BIACEIHTU 13
Samson Hrinnak
1 Cun Israel mi nih Bawipa mithmuh i a ṭha lomi kha an tuah ṭhan hoi i Bawipa nih Filistin mi kut chungah kum sawm li a pek hna.
2 Cun Zorah khuami pakhat, Dan phun a simi, a min Manoah a simi cu a um i a nupi cu a cing i fa a ngei lo. 3 Cun Bawipa vancungmi cu minu sinah cun a lang i amah sinah cun, “Zohhmanh, na cing i fa na ngei lo; sihmanhsehlaw fa na pawi lai i fapa na hrin lai. 4 Cucaah i ralring tuah, mitsur zu siseh a ṭhawngmi zu siseh na ding lai lo i a thianglo zeihmanh na ei lai lo, 5 zeitintiah, zohhmanh, fa na pawi lai i fapa na hrin lai. Lu mehnak nam nih a lu a tawng lai lo, zeicahtiah ngakchiapa cu a chuahka in Bawipa ca i Nazir mi a si lai; cun amah nih Israel mi cu Filistin mi hna kut chungin chuah hram a thawk lai,” tiah a ti. 6 Cun nu cu a ra i a va kha a chimh, “Pathian mi pakhat ka sinah a ra i a muisam cu Pathian vancungmi muisam bantuk a si, ṭih a nung ngaingai ko; khuazei in a si kha ka hal lo i a min kha a ka chim lo; 7 sihmanhsehlaw ka sinah, ‘Zohhmanh, fa na pawi lai i fapa na hrin lai; cucaah mitsur zu siseh a ṭhawngmi zu siseh ding hlah, cun a thianglo zong zeihmanh ei hlah, zeitintiah ngakchiapa cu a chuah ka in a thih tiang Pathian caah Nazir mi a si lai,’ a ti,” tiah a ti.
8 Khi tikah Manoah nih Bawipa kha a nawl ṭhan i, “Maw Bawipa, Pathian mi na rak thlahmi kha kan sinah ra ṭhan ko seh law, a chuak lai dingmi ngakchia cu zeitindah kan tuah lai ti kha kan cawnpiak seh tiah kan nawl,” tiah a ti. 9 Cun Pathian nih Manoah aw cu a ngaih i Pathian vancungmi cu minu sinah khan, lo i a ṭhut lioah a ra ṭhan; sihmanhsehlaw a va Manoah cu a sinah a um lo. 10 Cun nu cu khulrang in a le i a va kha a chimh i, “Zohhmanh, kan hnulei i ka sin i a rami kha ka sinah a lang ṭhan,” tiah a ti. 11 Cun Manoah cu a tho i a nupi cu a hei zulh i mipa sin cu a phan i a sinah, “Hi minu sin i bia a chimtu kha nangmah na si maw?” tiah a ti. Cun anih nih, “Ka si,” tiah a ti. 12 Cun Manoah nih, “Na bia cu a tlin tikah ngakchiapa cu zeitindah a umtu ningcang a si lai i zeidah a tuah lai?” tiah a ti. 13 Cun Bawipa vancungmi nih cun, “Minu sin i ka chimmi vialte kha i ralring seh. 14 Mitsur ruang in a chuakmi paohpaoh ei hlah seh, cun mitsur zu siseh a ṭhawngmi zu zong siseh ding hlah seh, cun a thianglo zeihmanh ei hlah seh; nawl ka pekmi vialte kha amah nih ul seh,” tiah a ti.
15 Manoah nih Bawipa vancungmi cu, “Zaangfahnak tein, in tlai u si law, meheh fa pakhat in in timhtuahpiak u sih,” tiah a ti. 16 Cun Bawipa vancungmi nih Manoah sinah cun, “Ka tlai hmanh law, na rawl cu ka ei lai lo; sihmanhsehlaw khangh thawinak kha na timh a si ahcun Bawipa sinah pechan ko,” tiah a ti. (Zeicahtiah Manoah nih amah kha Bawipa vancungmi a si cu a hngal lo.) 17 Cun Manoah nih Bawipa vancungmi sinah cun, “Na bia kha an tlin tikah kan in hmaizah nakhnga, na min ahodah a si?” tiah a ti. 18 Cun Bawipa vancungmi nih cun amah sinah, “Zeicahdah ka min na ka hal, khuaruahhar a si tiah na hngalh ko ṭung?” tiah a ti. 19 Cucaah chang thawinak he tiah meheh fa cu Manoah nih a lak i lungpi cungah Bawipa sinah a pekchanh, khuaruahharnak a tuahtu sinah cun. 20 Cun biakṭheng cungin meizik cu van i a kai lioah, Manoah le a nupi nih an zoh ko lioah khan, Bawipa vancungmi cu biakṭheng meizik chung cun a kai, cun vawlei ah an bawk.
