenhnak thung in benh a si hnuah zawtnak cu inn chungah a karh lo ahcun, tlangbawi nih inn cu a thiang tiah a thanh lai, zeitintiah zawtnak cu a dam cang. 49 Cun inn thianhnak caah cun va a hmemi pahnih cu sidar thing le thil sen le husop he tiah a lak hna lai i 50 va pakhat cu tlak-um chungah a luangmi ti cungah a thah lai, 51 cun sidar thing le husop le thil sen cu a nungmi va he tiah a lak hna lai i a luangmi ti cung i thahmi va thi ah khan a hnim hna lai i inn cu voi sarih a theh lai. 52 Cuticun inn cu va thi le a luangmi ti le a nungmi va le sidar thing le husop le thil sen in a thianh lai; 53 cun a nungmi va cu khua chungin ram lakah a zuanter lai; cu bangin inn caah cun remnak a ser lai i a thiang a si lai.”
54 Mah hihi zei bantuk thinghmui zawtnak paoh ca i phunglam a si: thakpherh caah siseh, 55puan i a ummi zawtnak caah siseh, inn i a ummi thinghmui zawtnak caah siseh, 56 phinnak caah siseh, bonak caah siseh, pharnak caah siseh, 57 zeitik ah dah a thianlo i zei tikah dah a thian ti langhternak caah an si. Mah hihi thinghmui zawtnak ca phunglam a si.
Mi Thong Nga Rawl A Pek Hna
(Mat 14.13-21; Luk 9.10-17; Jhn 6.1-14)
30 Lamkaltu hna kha an ra tlung i Jesuh he khan an i tong i an tuahmi vialte le an cawnpiakmi hna vialte kha an chimh. 31 A tlung kal an tam tuk hringhran caah Jesuh le a zultu hna cu rawl einak caan hmanh an hmu lo. Cucaah annih cu a thawh hna i, “Kanmah lawng tein kan um khawh nakhnga le a dinh zong nan i dinh nakhnga, kanmah lawngin kaa khatkhat ah kal tuah u sih,” tiah a ti hna. 32 Cucaah anmah lawng cun hmunking i kal awkah an i thawh.
33 Sihmanhsehlaw mi tampi nih an kal kha an hmuh ṭhiamṭhiam hna i hmakhatte ah ahodah an si kha an hngalh fawn caah a khua kip khan an chuak i tlang lam khan an rak kalkanh hna i Jesuh le a zultu hna an phak hlanah khan a hmun kha an rak phan. 34 Jesuh cu lawng chung khan a hung chuak i mi cu vialte a hmuh hna tikah khan a zaang an fak ngaingai, zeicahtiah khaltu a ngei lomi tuu bantuk an si. Cucaah thil tampi a cawnpiak hna. 35 Khua a hung tlai zualmal tikah a zultu hna cu a sinah khan an ra i, “Atu hi a tlai ngaingai cang i hi hmun hi mi um lonak hmun a si. 36 Cucaah mi hi kalter hna law kan pawngkam lo hna le khua hna ah hin ei awk vaa cawk hna seh,” tiah an ti. 37 Jesuh nih cun a thawh hna i, “Nanmah nih ta ei awk cu nan pek hna,” tiah a ti hna. Annih nih, “A si ahcun, ngun tangka za hnih in rawl va cawk i anmah kha pek maw, na kan duhmi cu a si?” an ti. 38 Cucaah Jesuh nih khan annih cu, “Changreu tlang zeizat dah nan ngeih? Va kal u law va zoh tuah u,” tiah a ti hna. An va zoh dih in, “Tlang nga le nga pahnih,” tiah an ti.
39 Khi tikah Jesuh nih cun a zultu hna cu, mi kha a bubu in ram hring cungah khan nan ṭhutter hna lai, tiah a ti hna. 40 Cucaah mi cu a tlangtlang in an ṭhu i bu khat ah za khat, bu khat ah sawm nga, tiin an um. 41 Cun Jesuh nih khan changreu tlang nga le nga pahnih cu a lak hna i van kha a zoh i Pathian sinah lunglawmhnak bia a chim. Changreu cu a cheu hna i a zultu kha a pek hna i mizapi kha pe hna u, tiah a ti hna. Cun nga pahnih zong kha an dihlak in a phawt hna. 42 An dihlak in an ei i an khim dih. 43 Cun a zultu hna nih khan changreu ṭiltlawt le nga ṭiltlawt cu sei hleihnih khat an char. 44 Changreu a eimi cu pa thong nga an si.
