Righteousness = Pathian Dinnak
Dinnak timi sullam cu Pathian He kan I rem cang tinak asi. Righteousness meaning is to be right with God. Pathian he kan I remnak cu Bawipa Jesuh Khrih kan zumhnak thawng lawngin asi. Cu Bawipa Jesuh Khrih kan zumh hlanah hin Bawipa Jesuh hi zumhtlak asinak le kan zumhngam nakhnga nganpi in rian a limmi aum I cucu rian a limmi thawngin cun Pathian he remnak kan hmuhkhawhnak cu asi. Pathian he remnak kan hmuhmi hi Bawipa Jesuh nih a nunnak pek in rian a limmi thawngin asi nain nangmah le keimah caah Pathian he kan I remkhawhnak dingah cun a thlahmi Fapa zumh le a kan limpiakmi zumh thawng lawngin hmuhmi asi. Nangmah le keimah caah zumh fial kan simi hi a fawimite alo lai nain Bawipa Jesuh caah cun nunnak tiang pekmi, Pathian he remter khawhnak tiang chuahtertu nunnak in pekmi raithawinak asi. Nunnak in pekmi raithawinak nih cun Pathian he remnak a chuahter I cucu nangmah le keimah nih Bawipa Jesuh kan zumh tikah Pathian he airem cangmi Dinnak ah cohlanpiak kan si.
Abraham cu Pathian nih na tefa cu van arfi le ṭhese zat an si lai tiah bia a rak kamh I cu bia a kamhmi cu a zumh caah Pathian nih Dinnak ah cohlanpiak a rak si. Pathian nih bia a rak kamhmi tefa hi Israelmi khi kamhmi siloin Bawipa Jesuh Khrih zumh thawngin Pathian fale ṭhese in van arfi zat kan si lai dingmi biakamnak asi. Halleluijah. Amen.. Bawipa min thangṭhat si chin ko seh. Dinnak timi cu dinnak le ṭhatnak in zumhawktlak sinak nun an rak ngeih ruangah dinnak mi an si siloin Pathian an rak zumh hmasa caah Pathian biakammi vialte zong hi Pathian nih a tlinter khawh lai timi kha an zumh khawh caah dinnak mi tiah auh an rak si. Cubantukin nihin zumtu aitimi hna zong hi Dinnak(Pathian he remnak) kan hmuhnak cu kanmah tuahmi ruangah le ṭhatnak in zumhawktlakmi sinak nun kan ngeih ruangah siloin Bawipa Jesuh Khrih kan zumh thawng lawnglawngin hmuhmi Dinnak, Pathian he remnak kan hmuhmi cu asi. Pathian le minung karlak ah hin sualnak ruangah airalmi kan si I cu kan I ralnak in remter dingah Bawipa Jesuh thihnak cu asi, Bawipa Jesuh thihnak cu kan sual ruangah le sual ngaihthiam kan sinak ding caah asi. Kan sualnak ruangah Pathian he kan I remlomi cu Bawipa Jesuh thihnak thawngin Pathian he remnak kan hmu.
Bawipa Jesuh Khrih hi Pathian nih vawlei sualnak in keimah sualnak vialte Khamhtu dingah a run thlahmi asi tiin ka zumh I ka cohlan tikah Bawipa Jesuh ka zumhnak cu ka dinnak ah relpiak le cohlanpiak ka si. Ka Dinnak ah relpiak le cohlanpiak ka si ka timi cu miding le miṭha ka si timi khi sawhduhmi siloin Pathian he kaa rem cang timi khi sawhduhmi asi. Minung hi kan ṭhat ruangah le kan din ruangah siseh zumhawktlak nun kan ngeih ruangah siseh Pathian he remnak, Dinnak kan hmuh asi ahcun kan I porhlaw dih ko lai. Dinnak, Pathian he remnak kan hmuh cu kanmah thawngin siloin Bawipa Jesuh nih a thisen in a kan champiakmi le a thihnak in a kan limpiakmi thawngin asi I cucu kan zumhnak in kan I hrawmmi Pathian he remnak kan hmuhmi Dinnak cu asi. Bawipa Jesuh zumhnak thawngin kan hmuhmi Pathian he remnak hi kanmah ruangah siloin Pathian thinlung in a luangmi dawtnak ruangah Fapa Jesuh nunnak pekpiak ding tiangin zeizong vialte serhlan in timhciami Khamhnak, Pathian Vel kan ti lengmangmi cu asi. Cucaah pei Zumhnak tello in Pathian lungton khawh asilo a tinak kha asi. Pathian lungton khawhnak le Pathian lawmhter khawhnak cu a hramthok in a dongh tiang zumhnak thawngin asi I cu zumhnak thawngin hmuhmi Pathian lawmhter khawhnak le Pathian lungton khawhnak cu Bawipa Jesuh Khrih zumh thawng lawnglawng in asi. Thildang tampi cungah zumhnak na ngeihmi thawngin sihinlo in Bawipa Jesuh Khrih nih a lim cangmi le Pathian nih keimah ca hrimhrim ah a run thlahmi Pathian Fapa asimi Bawipa Jesuh zumhnak thawng lawngin asi.
