Khrihfa nun cu Khrih nun a si I cu Khrih nun cu chung lei in thlarau a si mi Pathian he pehtlaihnak ngeih a si caah nitin kan nunnak ah zumhnak thawngin kan hmuh mi Thiangthlarau he pumpaak in hawikomhnak hi biapi bik ah kan chiah. Khrihfabu cio i kan i pumpeknak pin lei ah zaanghlei cawi in Bawipa ram kauhnak caah Bawipa nih a kan pek khawhmi thil ti khawhnak cio hmang in rian kan tuan hna.
Inn cio ah pumpak in thlacamnak kan ngeih lawng siloin zarhkhat voikhat in hmunkhat te ah thlacam tinak kan ngei hna. Cu thlacamnak ahcun lai miphun caah siseh, kan umnak cio ram le miphun caah siseh, kan lairam caah siseh, vawlei cung pumpi caah siseh thlacamnak kan ngei. Pakhat le pakhat thlarau thazaang i peknak le thla i cam piaknak zong kan ngei hna.
Lai miphun dihlak nih Pathian dawtnak kan hngalh khawh nakhnga siseh, miphun kip sin zong ah Thawngtha kan phuan i nunnak an ngeih khawh ve nakhnga siseh, a lam kip in rian kan tuan hna. Fial chom le hnek chom siloin Bawipa nih thinlung ah rian a tuanning cio in nunnak, sining le ngeih le chiah zong pek in a herhnak hmun ah rian kan tuan ti hna.
A bik in Bawipa sin ah thinlung kekkuai in miphun damnak caah thla kan cam ahcun Bawipa nih a kan zaangfah lai in kan miphun a dam ter lai I miphun dang caah zong ah a kan hman lai ti zumhnak he Bawipa sin ah khup bil thlacam hi kan rian ngan bik cu a si.
Pathian bia a si mi Bible relnak in siseh thawngtha ngaihnak in siseh thazaang kan la hna. Vawlei cung khuazakip ah zumhnak thawng in Pathian fa a si mi vialte he hmunkhat ah hawikomhnak in thazaang lakti nak le thangthatnak kan ngei. Thlarau sal taangmi nih luatnak an hmuh ve khawh nakhnga Thiangthlarau sawmnak he bawmh a duhmi paoh kan bawmh hna.
Pathian nih a kan pek cio mi thil ti khawhnak pahrang cio kha Thiangthlarau uk ter in Dawtnak he rian kan tuan ti hna. Mi vialte nih Biatak thawngtha thawngin thlarau, thinlung le taksa ah luatnak an hmuh khawh nakhnga khua kip le ram kip ah a um mi miphun kip sin Pathian nih chiti a thuhmi hna hmangin Crusade kan tuah piak hna.
Johan 10:27 “Ka tuu nih cun ka aw kha an ngaih, annih kha ka hngalh hna i an ka zulh.” a ti bantuk in nitin kan nunnak ah kan tuu khaal a si mi Khrih aw ngai in nun hi biapi taktak a kan chiah. Thiangthlarau nih a kan hruai ning in kan umkalnak hmun kip ah nun in thawngtha kan chim. Khrih thawngin vawlei cung khuaza ram kip ah unau a si mi vialte khawikomhnak ngei in pakhat le pakhat thazaang kan i pe I thazaang kan la ti hna. Cu hawikomhnak in kan hmuhmi thil tha paohpaoh kha kan khrihfabu cio thanchonak ah kan hman.
Thlarau ram ah vawlei cung khuazakip in hmunkhat ah thla kan cam ti hna. Pakhat nih Bawipa sin in a hmuhmi Thawngtha kha pakhat sin ah zumhnak le dawtnak kan I cheu bauh cio hna. Pakhat le pakhat zong thla kan I cam piak cio hna. Thlacam a kan cah mi vialte zong dawtnak thinlung taktak he Bawipa sin ah khup bil aunak in nawl piaknak kan ngei hna. Kan tuahmi thil kip ah Thiangthlarau nih a kan umpi caah pakhat hnu pakhat in hlawh tlinnak kan hmu I vawlei cung hmun zakip ah Pathian sunparnak a lang. Bawipa min thangthat si ko seh.