21 Bawipa vancungmi cu Manoah le a nupi sinah a lang ti lo. Cucaah Manoah nih Bawipa vancungmi a si kha a hngalh. 22 Cun Manoah nih a nupi sinah khan. “Kan thi ṭheoṭheo lai, Pathian kha kan hmuh caah,” tiah a ti. 23 Sihmanhsehlaw a nupi nih amah cu, “Bawipa nih thah a rak kan timh a si ahcun, khangh thawinak le chang thawinak kha kan kut chungin a kan cohlanpiak hnga lo, cun hi thil vialte zong hi a kan hmuhsak hnga lo i hi bantuk thil hna zong hi a kan chim hnga lo,” tiah a ti. 24 Cun nu nih cun fapa a hrin i a min ah Samson a sak; cun ngakchiapa cu a ṭhang i Bawipa nih thluachuahnak a pek. 25 Cun Bawipa thlarau nih Zorah le Eshtaol karlak i a ummi Mahaneh-dan hmun ah khan amah cu cawlcanghter hram a thawk.
BIACEIHTU 14
Samson le Timnah Khua Nu
1 Samson cu Timnah ah a vung kal i Timnah ah cun Filistin mi ngaknu pakhat a hmuh. 2 Cun a hung tlung i a nu le a pa cu, “Timnah ah Filistin mi ngaknu pakhat ka hmuh; amah cu ka innchung caah ka ṭhitpiak tuah u,” tiah a ti. 3 Sihmanhsehlaw a nu le a pa nih, “Na rualchan hna i an fanu hna lakah siseh, kan miphun vialte hna lakah siseh, nu an um lo caah maw cuarpar tan lomi Filistin mi hna lak i nupi ṭhit awkah na kal ko lai?” tiah amah cu an ti. Sihmanhsehlaw Samson nih a pa cu, “Ka ṭhitpiak ko, ka duh tuk cu ta,” tiah a ti.
4 A nu le a pa nih mah cucu Bawipa sinin a si kha an hngal lo; zeitintiah Filistin mi kha doh awkah caan rem a kawl. Cun caan lioah cun Filistin mi nih Israel mi kha an uk hna.
5 Cun Samson cu a nu le a pa he tiah Timnah ah an vung kal i Timnah mitsur dum hna kha a vung phan. Cun zohhmanh, chiandeih no pakhat nih a rak awnhhnawh; 6 cun Bawipa thlarau cu ṭhawng ngaiin a cungah a tlung i chiandeih cu meheh fa thlehbaoh bantuk ceo khin a thlehbaoh dih ko; a kut in zeihmanh aa put fawn ṭung lo. Sihmanhsehlaw a tuahmi kha a nu siseh, a pa siseh, a chim hna lo. 7 Cun a vung kal i minu he cun bia an i ruah i minu cu Samson nih cun a duh ngaingai ko. 8 Cun tlawmpal hnuah amah cu vung ṭhit awkah a kal ṭhan i chiandeih ruak kha hei zoh pah awkah a pial i zohhmanh, chiandeih pum chungah cun khuai bu khat a rak um i hliti zong a um. 9 A kut in a sawk i a ei pah in a kal i a nu le a pa sin cu a phan i tlawmpal kha a pek ve hna i an ei. Sihmanhsehlaw khuaihliti cu chiandeih ruak chungin a lakmi a si kha a chim hna lo.
