Dam in nan um cio hna maw? Nan umnak hmunkip cio ah Bawipa nih thluachuahnak in chapchin cio ko hna seh. Zeidah Bawipa nih tuah hna seh ti a kan duh timi hi fakpi in kawl khawh rak i zuam cio ulaw tiah kan sawm hna.. Nai hrawng cu fak ngaiin khua a ka ruahter ngaimi a um i cucu minung hi khua khangtu maw kan si cang i minung khuakhanmi cungah lung a tlinpitu le tlam a tlintertu, bia a ngeitu men hi maw ka Pathian hi asi cang timi hi ka ruahmi cu asi. Minung hi khuakhan cia chung a duhmi le timh tuahnak ngeih chung a duh ngaimi miphun kan si taktak ko. Asinain minung hi maw khuakhangtu kan si peng ko lai? Minung hi maw timhtuahnak a rak ngei chungmi kan si ko lai? Kan Pathian hi kan khuakhannak ah le timhtuahnak kan ngeihnak ah hin ai tel ve ti hnga lo maw? Kan Pathian hi kan khuakhanmi le timhtuahnak kan ngeihmi cungah bia ngeitu menmen hi maw asi cang hnga? A ka sertu ka Pa, Pathian nih hin minung kan cungah nawl ngeihnak vialte maw pek dih kan si cang hnga? Minung nih khua khang dih ulaw timh tuahnak ngeih dih hmasa uh tiah zeitikahdah a chim cang hnga? Maw Ka Bawipa minung hi khuakhangtu sinak nawl maw naa kan pek cang? Maw Bawipa Nangmah hi kan cungah bia ngeitu lawnglawng hi maw na si cang lai? Kan khuakhannak ah hin khua naa kan khanpi ti lai lo maw? Timh tuahnak kan ngeihmi ah hin naa kan telpi ti lai lo maw? Maw Bawipa khuakhantu le timh tuahnak ngeipitu na si ti lai lo maw?
Cathiang nih a kan chimh duhmi hi zeicem dah asi ko hnga?
• Minung ni khua an khan ko lai, sihmanhsehlaw bia a ngeitu cu Pathian asi a timi ah hin minung nih khua kan khan awk hrimhrim asi timi hi maw a kan chim duhmi asi ko hnga? (PHUNGTHLUKBIA 16:1)
• Bawipa sinah na tuahmi vialte cu pe law na khuakhannak cu a tling ko lai a timi ah hin teh na tuahmi paoh tuahnak dingah khua khang ko timi maw a kan cawnpiak duhmi asi hnga? (PHUNGTHLUKBIA 16:3)
• Minung nih hin a khual tlawnnak ding khua a khan ko lai, a kephau a hruaitu cu Bawipa asi a timi ah hin teh khual a tlawnnak ding khuakhantu hi minung hrimhrim kan si awk asi timi hi maw a kan chimh duhmi asi ko hnga? (PHUNGTHLUKBIA 16:9)
• Bawipa nih inn a sak lo ahcun a satu hna rianttuannak cu pakpalawng asi a timi ah hin teh minung hrimhrim hi inn dirh hmasatu kan si awk asi timi maw a kan chimh duhmi asi ko hnga? (SALM 127:1)
• Bawipa nih khua kha a ven lo ahcun a vengtu hna hngilh loin an umnak cu santlailo asi a timi ah hin teh minung hi khua vengtu a umnak dingah khua khangtu nan si awk asi timi maw a kan cawnpiak duhmi asi hnga? (SALM 127:1)
Biatak cu hihi asi: minung hi khuakhangtu sinak, timhtuah chungnak nawl a ngeimi kan si hrimhrim lo. Amah belte cu Cathiang nih a kan chimh duh lengmang mi cu nannih minung hna hi nanmah tein khuakhang hmangmi nan si, nanmah tein khualtlawn ai timmi nan si, nanmah tein tuah nan duhmi paoh a tuahmi miphun nan si, nanmah nawl tein innsak a hmangmi nan si, nanmah tein khua vengtu kan ngeih a hau ti a hmangmi nan si ti hi a kan cawnpiak duh deuhmi asi. Sihmanhsehlaw nan khuakhanmi cung tiang hmanh ah thluachuah an pek piaktu hna nan Pathian ka si tihi theihter a kan duh tthan! Zumtu paohpaoh nih cun Bawipa kan Pathian nih tuah hna seh ti a kan duhmi le a kan fialmi rian hngalh hi kan i zuam awk asi!
