LEVITICUS 24
Meiinn Zohkhenhnak
(Exo 27.20-21)
1 Bawipa nih Moses cu a chawnh i, 2 “Israel mi hna cu, oliv chiti a fimmite, van awk i ṭhuatmi cu, meiinn kha alh camcinternak caah, nangmah sin i rak put awkah nawl pe hna. 3 Tonnak thlam chung biakamnak puanzar lengah khan Aaron nih a ningcang tein zanlei in zinglei tiang Bawipa hmaiah a chiah camcin lai; mah hihi nan techin fapar tiangin nawlbia a si lai. 4 Sui thiang in sermi meiinn tung cungah khan meiinn hna cu a ningcang tein a chiah camcin hna lai.
Hunmi Changreu
5 “Cun changvut dip na lak lai i changreu hlum hlei hnih in na ser lai; hlum khat ah ephah cheu hra cheu hnih lengmang a si lai. 6 Sui thiang cabuai cungah cun tlang hnih in na chiah hna lai, tlang khat ah paruk lengmang in. 7 Cun a tlang veve ah cun a thiangmi frankinsen na chiah lai, Bawipa sin i mei in pekchanhmi hngalh camcinnak ca changreu he cun an kai ṭi lai. 8 Sabbath ni fate Aaron nih a ningcang tein Bawipa hmaiah cun, Israel mi hna airawl in zungzal biakamnak caah a chiah camcin lai. 9 Cun mah cucu Aaron le a fapa hna caah a si lai i hmunthiang chungah khan an ei lai, zeitintiah Bawipa sinah mei in pekchanhmi lakah khan a caah a thiang bik, a hmuh camcin awk vo cu a si,” tiah a ti.
Vawlhpamh Dantatnak
10 Israel minu pakhat i a fapa, a pa Izipt mi a simi cu Israel mi hna lakah aa chawk i Israel minu fapa cu le Israel mipa pakhat cu riahhmun ah cun an i si i 11 Israel minu fapa nih cun Pathian Min cu a vawlhpamh i chiat a serh. Amah cu Moses sinah an ratpi. A nu min cu Shelomith, Dan phun chung mi Dibri fanu a si. 12 Bawipa duhnak annih sin i thanh a si hlantiang thong chungah an chiah.
13 Cun Bawipa nih Moses cu a chawnh i, 14 “Chiat a sertu cu riahhmun lengah chuahpi law, amah biachim a theitu vialte nih a lu cungah an kut chia hna seh, cun aa pummi vialte nih lung in chep hna seh. 15 Cun Israel mi hna cu, a Pathian chiat a serhtu paoh nih cun amah a sualnak kha a in lai. 16 Bawipa min a vawlpammi cu thah a si lai; aa pummi vialte nih lung in an cheh lai: mipem a si zongah, laikhat mi a si zongah, Min cu a vawlhpamh ahcun thah a si ko lai, tiah chim hna,” a ti. 17 “Cun, mi a thatmi cu thah a si lai. 18 Saṭil a thatmi nih a cham lai, nunnak caah nunnak. 19 Mi pakhatkhat nih a innpa kha a mui a chiatter ahcun a tuah bantukin a cungah tuah a si ve lai, 20 ruh khiah caah ruh khiah ve, mit caah mit ve, ha caah ha ve; mi kha a mui a chiatter bantukin chiatter a si ve lai. 21 Saṭil a thatmi nih a cham lai; mi a thatmi cu thah a si lai. 22 Mipem ca le laikhat caah phungbia pakhat nan ngei lai tiah chim hna; zeitintiah keimah cu Bawipa nan Pathian ka si,” tiah a ti. 23 Cu bangin Moses nih Israel mi cu a chimh hna i chiat sertu cu riahhmun lengah an chuahpi i lung in an cheh. Bawipa nih Moses nawl a pek bangin Israel mi nih an tuah.
