Bread of Life

Maw Bawipa na rian ka ttuanmi hnak in Nangmah kan duh deuh... Ka comi thluachuah vialte hnak in Bawipa kan duh deuh.. Bawipa Nangmah kan tlaihchanbik.. Maw Bawipa zeidang vialte hnak in Nangmah kan thim cem... Maw Bawipa rawl thaw hnak in Nangmah kan duh deuh... Rawl hi nunnak asi lo Nunnak cu ka Bawipa Jesuh Khrih Nangmah hi na si... Maw Bawipa kan duh in kan tlaihchan ko ka ti tikah hin ka kaa lawng si loin ka thinlung le ka nunnak zong nih a chimchih cu na hngalh ko ee..

Maw Bawipa ka nunnak hi ka lu in ka ke tiang, ka si ning ka ruah lengmang i nitin tein ka tonmi thilkip le ka ngeihmi na thluachuah kip ka ruah tikah hin nangmah dah ti lo nih cun a ka lawmhter khomi le hnangamnak tling tein a ka pe kho zungzal mi hi zeihmanh an um lo. Maw Bawipa ka nun nih nangmah cu an hlam i ti hal in an hal, vawlei ro nih ti a duh bantukin ka thlarau nih Bawipa an duh. Bawipa nangmah lawng ka thlarau tihal diriamh tertu le nunnak ti pe khotu cu na si. Ka zangfah law na lawmhnak ka hrawmh ve ko, na thluachuah cu ka lakkanh hlah.

Nihin zumtu he zumlotu he kan doh lengmang mi hna hi minung an si tawn. Ahleiin zumtu taktak nih cun kan doh dingmi hna hi minung an si awk asi hrimhrim lo. Kan doh awk hi zawtnak, sifahnak, thintoinak, damlonak, tlamtlinlonak, harsatnak, buainak, siknak hna hi si loin mah hna a chuahtertu satan, khuachiapa tu hi kan doh dingmi cu asi. Biatak cu buainak le remlonak, tthatlonak vialte minung karlak ah a umtertu hi minung kanmah hi si loin mit in kan hmuh khawhlomi satan, khuachia, thlarau chia rianttuannak hna tu an si.

Na ruat bal maw? Minung tampi nih cun sual ngaihthiam hi kan duh dih cio i kan sualnak zong cu Jesuh Khrih thisen thawngin ngaihthiam cu kan si taktak. Amen! Sihmanhsehlaw biatak asimi cu a sual lomi kan um lo caah sual ngaihchihnak tel loin sual ngaihthiamnak hi a tling kho lai maw ti hi asi. Jesuh Khrih nih thihnak in a thawh tthan hnu ah a zultu sin i a chimmi cu Keimah Min in Jerusalem thok in vawlei cung hmunzakip ah sual ngaihchihnak le sual ngaihthiamnak thawngtha nan chimh hna lai ti hi asi. Amen!

Bawipa nih a chimmi cu temhinnak mei chungah kan hneksak hna nain santlailo nan si, hneksak tlak nan si lo ee tiah a ti, cucu si ti hram hlah usih. Zumtu tampi nih kan ruahchih ve a haumi cu zumhnak in ruahchannak ah kan nunnak ah hin kan tak maw, taklo ti hngalhnak ah harnak le temhinnak in hneksak ve kan si tihi kan philh ve lo awk asi. Cu ve bangin kan cung i a tu lio a tlungmi harnak le kan tonmi cio hna zong hi Bawipa nih an kan hneksannak a si kho ko, cucaah a dongh tiang ingkholo si lion Bawipa zumhnak he tei khawh i zuam ko hna usih.

Vawlei cung hmunzakip ah a ummi ka miphun vialte hna Bawipa nih nan umnak hmun cio ah Amah dawtnak thukpi in intheihter chin hna sehlaw biathli in ruah cio ko hna seh. Atu i thawngtha ka ttialmi Vancung Pennak chungah na lut cang maw? timi hi fak deuh in rak ka ruahpi ve tiah kan sawm. Biatak cu Vancung Pennak hi tuahttuannak in le nun thiannak men in kanhmuh khawhmi asi hrim lo tihi voi tampi chim ka duh. Vancung Pennak kan luh khawhnak ding ahcun lamkhat lawng a um i cucu Jesuh Khrih zumhnak lawng bak in asi.

Nihin zumtu hna le cawnpiktu vialte nih kan ngeihmi thinlungput taktak hi zei cemdah asi hnga? Atu i ka van ṭialmi hi Bawipa Jesuh Khrih le Athlahtu Pathian nih an ngeihmi thinlungput taktak cu asi i Bawipa Jesuh Khrih a zum i a ngeimi vialte zong nih kan ngeih ve hrimhrim awk asi. Kan ngeih ve hrimhrim awk asi timi zong in zuanhnawh loin Jesuh Khrih kan chung aum ve bak ruangah Amah bantukin Amah nih a kan pekmi thinlungput he kan ngeihmi thinlung tuin arian kan ṭuan ding asi.

