Bread of Life

Minung vialte hi Pathian he Jesuh Khrih thawngin aipeh ding le hawikomhnak ngei ding in sermi le khamhmi kan si dih. Cucaah cun Pathian kan Pa le Bawipa Jesuh he hawikomhnak in Thiang Thlarau he umttinak cu zumlotu caah si loin zumtu ca, khamhnak a hmu cangmi caah asi.

Pathian Bia hi kan rel deuhdeuh i ka duh deuhdeuh, kan ruah deuhdeuh ah hin a tthawng chinchin i a thaw chin lengmang. Minung kan si caah tlamtlin lonak tampi a ngeimi le chambaunak tampi a ngei ciomi kan si. Cu chambaunak le tlamtlin lonak kan ngeihmi hna ruangah hin Pathian nih kan nun chung vialte nan ttuan lai tiah rian a kan pekmi hi kan lim kho sual lai lo ti cu kan phang cio lai dah. Ahleiin Pathian nih Amah rianttuan dingah a kawhmi hna kan caah hin asi khun.

Zumhnak in ka unau taktak asimi, nangmah sin hrimhrim ah thazang peknak le forhnak ca ka van ttial. Ka ttialmi hi tawite asi ko caah a dongh tiang na rel lawng si loin a hodah ka si ti hngalh bu tein na rak relnak lai kan nawl ko. Vawlei asi caah kan hmai i a ummi thil tampi nih na lung in pialter hlah seh, tuah na duhmi tampi an um ko hmanh ah na chungah a nungmi Thiang Thlarau chimnak le fialnak tuin zeizong vialte hi tuah si ko seh.. Nihin tiang hrimhrim hi zeicem dah na tuah le zei na tuah ah dah na di a riam bik. Rawlulh thla na cam lio bantukin Cathiang nih an thawt rih maw?

Maw Bawipa, ka nunnak nih an ngai, an ngai taktak si.
Maw Bawipa, ka thlarau nih an hlam, an hlam hringhrang.
Sazuk nih rial ti dai a ngaih bantukin maw Pathian nangmah cu kan ngai.
Sazuk nih rial ti dai a dinnak hmun te hi ti dai a ngaih caan paoh ah a fuh lengmang.
Maw Bawipa, Nangmah kan ngaih zungzal caah Na sinah le Na hmaika hrim ah ka ra zungzal.
Maw Bawipa, ka ngai taktak ee, ka ti ahal tuk i ka dar a car dih.
Maw Bawipa, Nangmah lo cun ka nung kho lai ka zum lo.

Bawipa thawngin ka unau asimi Nangmah sinah ka lungah a um ngaingai mi Paul bia hi i ruahtti usih ti ka duh. Rak ka ruahpi ve law na hmuhning zong rak ka chim ve te muh.

Hmunzakip ah ai tthenmi ka miphun vialte sinah Pathian bia, biatak le nunnak hram asimi Khrih Thawngtha ka rak in hrawmh tthan hna. Biatak tein na rel i na zumh ve ko ahcun luatnak na hmu taktak ko lai. Thawngtha kan ttialmi hi a reltu na caah cun sullam a ngei hrim lai i luatnak tling cu na hmu hrim lai tiah Bawipa Jesuh ka zumh i kaa bochan ko. Biatak cu sualnak kan tuahlo ruangah le kan tthat ruangah khamh kan co si loin khamhnak kan hmuh cang ruang tu ah hin sualnak kan tuah ti lo le thatnak kan tuah khawh arak si deuh.

1. Maw ka Pathian, Ka chuah hlan in na rak ka hmuh diam cang, na rak ka thim diam cang, ka min cu na ca uk chungah khumh le ttial an rak si diam cang.
2. Ka ca i na sermi ni hna cu na cauk chungah an i khumh diam cang.

Keimah le keimah kaa theihka in nihin ni tiang ka nuning hi ka ruah, ka tuak lengmang tikah zeitluk in dah asualmi le fihnung ka si hi kaa hmu chin lengmang. Keimah te lawng hmanh in ka kong ka ruah ah hin ka ning a zaak mi sualnak tampi ka ngei. Cucu mi nih an chimmi chungin si loin keimah le keimah ka hmuhmi chungin an si. Cu lawng si loin minung zeizat remruam dah an lung ka hei fahter hna i an ngeih ka hei chiatter hna hnga. Ka sualnak vialte hi ruah tikah hih ttih a nung tuk i thinphang asi i thling hna an za.