LEVITIKAS 25
Sabbath Kum le Jubili Kum
(Deu 15.1-11)
1 Bawipa nih Moses cu Sinai Tlang cungah a chawnh i, 2 “Israel mi hna sinah hi bangin va chim, Nannih kan pekmi hna ram chungah nan luh tikah, cu ram nih cun Bawipa caah sabbath a ulh awk a si lai. 3 Nan lo chungah kum ruk chung thlaici nan thlak lai i kum ruk chung nan mitsur dum cu nan thlawh lai i a theitlai nan pumhkhawmh lai; 4 sihmanhsehlaw a kum sarihnak kum ah cun ram caah dinh zirziarnak sabbath a si lai, cucu Bawipa ca i sabbath cu a si lai; nan lo ah thlaici nan thla lai lo i nan mitsur dum zong nan thlo lai lo. 5 Nan rawl hlih cu nan ṭuan hna lai lo i nan sersiam lomi mitsur ruang i mitsur thei cu nan lo hna lai lo; mah kum cu ram caah cun dinh zirziarnak kum a si lai. 6 Cu ram sabbath nih cun rawl an pek hna lai, nanmah caah siseh, nan salnu nan salpa hna caah siseh, man pekmi sinum siseh, nannih sin i a ummi mipem caah siseh; 7 nan saṭil ca le nan ram chung i a ummi saram ca zongah ram nih a voimi vialte cu rawl caah a si lai.
8 “Cun sabbath kum timi pasarih hna kum cu na rel lai, pasarih let sarih kum, sabbath pasarih hna kum cu nan caah kum sawm li le kum kuanak a si lai. 9 Cun thla sarih thla ni hra ni ah cun a thangmi muko kha nan chawhpi lai; remnak ni ah cun nan ram chung vialte ah muko cu nan tum thluahmah lai. 10 Cun kum sawm nganak kum cu nan thianter lai i cu ram chung khuazakip ah, a chung i a ummi vialte kha, luatnak nan thanh hna lai; nan caah jubili a si lai, nannih nan thil cio le nan chungkhar sin cio i nan kir caan cu a si lai. 11 Cu kum sawm nganak kum cu nan caah jubili a si lai; cu kum ah cun thlaici nan thla lai lo, amah tein a khomi zong kha nan ṭuan lai lo, nan ser siam lomi mitsur ruang mitsur thei zong kha nan pumkhawm lai lo. 12 Zeitintiah jubili a si; nan caah a thian awk a si; lo chungin a voimi lawng kha nan ei lai.
13 “Jubili kum ah hin mah le thil sin cio ah kir ṭhan nan si lai. 14 Nan innpa sin i nan zuar ah siseh, nan innpa sin i nan cawk ah siseh, pakhat le pakhat nan i hleng lai lo. 15 Jubili hnu a kum zatning paoh in nan innpa sinin nan cawk lai i tirawl a voi kum zatning paoh in nanmah cu an zuarh hna lai. 16 Kum a tam ahcun a man cu nan karh lai, kum a tlawm ahcun a man cu nan ṭhumh lai, zeitintiah tirawl a voining zat cu an zuarhmi hna cu a si. 17 Pakhat le pakhat nan i hleng lai lo, sihmanhsehlaw nan Pathian kha nan ṭih lai; zeitintiah keimah cu Bawipa nan Pathian ka si.
18 “Cucaah ka nawlbia kha nan tuah lai i ka phunglam kha nan ulh hna lai i nan tuah veve hna lai; cucaah hi ram chungah hin him tein nan um lai. 19 Ram nih a theitlai a chuah lai i khim tein nan ei lai i ram chungah him tein nan um lai. 20 Nannih nih, ‘Kum sarihnak kum ah cun zeidah kan ei kun lai, thlaici kan thlak lo i kan tirawl kan pumhkhawmh hna lo ahcun?’ tiah nan ti ahcun, 21 kum ruknak kum ah khan ka thluachuahnak cu nan cungah nawl ka pek lai i kum thum ca in theitlai a chuah lai. 22 Kum riat kum ah thlaici nan tuh tikah, rawl hlun kha nan ei ko lai; kum kuanak kum, a theitlai a chuah kum tiang cun, rawl hlun cu nan ei lai. 23 Ram cu zungzal ca cun nan zuar lai lo, zeitintiah ram cu keimah ta a si; zeitintiah nannih cu keimah sin i mipem le khual nan si. 24 Nan comi ram chung vialte ah cun lo kha tlanh ṭhan nan sian lai.