10 Cun a pa cu nu sinah khan a vung kal i khika ah Samson nih puai pakhat a tuah; cu bantuk cun tlangval nih an tuah tawn. 11 Cun mi nih an hmuh tikah amah he um ṭi awkah hawi sawm thum an ratpi hna. 12 Cun Samson nih annih cu, “Biahleng pakhat kan hal tuah hna lai; cun zei a si kha puai chung ni sarih chungah hin nan ka chimh khawh i nan hngalh khawh ahcun puan hmangṭhia zun sawm thum le puai puan zun sawm thum kan pek hna lai; 13 sihmanhsehlaw zei a si kha nan ka chimh khawh lo ahcun nanmah nih puan hmangṭhia zun sawm thum le puai puan zun sawm thum nan ka pek lai,” tiah a ti hna. Cun annih nih, “Na biahleng cu chuah tuah, kan ngai tuah lai,” tiah an ti. 14 Cun anih nih,
“Eitu chungin ei awk a chuak.
A ṭhawngmi chungin a thlummi
a chuak,”
tiah a ti hna. Cun annih nih cu biahleng cu zei a si kha ni thum chung an hngal kho lo.
15 A ni linak ni ah Samson nupi cu, “Na va cu, biahleng kha zei a si a kan chimh nakhnga lem tuah, cu ti a si lo ahcun nangmah le na pa innchungkhar cu mei in kan in khangh hna lai. Kannih kha sifak i umter awkah maw hika ah na kan sawm?” tiah an ti. 16 Cun Samson nupi cu a hmaiah a ṭap i, “Na rak ka daw lo i na rak ka huat a si ko hi ta; ka ram mi hna cu biahleng na hal hna, asinain zei a si cu na ka chim ṭung lo,” tiah a ti. Cun anih nih, “Zohhmanh, ka nu siseh ka pa siseh ka chim hna lo i nangmah cu kan chimh lai maw?” tiah a ti. 17 Cun an puai chung, ni sarih chung cu a hmaiah a ṭap i fak piin a hnek lengmang caah, a ni sarihnak ni ah cun a chimh. Cun anih nih biahleng cu a ram mi hna kha a chimh hna. 18 Cun cu khuami hna nih cun a sinah, ni sarihnak ni, ni a tlak hlanah,
“Zeidah khuaihliti nakin a thlum deuh?
Zeidah chiandeih nakin a ṭhawng deuh?” tiah an ti.
Cun anih nih an sinah,
“Ka cawla in rak ka thuang hlah u law,
Ka biahleng hi nan rak hngal kho hnga lo,” tiah a ti.
19 Cun Bawipa thlarau cu ṭhawng ngaiin a cungah a tlung i Ashkelon ah a vung kal i cu khuami cu sawm thum a vung thah hna i an thuam cu a lak i biahleng a chimtu hna kha puai puan cu a pek hna. Thin lin ngaiin a pa inn ah a hung kir ṭhan. 20 Cun Samson nupi cu, a hawipa, a kawi a rak simi kha an pek.
Pathian Tuufa
29 A thaizing ah Johan nih cun Jesuh cu a sin i a rat kha a rak hmuh i, “Zohhmanh u, Pathian Tuufa, vawlei sualnak a kalpitu khi! 30 Amah hi pei, ‘Ka hnu in mipa pakhat a ra lai, sihmanhsehlaw amah cu keimah nakin a ngan deuhmi a si, zeicahtiah ka chuah hlan in amah cu a rak um cang,’ tiah ka rak chimmi kha a si cu. 31 Amah cu ahodah a si lai ti kha ka hngal lo, sihmanhsehlaw ti in tipilnak ka rak pek lengmang hna cu amah kha Israel mi nih an hngalh khawh nakhnga caah a si,” tiah a ti.
32 Cun Johan nih cun, “Vancung in Thlarau cu ṭhuro bantukin a rung ṭum i a cung i aa fut kha ka hmuh. 33 Amah cu ka rak hngal ṭhiamṭhiam lo, sihmanhsehlaw ti in tipilnak va pe hna tiah a ka thlahtu nih khan, ‘Mi pakhatkhat cungah Thiang Thlarau kha a rung ṭum i aa fut kha na hmuh tikah, cu pa cu Thiang thlarau in tipilnak a petu hna ding cu a si ti kha na hngalh lai,’ a ka ti. 34 Cucu keimah hrimhrim nih ka hmuh i tehte ka khaan. Amah hi Pathian Fapa cu a si ko,” tiah a ti.