Pathian he remnak ka hmuhmi Dinnak kaa thoknak cu Bawipa Jesuh Khrih ka zumhnak in aithok bantukin ka donghnak ka hmuh dingmi Dinnak, Pathian he kaa rem zungzalnak zong hi Bawipa nawl ka ngeih cang ruangah le zumhawktlak nun ka ngeih cang ruangah si hin loin a hramthok i Bawipa Jesuh zumh thawngin Pathian he remnak ka hmuhmi dinnak in cohlan ka si bantuk te khan ka donghnak zong cu Bawipa Jesuh zumh thawngin Pathian he remnak, Dinnak ka hmuhmi cu asi zungzal ko lai. Amen. Bawipa Jesuh zumhnak thawngin ka hmuhmi Pathian he remnak, dinnak cu ahram in donghnak tiang Bawipa Jesuh nih lim cangmi thawngin le Bawipa Jesuh Khrih ka zumhnak thawng lawnglawng in an si. Bawipa Jesuh cu keimah sualnak ruangah le ka sualnak ngaihthiamnak ding caah a thi. Bawipa Jesuh cu Pathian he kaa remnak dingah le daihnak ka hmuhnak ding caah a thi I Bawipa Jesuh thihnak le thawh ṭhannak thawngin Pathian he airem cangmi, miding ka si lawng siloin Pathian nih thiamcotermi ka si cang, Halleluijah. Amen.
Bawipa Jesuh Khrih hi Pathian Fapa asi I vancung in vawlei ah Pathian nih minung vialte in Keimah tiang tlanh dingah le khamh dingah chiti thuh in thimmi le thlahmi asi ti lawng siloin a zungzal in ka Bawipa si dingah a run thlah timi kha Bawipa Jesuh cungah zumhnak ka ngeih tikah Bawipa Jesuh cu Khamhtu le Bawipa ah kaa ser. Bawipa Jesuh Khrih cu ka zumh caah Khamhtu le Bawipa ah kaa ser I Khamhtu le Bawipa kaa ser cu Pathian nih keimah caah nunnak pekpiak tiangin chiti thuh in Tlanhtu dingah thlahmi cu Amah lawnglawng hi Pathian fapa asi timi ka zumh caah asi I cu Amah lawnglawng Pathian Fapa ngeihchun Bawipa Jesuh ka zumhnak thawngin Pathian he ai rem cangmi, Miding(Dinnak) ah ka hung cang. Pathian he remnak ka hmuhmi dinnak cu Bawipa Jesuh nih Pathian he a kan raltertu kan sualnak leiba vialte cu a kan champiak dih i kan in hnga dingmi a kan inpiakmi ruangah Bawipa Jesuh thawngin cohlantlak le Pathian he aa rem kho ah a kan ser. Pathian ral a rak simi nangmah le keimah cu Pathian he kan I remkhawhnak hi Pathian he a kan ṭhentu, remterlotu sualnak leiba champiaknak in asi. Dinnak mi ka si cu ka dinnak khi le ka ṭhatnak khi chimduhmi siloin Pathian he kaa rem cang, Pathian he aipeh khomi le airem cangmi ka si tinak asi. Pathian he aapeh kho le airem khomi ka sinak cu Bawipa Jesuh nih nunnak thap in rian a kan limpiakmi ruangah asi I nangmah le keimah nih lungawṭawmnak umloin Bawipa Jesuh Khrih zumhnak thawngin kan hmuhmi Pathian he remnak, dinnak asi.