25 “Nan unau a si a fah i a thilri a cheukhat cu a zuar ahcun, amah he aa naih bikmi a rualchan nih a ra lai i a unau nih a zuarmi cu a tlanh lai. 26 Mi pakhatkhat nih tlanhpiaktu a ngeih lo i amah cu a hun i chilhkhah i a tlanhnak ding caah a za a ngeih ahcun, 27 a zuar ri khan kum rel seh law, a zuarhmipa kha a tangmi man zat pe ṭhan seh; cun amah thilri ah cun a kir lai. 28 Sihmanhsehlaw lak ṭhannak ah a za a ngeih lo ahcun, a zuarmi cu a cawtu kut chungah khan jubili kum tiang a tang ko lai; jubili ah cun chuahter a si lai i amah kha a thilri sinah cun a kir ṭhan lai.
29 “Kulh a ngeimi khua chung i inn pakhat cu mi pakhatkhat nih a zuah ahcun, a zuarh hnu kum khat pumhlim chungah a tlanh ṭhan khawh lai; kum khat tlingte tlanhnak nawl a ngei lai. 30 Kum khat tlingte chung i a tlanh khawh lo ahcun kulhmi khua chung i inn cu a zungzal in a tefa hna tiangin, a cawtu ta cu a si lai; jubili zongah khirh ṭhan a si hlei lai lo. 31 Sihmanhsehlaw kulhnak a ngei lomi khuate chung i inn hna cu ram chung i lo bantuk hna ah khan rel an si lai; tlanh khawh an si lai i jubili ah khirh ṭhan an si lai. 32 Sihmanhsehlaw Levi mi hna khua, an covo khua hna chung i inn hna cu, Levi mi nih zeitikhmanh ah an tlanh khawh lai. 33 Cun Levi mi pakhatkhat nih tlanh khawhnak nawl a ngeihmi cu a hman lo ahcun, an covo khua chung i a zuarmi inn cu jubili ah khirh ṭhan a si lai; zeitintiah Levi mi hna khua chung i inn hna cu Israel mi hna lakah an covo an si. 34 Sihmanhsehlaw tlangram chung lo, an khua ta a simi hna cu zuarh khawh an si hnga lo; zeitintiah mah cucu a zungzal an vo a si.
35 “Na unau cu a si a fah i nangmah kha an toh ahcun, nangmah nih na rak cawmken lai; khual le mipem bantukin na sinah a um lai. 36 A miak siseh a karh siseh amah sinin na la lai lo, sihmanhsehlaw na Pathian cu ṭih ko; na unau cu na sinah khua a sak khawh nakhnga. 37 Na tangka kha a karh in na cawih lai lo, na rawl zong a miak in na pe lai lo. 38 Keimah cu Bawipa nan Pathian Kanaan ram kha nanmah pek awk le nan Pathian si awkah Izipt ram chungin an chuahpitu hna ka si.