Jesuh Zultu Hmasa Bik Pawl
35 A thaizing ah Jesuh cu aa chawk i cu lioah cun Johan le a zultu pahnih nih an dirnak khan an hmuh ṭhan. 36 Johan nih cun a hei zoh i, “Pathian Tuufa khi zohhmanh u,” tiah a ti. 37 Cu bia a chim cu a zultu pahnih nih khan an theih i Jesuh cu an zulh. 38 Jesuh cu a hnulei ah a hun i mer i an zulh kha a hmuh hna tikah, “Zeidah nan kawl?” tiah a hal hna. Annih nih, “Rabbi, khuazei ah dah na um?” tiah an leh. (Rabbi a sullam cu cawnpiaktu saya tinak a si).
39 “Ra u law ra zoh tuah ngat u,” tiah a leh ve hna. Cucaah amah sinah khan an kal i a umnak cu an va hmuh, cu ni cu amah sinah cun an cam. (Cu caan cu zanlei suimilam pali hrawng khi a si).
40 Johan bia a thei i Jesuh sinah a kalmi pahnih hna lak i pakhat cu Simon Peter nau Andru kha a si. 41 Andru nih a tuah hmasa bikmi thil cu a u Simon va kawl kha a si i, “Messiah cu kan hmuh cang,” tiah a ti. (Messiah cu Khrih tinak a si). 42 Cun Simon cu Jesuh sinah khan a kalpi.
Jesuh nih cun a rak zoh i, “Nangmah cu Johan Fapa Simon na si. Na min cu Sefas a si cang lai,” tiah a ti. (Sefas ti cu Peter ti he khan aa khat i a sullam cu “lungpi” tinak a si).
Jesuh Nih Filip le Nathanael Kha A Auh Hna
43 A thaizing cu Jesuh cu Galilee ram kal kha aa tim. Filip kha a hei hmuhpah i, “Ka zul,” tiah a ti. 44 (Filip cu Andru le Peter bantukin Bethsaida khuami kha a si ve). 45 Filip nih cun Nathanael kha a va hmuh i, “Phungbia cauk chungah a kong Moses nih a ṭialmi pa, profet hna zong nih a kong an ṭialmi pa kha kan hmuh cang. Amah cu Josef fapa Jesuh, Nazareth khuami kha a si,” tiah a ti.
46 Nathanael nih cun a rak i thawh i, “Nazareth khua cun thil ṭha zeital a chuak kho hnga maw?” tiah a ti.
Filip nih cun, “Ra law ra zoh hen aw,” tiah a leh.
47 Jesuh nih cun Nathanael cu amah lei i a rat kha a rak hmuh i, “Israel mi taktak a simi khi zoh hmanh u; amah khi hlenthawinak lungthin zeihmanh a ngei lomi a si,” tiah a ti.
48 Nathanael nih cun aa thawh i, “Zeitindah na ka hngalh?” tiah a ti. Jesuh nih cun, “Filip nih an kawh hlanah khan, theipi kung tangah ka rak in hmuh cang,” tiah a leh.
49 Nathanael nih cun, “Saya, nangmah cu Pathian Fapa na si. Israel mi Siangpahrang na si,” tiah a ti.
50 Jesuh nih cun, “Theipi kung tang i na um lio kha kan hmuh, ka ti caah cun maw na zumh? Hi nakin a ngan deuh ngaingaimi thil na hmuh len hna lai,” tiah a ti. 51 Cun annih cu a thawh hna i, “Hi biatak hi kan chimh hna: Van kha aa hun i Pathian vancungmi hna cu Mi Fapa cung i an ṭum le an kai kha nan hmuh lai,” tiah a ti.
SALM 102
Harnak A Ingmipa Thlacamnak
1 Maw Bawipa, ka thlacamnak cu
ka ngaihpiak law
nangmah bawmhnak hal ah
ka aunak cu ka theihpiak ko.