Ahlan ahcun Adam le Eve nih Bawipa nawl an ngaihlo ruangah Pathian he ral kan rak si I Pathian he airemlomi kan si. Sihmanhsehlaw Pathian Vel cu a ngantuk caah a Fapa ngeihchunte cu Keimah thok in vawleicung minung vialte caah a run thlah tikah keimah bantukin Bawipa Jesuh Khrih hi Pathian Fapa asi tiin a zum I a cohlangmi vialte hna cu dinnak minung ah rel ve an si. Dinnak minung ah rel ve an si cu anmah tuahmi ruangah siloin Bawipa Jesuh an zumh caah asi. Nawlṭhan ka duhmi cu kan tuahnak in dinnak kan hmuhmi khi siloin Bawipa Jesuh nih a lim cangmi ruangah Amah dinnak a kan hrawmhmi kan zumhnak thawngin dinnak kan hmuhmi hi asi. Biatak cu tuahkhawhmi thawngin dinnak minung kan si kholo, dinnak ka timi sullam cu Pathian he remnak kong ka chimduhmi cu asi. Biakamhlun hmanh ah hin Pathian he remnak an rak hmuh I an tuahnak ruangah siloin an zumhnak ruangah a rak si. Baibal nih a kan cawnpiakmi cu nawlbia a zul dihmi nih cun Pathian he remnak an hmu lai timi asi nain ahohmanh nih an zulkholo I Bawipa Jesuh lawng hi a hramthok in a dongh tiang, a chuahni in a thihni tiang nawlbia tling tein a zulhmi le a Pa nawl a ngaimi asi. Pathian he remnak hi minung nih tuahkhawhmi rak si sehlaw Pathian nih hin A Fapa Bawipa Jesuh Khrih hi vawlei Khamhtu ah a run thlah hngalo. Pathian he remnak tling kan hmuhkhawhnak ding cu van in vawlei ah hin Bawipa Jesuh Khrih, kan zumhnak thawng lawnglawngin asi.
Bawipa Jesuh Khrih kan zumh thawngin dinnak kan hmuhmi hi kan I thokka in kan dongh tiang Bawipa Jesuh Khrih kan zumhnak thawng lawngin kan hmuh zungzal khawh I kan umhmun ah kan um zungzal lai. Bawipa Jesuh Khrih kan zumh caah Khamhtu le Bawipa kan I sermi hi Khamhtu le Bawipa ah kan I serni, nikhat ca lawngah siloin Khamtu le Bawipa kan I serni bantukin nifate in zanfate hi kan Khamtu le kan Bawipa I kan I ser zungzal lawngah a ṭhawnnak taktak in Amah nih a kan umpi lai. A caancaan ahcun minung nih dinnak kong kan chim tikah hin nangmah le keimah nih tuahnak thawngin hmuh dingah kan ruat lengmang, fakpi in na ruahlo ahcun nangmah le keimah nih ṭhatnak tuahmi thawngin dinnak hmuh dingmi khi a lo nain cucu minung tuahnak in hmuhkhawh dingah siloin Bawipa Jesuh Khrih zumhnak thawng lawngin hmuh dingah Bawipa Pathian nih a rak chiahmi asi. Minung nih tuahnak in hmuhkhawh ding asi ahcun porhlawt awk tampi kan ngei hnga, sihmanhsehlaw minung ruahnak le Pathian ruahnak cu tampi a rak I dan caah dinnak taktak asimi Pathian he remnak cu Bawipa Jesuh zumhnak thawng lawngin hmuhkhawhmi ah a rak sernak cu asi.