Pathian bia lawng hi kan damnak le lawmhnak le hnangamnak aphakpi khotu taktak cu asi ko. Nunnak thawngttha ka rak in hrawmh tthan hna! Bawipa nih daihnak le lawmhnak tlingkhit khet in Amah nan zumh ruangah in pe cio ko hna seh.

1 PETER 4:2
Cucaah atu thawk in, hi vawlei cung i nan nun chung cu, minung duhnak kha si ti loin Pathian duhnak tu kha i ukter cang u.

Atang i Bawipa kan Pathian nih a chimmi bia hi ka rel tikah ka lau ngaingai. Bawipa nih a chimmi hna chungah hin kaa tel ve sual hnga maw tiah minute pakhat deng ka van i check i khua ka ruat.. Nang zong van i ruat ve law zei nai ti hnga dek. Biapi asimi cu kanmah le kanmah attha i kan i hmuh hi biapi si loin Bawipa nih a ttha in a kan hmuh tu hi biapimi cu a rak si deuh.

Nihin kan vawleipi hi zoh ah ttih a nung chin lengmang. Lungthin tak chung ummi asi lomi nun kan cawng chin lengmang! Kanmah a hrintthan cang ai timi hna zong kan kut kan i tlaih ahcun mirh bu tein kan i tlai nain kan thinlung cun remlonak in kan khat. Cucu asi awk hrim asi loh.. kan kaa nih biathlum a chim khawh ahcun kan thinlung zong thlumchih ko seh, a leng in cawnnak lawng si ti loin thinlung in a luangmi nunzia tu hi Zumtu Pathian fale cu kan si bak awk asi...

Minung vialte nih taksa nunnak kan ngeihmi le thih hnu thawhtthan nunnak kan ngeih dingmi vialte a kan petu hi Pathian asi. Minung vialte a tu i kan nung kan ti lengmang mi hi kan taksa a nung ruangah si loin kan chungah thlarua a um rih caah kan taksa in kan nun rihmi tu asi. Minung an thi kan ti lengmang mi khi an thlarua a chuah cang caah an thihnak asi. Biatak cu minung vialte hi thlarau kan chungah aum lo paoh ahcun athimi kan si dih ko.

Nihin zumtu vialte le thawngtha chimtu vialte nih hin a ho kong dah kan chim i zei kong dah kan chim timi hi ruattti ding in kan sawm hna. Thawngtha chim fial kan si taktak mi hi zeidang kong si hrimhrim loin kan caah athi i atho tthanmi Fapa Jesuh Khrih kong hi Thawngtha nan chim lai tiah fialmi cu asi. Kan kenmi Thawngtha cio ah hin Bawipa Jesuh kong an si lengmang awk an si… 

Laimi phun vialte nih hin kan miphun hi kan dawt cio in kan holh zong hi kan duh cem cio ko lai dah. Mah miphun le holh duhding le dawt ding zong hi Bawipa nih a kan duhpiak ciomi asi lai zong ka zumh. Miphun dang huat ding ti duhnak si loin mah holh le miphun lawng hmanh ttan si loin kanmah le kanmah minung hrimhrim hi ai daw ding le aitthi, aila ding hrim kan si. Cucu Pathian nih a kan duhpiakmi asi lai zong ka zumh ko. Nain nihin Kan fale le mino cheukhat hna nih miphun dang holh an duhtukmi le an uar tukmi nih hin khua tampi a ka ruatter tawn.

Minung vialte nih kan herh hmasa bikmi hi chawva asi lo i rian zong asi loh. Nupi le va neih hmasa le fanu le fapa ngeih hmasa zong arak si lo i fimthiamnak ngeih hmasa zong arak si tthiam lo. Minung tampi nih cun mah hi kawl hmasa ding timi zong tampi a um ko lai nain Bawipa Jesuh Khrih nih nan kawl hmasa hrimhrim lai a kan timi cu hihi asi. Pathian cu na thinlung dihlak in na kawl ahcun na hmuh ko lai tihi asi.

Nihin zumtu vialte kan dihlak ning hin ahodah Jesuh Khrih hi asi tiah ihal cio usihlaw kan chim cio dingmi cu Pathian fapa, van in vawlei ah minung vialte caah Nunnak Petu Pa asi tihi kan ti cio hnga. Sihmanhsehlaw na lehmi hi nangmah nih tonmi le a tak in nan i hawikomh hnu ah na chimmi asi lo ahcun mi nih chim chinmi, Baibal nih an chimhmi na chimmi tu khi asi. Cucu Jesuh Khrih nih "aho asi na ka ti ve dah" tiah an hal duh taktak mi khi asi loh.