2 Harnak ka in tikah hin
ka thuhtak hlah!
Ka aunak cu ka ngaihpiak law
khulrang in ka let tuah.
3 Ka nunnak cu meikhu bangin a lo,
ka pum cu mei bangin a kang.
4 Ram car bangin ka nunnak cu a uai,
rawl ei duhnak zeihmanh
ka ngei lo.
5 Fak piin ka hrum i ka ai,
ka ruh le ka cuar lawng ka si ko.
6 Thetse ram i a ummi va bantuk khi
ka si,
chuahtakmi khua rop i chimbu
bantuk ka si.
7 Hngilh kho loin ka um, inncung va,
amah lawngin a um i a ci a haimi
bantuk ka si.
8 Chun nitlak in ka ral nih
an ka nihsawh,
nihchuak capo i a ka saitu pawl nih
ka min cu chiatsernak ah an hman.
9 Ka rawl cu vutcam a si i
ka dinmi cu mitthli he aa cawh,
10 zeicahtiah ka cungah na thin a hun
caah a si.
Na ka cawi i na ka hlonh.
11 Ka nunnak cu zanlei sang thladem
bantuk men a si;
Kei cu ram bantuk ka si ko.
12 Sihmanhsehlaw Bawipa, nangmah cu
siangpahrang na si zungzal ko;
chan vialte nih an in philh lai lo.
13 Na tho lai i Zion cu na zaangfah lai,
a cung i zaangfah ngeih caan cu
a phan cang;
atu hi cu caan cu a si cang.
14 Hrawh dih cikcek a si ko nain
na salle nih kan duh ṭhiamṭhiam,
a rawk dih ko nain a cungah
zaangfahnak kan ngei ṭhiamṭhiam.
15 Miphun kip nih Bawipa cu an ṭih lai,
vawlei cung siangpahrang vialte nih
a ṭhawnnak cu an ṭih lai.
16 Bawipa nih Zion kha a remh ṭhan tikah
Bawipa lianhngannak cu a lang lai,
17 Kaltak cia a mi kha an thlacamnak
a ngaihpiak hna lai i
a theihpiak hna lai.
18 Bawipa nih a tuahmi thil kha
a ra lai ding chan caah ṭial tuah u,
cuticun a chuak rih lomi nih amah
kha an thangṭhat khawh lai.
19 Bawipa nih a sangmi a hmunthiang
khin a run cuanh,
vancung khin vawlei cu
a run cuanh,
20 cu a run cuanh cu thongtla pawl
an aihramnak theih awk le
thah awk i biaceih cangmi hna
luatter awkah a si.
21 Cucaah Bawipa min cu mi nih Zion ah
an chim lai i
Jerusalem ah amah cu
an lawmh lai;
22 cucu zeitik ah dah a si lai ti ahcun,
miphun hna le pennak hna kha
hmunkhat ah an i pumh i
Bawipa kha an biak tikah a si lai.
23 Ka chan ṭim hmanh ti hlanah
Bawipa nih ka thazang a ka derter i
ka nunnak kha a tawiter.
24 Ka Pathian, atu cu ka la rih hlah,
ka tar hlanah cun ka la rih hlah!
Bawipa, nang cu zungzal in
a ummi na si,
25 hlanpi ah vawlei cu na rak ser cang,
Nangmah nih na kut hrimhrim in
van khi na ser hna.
26 Van le vawlei cu an lo dih lai,
sihmanhsehlaw nang cu
na hmun lai;
annih cu puan bangin an ṭet lai.
Puan bangin na thlen hna lai i
an lo lai;
27 sihmanhsehlaw nang cu zungzal in
nangmah bon na si ko i
na nunnak a dong lo.
28 Kan fale cu him tein khua an sa lai i
an tefa hna cu
nangmah nih zungzal in
na huhphenh hna lai.
15 Mi lungthin tlawm nih cun zei paoh
kha a zumh,
sihmanhsehlaw mifim nih cun
a lamh ding kha ṭha tein a zoh.
16 Mifim cu ralring tein a um i
ṭhat lonak kha a hrial,
sihmanhsehlaw mihrut cu
aa ralring lo i
khulrang tuk in a tuah tawn.