Bawipa Jesuh kan zumh thawngin Pathian he remnak kan hmuhmi Dinnak cu minung nih tuahmi ruangah siloin Bawipa Jesuh nih kanmah aiah a tuahciami ruangah asi I cu a tuahciami le limciami kan zumh thawng cun Bawipa Jesuh Dinnak kan I hrawm ve I Pathian he airem kho dingah aitlakmi kan si. Pathian he airem dingah aatlakmi kan sikhawhnak dingah cun Bawipa Jesuh nih kan caah a tuarmi le a inmi in kan sualnak le zawtnak vialte cu vailam cungah a phurh I a thihpinak thawngin asi. Bawipa Jesuh Khrih kan zumhnak thawngin Pathian he remnak kan hmuhmi Dinnak hi manfakcemmi leiba vialte champiaknak in hmuhmi asi. Cucu nangmah le keimah nih kan I chamkhawh tilomi champiaknak thawngin asi. Nangmah le keimah nih kan hmuhmi Dinnak, Pathian he remnak hi kan zumhnak thawngin asi timi lawngah hram aibumhlo I hram aibunhnak cu van le vawlei serhlan tein Pathian thinlung chungah tinhciami Bawipa Jesuh thih, teminnak hin asi. Pathian he remnak kan hmuhmi dinnak cu Bawipa Jesuh nih a zungzal in Pathian nawl a ngaihnak le thihnak tiang a innak thawngin asi. Biathli kan chim hmanh lai: Bawipa Jesuh Khrih thihnak in a thawh hi A Pa nawl a rak ngaih zungzal caah le sualnak pakhat hmanh a rak tuah ballo caah asi. Biatak cu Bawipa Jesuh nih hin a Pa nawlngailo in Adam le Eve bantukin rak nung ve sehlaw thihnak in thawhter asi hngalo. Thihnak in thawhter asinak, hmelchunhnak cu Pathian sinah nunnak in pekchanhmi raithawinak hi dotlaklonak zeihmanh umlomi, cohlang tlak in a thiangmi nunnak thisen in pekmi raithawinak asi caah asi. Halleluijah. Bawipa Jesuh min thangṭhat si ko seh.
Nunnak in pekchanhmi, a thiang in cohlantlak raithawinak nih Bawipa thinlung chungah akha in akhami kan sualnak vialte, kanmah tein kan I chamkhawhlomi cu Bawipa Jesuh Khrih thisen nih a kan champiak khawh I a kan hnawtpiak khawh. Halleluijah. Pathian thinlung chungah hma bantukin a fakmi le philhawk le hlawnhawk a ṭhalomi kan sualnak tuanbia vialte cu a nunnak in pekchanhmi raithawinak nih a kan thianpiak khawh I hlawnhpiak dih cikcek kan si. Pathian thinlung chungah hma bantukin a fakmi le a khu I a khumi kan sualnak thianhpiak le hlawnhpiak in cinkenpiak kan si tilo ti hmelchunhnak a langhtertu cu Bawipa Jesuh Khrih thihnak in a thawhṭhannak nih hin a langhter. Bawipa Jesuh Khrih hi thihnak in thoṭhan hlah sehlaw cu kan sualnak vialte ngaihthiam kan si timi aamahkhan zeihmanh aum hngalo. Biatak cu Bawipa Jesuh, thihnak in thawhṭhannak nih hin a nunnak in pekmi raithawinak cu cohlan asi lawng siloin nangmah le keimah caah a nunnak in pekmi raithawinak cu cohlan asi cang tinak asi I cu lawng hmanh siti loin kan sualnak vialte thianhpiak le hlawnhpiak kan si dih cang tinak asi. Kan sualnak ngaihthiam kan si cang timi kan zumhmi hi pakhat hmanh nangmah le keimah hnahnawhtu umtilo dingin hlawnhpiakmi le cinkenpiak tilomi asi. Ngaihthiam na si ahcun na tuanbia hlun cu a tlau cang I aum tilo ti cu cinkenpiak na si tilo caah asi. Kan sualnak vialte hnawtpiak le hlawtpiak kan si dih cang timi nih a chimmi cu Pathian he kan I rem kho cang tinak asi.