Nihin kan miphun, kan Khrihfabu cio le pumpak innchungkhar cio kan zoh tik zongah hin a cung i ka ttial lengmangmi bangin khuakhantu le timhtuahnak a ngei hmasatu hi kanmah minung kan si lengmang taktak ko. Hmailei zongah kan si lengmang ko lai ka zumh. A ruang cu Pathian nih zeidah tuah hna seh ti a kan duhmi hi hngalh kan i timh hrimhrim lo caah asi. A hleiin Khrihfabu hna hi cu Pathian nih mah tihin khuakhannak le timh tuahnak nan ngeih awk asi timi hi a kan chimh hnu ah khua khannak le timhtuahnak kan ngeih awk hrim a si nain a tu cu kanmah nih khua kan khan le kan khuakhanmi hi Bawipa nih tlamtlinter ko seh tiin thla kan cam cio! Hihi asi awk cu asi hrimhrim lo. A taktak le ngaingai ahcun khuakhantu hi minung si loin kan biakmi Kan Pathian, a kan sertu Pathian hrimhrim hi asi bak awk asi. Bawipa Jesuh Khrih nih a kan cawnpiakmi lak ah ka duh tukmi cu hihi asi: pakhatnak ah Hrinthannak in Pathian Pennak kawl hmasa ti hi asi. Pahnihnak ah Pathian Pennak chung na um hnu ah Pathian nih zeidah tuah seh ti a ka duh timi kha na hngalh hlan tiang kawl ti hi asi. Pathumnak ahcun Hrinthannak in Pathian Pennak ah, Pathian Pennak in Pathian nih zeidah tuah seh ti an duhmi hngalh, Pathian nih zeidah tuah seh ti an duhmi na hngalhnak in khuakhannak le timhtuahnak ngeih ding tu hi an rak si. Cu hnu lawngah zeidang vialte zong pek na si ko lai timi kha a hung tling kho te hnga....
Chimh kan zuam lengmang mi hna cu minung nih khua kan khan awk asi timi lunglut ngei ti loin Pathian nih zeidah tuah hna seh ti a kan duhmi kan hngalh hnu lawnglawng ah Pathian he khua khantti le timhtuahnak ngeihtti asi hnga... Biatak cu kan Pathian lawng hi khuakhangtu Pathian asi i kan Pathian lawng hi kan caah timh tuahnak a ngeitu taktak cu asi.. Minung nih khua kan khan lengmang cu kanmah duhnak tlinter kan i zuam lengmang ruang tu ah le Bawipa duhnak hngalh kan i zuam duh lo caah a rak si. A nungmi Pathian he pehnak tling a ngei taktak mi nih cun Amah lawngin khua a khang hrimhrim lai lo! Bawipa nih a fialmi le a chimhmi tu kha a tuah lai i Pathian khuakhan ciami chung zulh kha a nun in a cawng ko lai! Zeizong vialte cungah uktu Bawipa kan ngeih hi philh hna hlah usih. Amen..
Minung vialte kan caah hin khuakhannak le timhmi thil pahnih an um zungzal. Cu hna cu minung kanmah te nih khuakhannak le timhmi kan ngeihmi le Pathian nih kan caah a kan ngei piakmi khuakhannak le timhmi tiin an um. Nihin minung vialte nih kan zuanhnawh ciomi cu kanmah khuakhannak le timhmi cio hi an si. Minung khuakhannak cu a hmun lo i ai fiang ngaingaimi a um loh, na khuakhanmi chungah a donghnak bia a ngeitu le tlamtlinnak, tlamtlin lonak nawl ngeitu cu Bawipa tthiamtthiam asi lai. Sihmanhsehlaw Bawipa khuakhanmi le timhmi cu zungzal in a hmun i thlua a chuak. Amen!
- Pathian khuakhannak cu Zungzal in a hmun
- Pathian khuakhanmi le timhmi cu zungzal in a fek
- Pathian khuakhannak le tinhmi lawng zungzal a hmun lai.
- Pathian khuakhannak cu zungzal in a fim
- Pathian khuakhannak cu zungzal in thlua a chuak
Nangteh Nangmah khuakhannak maw nai thim lai? Bawipa kan Pathian khuakhannak dah naa thim ve cang lai? Kei le ka innchungkhar nih cun ka Bawipa nih khuakhan piak ciami le timhpiak ciami hi kan i thim zungzal ko lai.. Amen.
——-
SALM 33:11
Sihmanhsehlaw amah khuakhanmi cu zungzal in a hmun i amah timhmi cu zungzal in a fek.
PHUNGTHLUKBIA 19:21
Minung lung chungah khuakhannak tampi a um ko lai, sihmanhsehlaw Pathian tinhmi lawng kha a hmun lai.
ISAIAH 28:29
Hi bantuk fimnak vialte hi Ralkapbu Bawipa sinin a rami a si. Pathian khuakhannak cu a fimmi a si zungzal i thlua a chuak zungzal.