Jesuh Ti Cungah A Kal(Mat 14.22-33; Jhn 6.15-21)
45Cucu a dih cangka in Jesuh nih a zultu hna cu lawng chungah a luhter hna i rili khattelei ral i a ummi Bethsaida khua ah khan ka hlan ah rak kal u, tiah a ti hna; anih tu cu mizapi kha a run thlahtak hna. 46 A zultu kha a kalter dih hna hnuah anih cu thlacam awkah tlang cungah a kai. 47 Khua a muih tikah lawng cu rili laifang kha a phan i Jesuh tu cu amahte lawngin tlang ah khan a um ko. 48 Thli kha anmah lei hoih in a hran caah a zultu hna nih khan an lawng zah cu an i harh ngai, ti kha a hei hmuh hna. Cucaah zinglei suimilam pathum le paruk kar hrawngah khin an sinah ti cung cun a ra i lonh hnek khi a zalh hna. 49 Sihmanhsehlaw ti cung i a kal cu 50 an dihlak in an hmuh i an thin a phang i, mithla a si, tiah an ruah i an ai. Sihmanhsehlaw Jesuh nih cun khulrang tein a hei chawnh hna i, “Nan thin phang hlah u, keimah ka si,” tiah a ti hna. 51 Cun lawng chungah cun an sinah khan a vung lut i thlitu cu a dai. A zultu hna cu an khuaruah a har tuk hringhran i an lung a ar ko, 52 zeicahtiah changreu sullam kha an rak hngal kho lo, an lung a rak pem kho lo.
Genesaret ah Mizaw A Damter Hna(Mat 14.34-36)
53 Rili cu an tan i Genesaret ah lawng cun an ṭum i khika ah an lawng cu an hren. 54 Lawng chungin an chuah cangka khan Jesuh a um kha mi nih cun an hngalh colh. 55 Cucaah cuka ram ah cun khulrang in an kal i a um an theihnak paoh ah a zawmi kha lang in an hei put hna. 56 Cun Jesuh cu a kalnak kip ah khan, khuate ah siseh, khuapi ah siseh, lo ah siseh, mi nih an mizaw hna cu chawdawrnak hmun ah khan an rak chuahpi cio hna i, a zawmi hna nih hin na puanki tal in tawng hna seh, tiah an nawl; cun a tawngmi paoh cu an dam.
Thangṭhatnak Hla
(Slm 70.1-5)
David Hla
1 Bawipa bawmhnak cu ka hngak
lengmang i
a donghnak ah ka aunak cu
a ngaih i a theih.
2 Ṭih a nungmi khor chung khan
a ka chuah.
nawncek khor chung khan
a ka chuah
Him tein lungpi cungah khan
a ka ṭhutter i
fek tein a ka umter.
3 Hla thar kha a ka cawnpiak,
ka Pathian thangṭhatnak hla kha
a ka cawnpiak.
Hi thil cu mi tampi nih an hmuh lai i
Bawipa kha an i bochan lai.
4 Bawipa kha aa bochan i
siasal leiah aa mer lo i
pathian taktak a si lomi a biami hna
sinah aa fon lomi cu
lunglawmmi an si.
5 Maw Bawipa ka Pathian, nangmah nih
kan caah thil tampi na tuah;
nangmah bantuk ahohmanh
an um lo.
Nangmah nih lam ṭhaṭha tampi khua
na kan khanpiak.
An dihlak in chim i tim ning law
a chim hmanh ka chim cawk hna hnga lo.
6 Raithawinak le pekchanhmi thil hi
na duhmi an si lo,
biakṭheng cungah a pum in
khanghmi thawinak sa hi
na kan halmi a si lo,
kan sualnak thianhnak ca i
raithawinak tuah zong hi
na kan halmi an si lo,
asinain nangmah nih khan
na bia kan theih khawh nakhnga
ding caah hna tu kha
na kan pek i
7 cucaah cun, “Hika ah hin
ka um ko;
keimah cawnpiaknak ding caah
na chiahmi cu
Nawlbia cauk chungah
an um ko.
8 Ka Pathian, zeitluk in dah na duhnak
tuah cu ka duh!
Na cawnpiaknak cu ka lung chungah
kaa chiah hna,” tiah kan leh.
9 Bawipa na mi an i pumhnak ah,
na kan khamhnak thawng ṭha kha
ka chim.
A chim cu a ngol in ka ngol bal lai lo,
ti kha na hngalh.
10 Khamhnak thawngṭha hi keimah ca
lawngah kaa chiah bal lo,
zumhawktlak na sinak le na kan
bawmhnak hi ka chim zungzal.
Na dawtnak a fekmi le zumhawktlak
na sinak hi
na mi vialte an i pumhnak ah
chim loin ka um bal lo.