Bawipa Jesuh nih vailamcung ah a limmi le thihnak in a thawhṭhannak nih hin Pathian he remtlak ah a kan ser cang I Pathian he remtlak a kan ser cangnak cu kan zumh thawngin Pathian he remnak, Dinnak kan hmuh cang ka ti lengmangmi cu asi. Pathian he kan I remnak cu Bawipa Jesuh nih a inmi thawngin asi I nangmah le keimah caah a thlahmi fapa Jesuh zumh le kan cungah a kan limpiakmi zumh thawngin kan hmuhkhawhmi Dinnak, Pathian he remnak cu asi. Sihmanhsehlaw cutlukin a tampi dawtnak he a langhter cang ko nain micheu nih cun an zumh duhlo caah a sualnak chungah an thi peng ko. Bawipa Jesuh nih hin vawleicung minung vialte caah a thi in a thoṭhan ko nain a zum ve rihlomi caah cun Pathian fale nih kan hmuhmi Pathian he remnak(Dinnak) cu an hmu kho ve lo, an hmuhkhawhlonak a ruang cu a thlahmi a Fapa Bawipa Jesuh an zumhlo caah asi.
Pathian he kan I remkhawhnak dingah cun Bawipa Jesuh nih a fakbikmi thihnak le ningzahnak in Pathian he chikhat ṭhennak tiang a arak ing. Pathian fale nih kan zumhnak thawngin kan hmuhmi Dinnak, Pathian he remnak hi kan zumhka in kan zumh hnu zongah Bawipa Jesuh Khrih thawngin hmuh zungzalmi asi. Dinnak timi biafang hi Pathian he remnak asi timi kan hmuhchihlo ahcun kanmah nih zuamnak le tuahnak in hmuhmi ah na rel zungzal ko lai. Nangmah le keimah nih tuahkhawhmi ah kan rel chung paohpaoh cu Bawipa Jesuh Khrih nih a limciami lengah kan um tinak asi hnga. Biatak cu Bawipa Jesuh nih a limcangmi Pathian he kan I remkhawhnak ding Dinnak cu kanmah nih tuahnak in hmuhkhawh dingah Pathian kan Pa nih chiahmi siloin Bawipa Jesuh nih tuahpiakmi thawngin hmuhkhawh dingah a rak ruahciami le khanciami asi. Biatak cu minung nih tuahkhawhmi lengah aum caah asi, mizei hmanh nih tuahkhawh dingmi asilo caah a Fapa Jesuh in a kan tuahpiakmi asi I cucu nangmah le keimah nih Bawipa Jesuh Khrih kan zumhnak thawng lawngin hmuhmi Dinnak, Pathian he kan I remkhawhnak cu asi. Pathian he kan I remkhawhnak hi kanmah nih tuahmi cungah sisehlaw porhlawt awk kan ngei cio hnga…
Pathian he remnak kan hmuh hnu, Dinnak in cohlan kan si hnu zongah nifate Bawipa duhning in kan nunkhawhmi le a nawl kan ngaihkhawhmi zong hi kanmah tuahkhawhmi ruangah siloin kan chungah aum I rian a ṭuan zungzaltu cu Pathian Thlarau thawngin asi. Pathian kan dawtkhawhnak le Pathian nawl kan ngaihkhawhnak in Pathian cungah zumhawktlak nun kan ngeihkhawhnak hi kanmah ṭhawnak le zuamnak ruangah siloin Thiang Thlarau a kan toihmi thawngin asi. Nifate Thiang Thlarau he hawikomhnak kan ngeihmi le nifate Baibal kan relkhawhmi in nifate Pathian Bia kan ngaihkhawhmi hna hi Thiang Thlarau nih kan chungah duhnak in a kan hruai caah asi. Cucaah pei a hramthok in a dongh tiang Bawipa Jesuh Khrih zumh thawngin Dinnak minung kan si I Pathian he airemmi kan si ka tinak kha asi cu. Bawipa Jesuh sin ka um zungzal tik zongah kan I porhlaw dingmi cu Bawipa Jesuh nih a kan inpiaknak limpiakmi le Amah umpinak thawng lawnglawng in zeizong vialte rian lim asimi hi asi zungzal ko lai. Amen….