39 “Cun na unau kha na kiangah a si a fah i amah le amah kha na sinah aa zuar ahcun, sal bantuk cun na hmang lai lo: 40 nangmah sinah amah cu kuli bantuk le mipem bantukin a um lai. Jubili kum tiang an rianh lai; 41 cun nangmah sinin amah he a fale he an chuak lai i amah innchungkhar sinah khan an kir lai i a pupa hna covo ah khan a kir lai. 42 Zeitintiah anmah cu, Izipt ram in ka chuahpimi ka sal an si; sal ah zuar an si lai lo. 43 Amah cu hrang piin na uk lai lo, sihmanhsehlaw na Pathian kha na ṭih lai. 44 Salnu salpa nan ngeih awk hngami hna cu, nan velchum i a ummi miphun hna chungin salnu salpa caah cun nan cawk hna lai. 45 Cun nannih sin i khua a sami phundang mi hna le nan ram i hrinmi an chungkhar hna lak zongin nan cawk khawh hna lai i nan misa an si lai. 46 Nan hnu i nan fapa hna kha, zungzal in co awkah nan roh khawh hna lai; annih cu sal ah nan ser khawh hna lai, sihmanhsehlaw Israel mi nan unau a simi hna cu, pakhat le pakhat hrang piin nan i uk lai lo
A Thihnak Kong A Chim Voi Thumnak
(Mat 20.17-19; Luk 18.31-34)
32 Jerusalem khua leiah khan an hung kal i Jesuh cu an hmaiah khan a kal i a zultu hna kha an khuaruah a har; cun an hnu in a hun zul vemi midang hna kha an thin a phang. Jesuh nih cun zultu pahleihnih hna kha a dang ah aa kalpi ṭhan hna i a cung i a tlung dingmi thil kong kha a chimh hna. 33 A thawh hna i, “Jerusalem khua kan hung phan lai i Mi Fapa hi tlangbawi upa hna le Phungbia cawnpiaktu saya pawl hna kut chungah khan an chanh lai. Annih nih cun, thih awktlak a si, tiin sual an phawt lai i, cun Jentail mi hna kut ah an chanh chin lai. 34 Cu hna nih cun an cawhdeh lai, cil an chak lai, fung in an tuk lai i an thah lai. Cun ni thum hnuah a tho ṭhan lai,” tiah a ti hna.
Jeim le Johan Nih An Halmi
(Mat 20.20-28)
35 Khi tikah Zebedi fapa Jeim le Johan kha Jesuh sinah cun an ra i, “Saya, na kan tuahpiak awk kan duhmi thil a um,” an ti. 36 Jesuh nih cun, “Zeidah kan tuahpiak seh ti nan ka duhmi cu a si?” tiah a ti hna. 37 Annih nih, “A sunglawimi na Pennak chung i na bawiṭhutdan cung i na ṭhut tikah na sinah kan ṭhutter ve law kan duh, pakhat na orhlei kamah, pakhat na kehlei kamah,” tiah an ti. 38 Jesuh nih cun a thawh hna i, “Nan ka halmi hi nan hngal lo. Ka din dingmi hrai hi nan din khawh lai maw? Tipil ka in ding ning hin nan in khawh ve lai maw?” tiah a ti. 39 Annih nih, “Kan ti khawh ko lai,” tiah an leh. Jesuh nih cun, “Ka din dingmi hrai hi nan din khawh ve taktak ko lai i ka in dingmi tipil inning hi nan in khawh ve taktak ko lai. 40 Sihmanhsehlaw ka orhlei kam i ṭhut le ka kehlei kam i ṭhut cu keimah pek khawhmi a si lo. Hi hmun cu Pathian nih a timhpiakmi hna kha a pek ko hna lai,” tiah a leh hna.
41 Hi kong kha a dang zultu pahra hna nih khan an theih tikah Jeim le Johan cungah cun an thin a hung. 42 Cucaah Jesuh nih an dihlak in a auh hna i, “Vawlei cungah cun uktu bawi hna nih an ukmi michia hna cu, a lal in an lalhnawh tawn hna i hruaitu hna nih a uk in an uk tawn hna ti cu nan hngalh. 43 Sihmanhsehlaw nannih cu hi bantukin nan si awk a si lo. Mi ngan si a duhmi cu nan sinum a si awk a si, 44 bawi cem si a duhmi cu nan dihlak sal a si awk a si. 45 Zeicahtiah Mi Fapa hmanh hi, rian ṭuanpiakmi si awkah ka rat ṭung lo, midang rian ṭuanpiaktu si awk le mi tampi tlanhnak ding ca i ka nunnak pek awkah pei ka rat cu,” tiah a ti hna.