Pathian he remnak kan hmuhmi, Dinnak hi a hramthok in a sin kan phak tiang Bawipa Jesuh nih lim cangmi le tuahpiakmi in Amah kan zumhnak thawng lawnglawng in asi zungzal lai. Amah belte Pathian he remnak kan hmuhmi, Dinnak hi Bawipa Jesuh Khrih zumhnak in hmuhmi asi kan ti I Bawipa Jesuh Khrih Khamhtu le Bawipa kan I ser hnu ah duh paoh in kan nun rih ko nain Pathian remnak kan hmu cang tiah kan I ruahmi tu cu kanmah le kanmah kan I hlen bia asi. Pathian he remnak a hmu cangmi hna le Dinnak nun taktak a hmu cangmi hna cu anmah caah nung tiloin an caaah a thimi Bawipa Jesuh caah kan nung cang. Pathian he remnak, Dinnak kan hmuhmi hi zumhnak in kan hmuhmi asi nain cu zumhnak in kan hmuhmi Pathian he remnak, Dinnak cu Pathian he remnak kan hmuhhlan I kan nunhlun in nung lengmang dingah siti loin Pathian he airem cangmi, Dinnak nun, nunthar nun in kan nung cangmi khi Pathian he remnak a hmu taktak cangmi nun cu asi. Pathian he airem cangmi nun, Dinnak nun na ngeih cang ahcun nunhlun an lo lai I nunthar in na nung lai. Pathian he remnak, Dinnak nun a hmu cangmi hna cu Bawipa Jesuh kan zumh thawngin kan co bantukin ka co hnu zongah Bawipa nih nung uh timi Pathian he rem zungzal in Dinnak in kan nung ve timi hi chapchih ka duh.
Pathian Pennak cu Thiang Thlarau nih pekmi Dinnak le Daihnak in Lawmhnak hi asi. Biatak cu Pathian Pennak zong hi Bawipa Jesuh asi I Dinnak in Dawtnak le Daihnak in Lawmhnak zong Bawipa Jesuh hrimhrim hi asi. Bawipa Jesuh nih ka Pennak le ka Dinnak kawl hmasa u, tiah a kan fialmi hi Uknak kawl khi siloin Uktu Pa Bawipa Jesuh, Amah hrimhrim hi ka kawl u tiah a kan fialmi asi. Pathian Pennak cu Pathian Uknak timi a sullam asi I Bawipa Jesuh nih Pathian Pennak kawl a kan fialmi cu Pathian Uknak hi siloin Pathian Pennak chungah Uktu Pa asimi Amah, Bawipa Jesuh hrimhrim hi asi. Pathian Pennak chungah Uktu umlo in Uknak cu santlaihnak a ngeihlo caah le Uknak cu Uktu Pa ṭhawnnak Umlo in hmual a ngeilo caah Pathian Pennak cu ṭhawnnak le upatnak he hmual a ngeihtertu cu Bawipa Jesuh hrimhrim hi asi I Bawipa Jesuh hi Pathian Pennak le Pathian Pennak I Uktu Pa cu asi. Cucaah Bawipa Jesuh nih Pathian Pennak Thawngṭha a chim hmasabik ah a chimmi cu Pathian Pennak a nai cang(nan sinah a phan cang) caah nan sualnak mertak hna u tiah a ti hna, a rak chimduhmi cu Pathian Pennak, Keimah nan sinah ka phan cang timi hi asi. Biatak cu Pathian Pennak nan sinah a phan cang a ti hnawhchan taktakmi hi Uknak le dinnak khi chimduhmi siloin Amah kong Pathian Dinnak le Pathian Pennak asi hrimhrimmi khi a chimduhmi cu asi. Pathian Pennak nan sinah a phan cang tiah a timi sullam cu Keimah hi Pathian Pennak le Pathian Dinnak cu ka si I Keimah Pathian Pennak le Pathian Dinnak cu nan sinah ka phan cang tinak khi asi.
Bawipa Jesuh nih ka Dinnak kawl u tiah a kan fialami zong hi nangmah le keimah nih kan tuah dingmi le tuahkhawh dingmi dinnak hi chimduhmi siloin Dinnak taktak asimi Minung, Bawipa Jesuh taktak hi Dinnak minung, Pathian Dinnak cu asi. Pathian Dinnak kawl fial kan simi hi minung nih kan ruahmi le tuahkhawhmi dinnak hi kawlfialmi siloin Pathian hrimhrim nih kanmah Dinnak ah a rak thim cangmi a Fapa Jesuh Khrih hrimhrim hi Pathian Dinnak ding caah a rak thim cangmi le kawlfiakmi Dinnak cu asi. Pathian Pennak kan kawl kan ti zongah Pathian Dinnak kan kawl kan ti zongah Bawipa nih nan kawl lai tiah a rak kan fial taktakmi hi a nung I a cawl kho I ṭhawnnak he a khat I zungzal Nunnak hram asimi Bawipa Jesuh, Amah hrimhrim hi kawlfialmi cu asi ko. Biatak cu Bawipa Jesuh ngeihlo in dinnak kan ngei kan timi le Pathian Pennak chungah kan um kan timi cu pakpalawng asi ko hnga. Bawipa Jesuh Khrih hi kan chungah Dinnak le Daihnak, Dawtnak le Lawmhnak in aum lawngah Pathian Pennak cu hmual a ngeimi le sullam a ngei taktakmi Pathian Pennak cu asi.
Pathian Pennak hi Bawipa Jesuh aitello ahcun hmualngeihnak zeihmanh a ngeilomi vawlei pennnak men bantuk asi ko hnga. Sihmanhsehlaw Pathian Pennak le Pathian Dinnak cu Bawipa Jesuh asi caah le Bawipa Jesuh cu Pathian Pennak chung I aum caah Pathian Pennak cu ei le din men asilonak asi. Cucaah Pathian Pennak cu Bawipa Jesuh asi caah le Pathian Pennak chungah Bawipa Jesuh aum caah Ṭhawnnak in a khatmi Pennak le Dinnak in a khatmi Pennak asi I Diahnak in a khatmi Pennak le Dawtnak le Lawmhnak in a khatmi Pathian Pennak asi. Bawipa Jesuh nih kawl a kan fialmi Dinnak cu Pathian Dinnak asimi Amah hrimhrim asi caah Amah kha na hmuhhlan tiang na kawl I na hmuh I na ngeih tikah cun Pathian Dinnak(Bawipa Jesuh) taktak asimi Dinnak kha na ngeih lai I vawlei cung na nun chung vialte dinnak in nan nung lai. Dinnak in na nunmi nunning cu minung duhmi dinnak le Pathian duhmi dinnak in nan nung lai nain Pathian nih duhmi dinnak le minung nih duhmi dinnak in na nunkhawhnak cu na kawl I na hmuh in na ngeihmi Bawipa Jesuh, Pathian Dinnak hrimhrim asimi Dinnak na chungah aum ruangah na nun chung vialte dinnak in na nun khawh a rak si. Halleluijah. Bawipa Jesuh Min thangṭhat si ko seh.
Bawipa Jesuh Khrih zumh thawngin kan hmuhmi Pathian he remnak, Dinnak kan ti lengmangmi zong hi nangmah le keimah nih kan ruahmi dinnak, minung nih tuahkhawhmi cungah dinnak khi siloin Bawipa Jesuh lawnglawng nih pekkhawhmi Dinnak, Amah hrimhrim hi Dinnak, Pathian Dinnak ka ti lengmangmi cu asi. Pathian he remnak, Dinnak kan hmuhmi hi ziaza le nunzia hi siloin Anungmi Pathian Fapa Jesuh Khrih, Pathian Dinnak Amah tu hi kan hmuhmi cu asi. Anungmi Pathian Fapa, Pathian Dinnak na ngeih hnu ahcun Pathian nih duhmi le lawmhnakmi dinnak nunzia zong na ngei lai I cucu na chungah a nungmi Pathian Dinnak, Bawipa Jesuh thawngin asi ko lai. Pathian duhning in kan nunkhawhnak le Pathian kan lawmhter khawhnak hi zumtu nangmah le keimah cungah aum ahcun porhlawt ding kan ngei cio hnga, a taktak le ngaingai ahcun Pathian duhning in kan nunkhawhnak le Pathian kan lawmhter khawhnak hi a hramthok in a dongh tiang Pathian Dinnak taktak asimi Bawipa Jesuh kan chungah a nun caah le aum caah asi. Pathian he kan I rem zungzalnak le Pathian hmaiah miding, dinnak minung ah rel kan si zungzalnak cu Dinnak taktak asimi Pathian Dinnak, Bawipa Jesuh kan chungah a nun caah Pathian he kan I rem zungzal I dinnakmi tiah auh kan sinak cu asi.