Mitcaw Bartimu A Damter
(Mat 20.29-34; Luk 18.35-43)
46 Jesuh le a zultu hna le mibupi cu Jeriko khua kha an phan. Jeriko khua cun an i thawh lioah khin lam pawngah mitcaw Bartimu, Timau fapa kha a ṭhu i thil a hal hna. 47 Nazareth khuami Jesuh a si ti kha a theih tikah, “Jesuh, David Fapa, ka zaangfah tuah,” tiah a au. 48 Mi tampi nih an sik i dai tein um ko, tiah an ti. Sihmanhsehlaw thang chinchin in, “David Fapa, ka zaangfah tuah,” tiah a au chin. 49 Jesuh cu a dir i, “Hei au u,” tiah a ti. Cucaah mitcawpa cu an hei auh i, “Na thanuam ko, tho, an kawh cuh,” an ti. 50 A puan kha a hlonh duak i a pet i Jesuh sinah cun a ra. 51 Jesuh nih cun, “Zeidah in tuahpiakning law na duh?” tiah a hal. Mitcawpa nih cun, “Saya, khua hmuh ṭhan ka duh,” tiah a leh. 52 Jesuh nih cun, “Va kal kun, na zumhnak nih an damter cang,” tiah a ti. Chikkhatte ah khin khua cu a hun hmu i lam ah cun Jesuh cu a zulh.
9 Sihmanhsehlaw atu cu maw Pathian,
na kan hlawt cang i
kan ral nih khan an kan tei cang;
kan ralkap hna kha na kalpi
ti hna lo.
10 Kan ral hna hmaiah na kan zamter i
kan thil kha an i lak.
11 Tuu an thah hna bantukin
an kan thah i
ram dang ah na kan ṭhek dih.
12 Na mi cu man tlawmte ah
na kan zuar i
cu na kan zuarnak ah cun
na miakmi zeihmanh a um lo.
13 Kan cung i na tuahmi kha
kan innpa nih an hmuh i
an kan nihsawh i capo ah
an kan saih.
14 Miphun hna lakah zahpi awk
thil ah na kan ser;
kanmah serhsatnak ah an lu kha
an ka thinhnawh.
15-16 Kan ral hna le a kan huatu hna nih
an ka nihsawhnak le an ka zawmhtaihnak
ka theihmi ruangah hin,
hmaichia in ka um zungzal i
ningzahnak nih a ka khuh zungzal.
17 Kannih nih cun kan in philh lo na le
kanmah he na sermi na biakamnak
kha kan rawk lo nain.
hi thil vialte hi kan cungah a tlung.
18 Na sinah zumhawktlak loin
kan um lo,
Na nawl ngai loin kan um fawn lo.
19 Asinain sahrang lakah na kan kaltak i
a thuk bik muihnak chungah
na kan chiahtak ṭhiamṭhiam.
20 Kan Pathian kha biak kan in ngol i
ramdang pathian sinah thla
kan cam a si ahcun,
21 nangmah nih na hmuh ṭheoṭheo hnga,
zeicahtiah minung lungthin chung
biathli cu na hngalh dih.
22 Asinain thah kan si thluangthluan cu
nangmah ruangah a si i
thah awk tuu bantukin
tuah kan si cu
nangmah ruangah a si.
23 Bawipa, i hlau tuah! Zeicahdah
naa hngilh?
Tho tuah, a zungzal in
kan hlawt hlah.
24 Zeicahdah na kan thuhtak?
Kan inmi temhnak le harnak kha
philh hlah.
25 Vawlei ah na kan hrilh cang;
leidip lakah kan ril ko.
26 Tho law kan bawm tuah!
A fekmi na dawtnak ruangah
kan khamh tuah!
20 Miṭha hna bia cu ngun ṭha bantuk
an si,
sihmanhsehlaw miṭhalo hna lungthin
cu hnawmtam bantuk an si.
21 Miṭha bia nih cun mi tampi
a cawm hna,
sihmanhsehlaw mihrut cu a hruh
ruangah a thi tawn.