Pathian Pennak cu Thuhmi Rothil bantuk asi timi zong hi Thuhmi Rothil taktak, zeizong vialte zuar le kaltak in cawk le fuh a phumi cu Bawipa Jesuh Khrih lawnglawng asi. Pathian Pennak cu Thuhmi Rothil Bantuk asi a ti tikah hin Pathian Pennak hi Rothil bantukin cawkkhawh taktakmi le hmuhkhawh taktakmi asilo. Thuhmi Rothil bantukin hmuhkhawhmi taktak cu Pathian Pennak taktak asimi Bawipa Jesuh Khrih hrimhrim hi asi. Biapi asimi cu vawleicung minung vialte nih lungvar mansung le rothil kan kawl bantukin Bawipa Jesuh hi hmuhhlan le tonhlan tiang kawl a phucemmi cu Amah lawnglawng asi caah Thuhmi Rothil bantukin ka kawl u tiah a kan cawmpiaknak asi. Lungvar Mansungbik bantukin le Thuhmi Rothil bantukin kawl zungzal dingmi hi Pathian Pennak asimi Pathian Dinnak, Bawipa Jesuh Khrih lawnglawng hi asi. Bawipa Jesuh kawl I ngeih dingah pei vawlei cungah ka rak chuah hi asi ko cu timi hi thei cio usihlaw minung vialte nih kan kawl hmasacem dingmi hi Pathian Penak le Pathian Dinnak asimi Bawipa Jesuh lawnglawng hi kan kawl hmasa zungzal hnga. Biatak te asi: Pathian Pennak le Pathian Dinnak asimi Bawipa Jesuh hmuhhlan le ngeihhlan tiang kawl zungzal dingah le hmuhhnu le ngeihhnu zong kawl zungzalnak in a duhnak zulh dingah le a nawlngai dingah sermi le khamhmi pei kan si cu…
Bawipa Jesuh nih biapituk ah a chiahmi cu zeidang vialte hlanah le zeidang vialte hnakin Pathian Pennak le Pathian Dinnak asimi Keimah hi na ka kawl hmasa dingmi asi timi hi asi I cucu na kawl tikah Thuhmi Rothil le Lungvar Mansung na kawl bantukin na ka kawl lai. Na ka hmuh tikah na ngeihmi vialte hlawtsian in le na nunnak tiang pek sian na ka duh in na ka dawt lai tiah cahtak kan si. Bawipa Jesuh nih zulh nan ka duh ahcun nangmah le nangmah naa hlawt lai I keimah hnak in aho hmanh na daw deuh lai lo a timi le Thuhmi Rothil na hmuh tikah na ngeihmi vialte zuar in na cawk lai a ti hnawhchan taktakmi hi Bawipa Jesuh cungah kan ngeih dingmi le kan tuah dingmi a chimduhmi a rak si. Ka chimtawn lengmangmi cu Pathian hi phaisa kan kawl bantukin kawl zungzal usihlaw Pathian cu kan hmuh zungzal hnga I Thlarau in kan rum in kan khat taktak hnga. Thlarau in kan rum taktak ahcun vawleicung chawva le thilri cu chimhaulo in kanmah ta dih an si ko hnga. Thlarau in kan rum taktak ahcun kan ngeihmi cungah lungriam tein nun a kan thiamter I ngeihmi cungah lunglawm tein nunthiam hi Bawipa Pathian nih mirum atimi hna cu kan si. Thlarau in kan rumlo caah le Thlarau in kan khahlo caah kan duhbikmi le kan kawlbikmi hi Bawipa Jesuh siloin vawlei thil lawngte an sinak a rak si. Thlarau in kan rum taktak rihlo caah vawlei thilri kan herh zungzal le kan kawl zungzalnak hi asi. Thlarau in rum in khat usihlaw rumchin kan duhdingmi le khahchin kan duhmi cu thildang siloin Bawipa Jesuh in rum le Thlarau in khah hi asi ko hnga. Nihin ah rum le khah na duhmi Pathian asi rihlomi khi na khuaruah rak har hlah, a ruang cu Thlarau in na rumballo caah le Thlarau in na khahballo caah asi. Phundang in chim ahcun Pathian thawtnak na tep ballo caah asi. Pathian thawtnak cu tep bal law cu Pathian kawllo in le Pathian duhlo in cun na nung kho bal lai lo. (Mat 6:33, 13:44-46, Rome 1:16-17, 3:22, 4:3-13-25)