Zumtu tampi hi Bawipa nih a kan thuhtak tawn timi hi kan ruat tawn lo i kan hngal tawn rua lo tiah ka ruah! Bawipa nih a ka thuh tak ko hih timi fiang tein na hngalh ahcun Amah kawl lawng hi a tang ko, caan tampi cu kan hngalh lo caah Bawipa kan kawl ve ton loh.. Bawipa nih a kan thuhtaknak a ruang cu hung ka kawl hna sehlaw an ka kawlnak ah hin ka duhnak tampi hngal hna sehlaw tthang hna seh tihi a kan duhpiakmi asi. Kan hngakchiat lio i bik kan i thuh bantuk khi asi.

Pum cu thlarau loin a thi ti a sullam cu Pathian nih thaw a kan chuah hnawhmi le Amah he loin sermi kan thlarau a um loah cun kan thi i minung cu thaw kan chuah loah cun kan thi ko, cu thaw cu Pathian a rak kan serka i a thaw a rak kan chuah hnawhmi te kha asi. Cu ve bangin cu kan thlarau cu Khrih Thlarau he an i peh lawngah Khamh kan si i Nunnak kan ngei. Aruang cu Adam thok in satan tangah le thihnak nih nenhchihmi kan si cang, (kan thlarau kalnak lam cu hell arak si ko)! Cu hell kalnak lam in a kan luattertu cu Jesuh Khrih asi. Amen!

Pathian nih Israel mi hna he biakamnak thar ka tuah lai a timi cu Jesuh Khrih hi asi i vawlei serhlan in mi vialte Khamhtu dingah Pathian nih a rak timhciami asi . Jesuh Khrih kan zumhnak thawngin kan thinlung chungah Thiang Thlarau cu khua a rung sa i cucu Thiang Thlarau pek kan si kan timi cu asi. Amen! Cucu catlap cungah ttialmi si loin Thiang Thlarau in na thinlung chungah ttialmi le khenhmi asi timi cu asi. Amen... A hlan ahcun phunglam hna hi lengah ttialmi an si i cu ttialmi fial ningin an rak nung i khua an rak sa, an tuah taktak tikah sualnak in an rak luat!

Maw ka miphun vialte hna le ka unau vialte hna, Pathian bia nih hin zeitlukin dah an thawt ve i abia ah hin naa nuamh ve. Pathian a ngei lomi caah cun thawtnak a um bal lai lo i pawpi a ngeilo mi caah cun rawlttam a um ve bal lai lo. Pathian hi kaa lawngin dawt khawhmi Pathian a si hrimhrim lo ee. Bawipa nih kan miphun a kan zangfah i ram tthatnak ah khua kan sa cang hna, tlamtingnak tampi chungah kan nung hna nain kan nganhmi a um i cucu Pathian kan lawmhter lo mi hi asi. Nihin kan sining tein kan nun lengmang ko ahcun tuhnu kumhra ah hin zeidek kan lawh te hnga.

Pathian thawngtha aupitu le ngaitu kannih cio zong nih kan hngalh a herhmi cu Baibal cawnnak kanngeih ah siseh cawnnak ngeilo in Thawngtha kan chim zongah siseh Thlarau tthawnnak le biataknak nih hin a kan zulh zungzal awk asi. Thawngtha chim hi a biapi tuk ko nain Thiang Thlarau tthawnnak nih a hnu in a zulh loah cun ngaitu thinlung ah thlennak zeihmanh a umter lo. Cucaah cun ngeih nuam men Thawngtha hnak in attha deuhmi cu Thiang Thlarau tthawnnak he chimttimi Thawngtha hi a biapi bik.

Vawlei cung minung vialte nih hin kawlmi kan ngei cio i taksa in nun damnak le chawva hi fakpi in kan kawl cio. Thlarau lei nunnak taktak a kawlmi hi cu minung tlawmte taktak kan si. Nihin zumtu ai timi tampi zong nih hin kan kawlmi taktak cu Thlarau nunnak lam lei si loin chawva in tlamtlinnak hi fak deuh in kan zuanhnawh cio ko. Jesuh nih hin chawva a biapinak hi a chim ballo i zungzal nunnak a biapinak tu hi cu fakpi in a chim, minung pakhat nunnak hi vawleipi he a tahchunh.

Nikhat cu a holh kholomi khuachiah nih a tuahmi pa Jesuh Khrih nih a damter i a holh khawh tikah mipi kha an khuaruah a har dih. Sihmanhsehlaw micheu nih an i thawh i khuachia a tthawl khawhnak cu Beelzebul tthawnnak in pei asi ko cu tiah an ti i Pathian Thlarau tthawnnak in a tuahmi asi ti kha an zumh duh lo caah Jesuh Khrih cu Pathian sin in arami khuaruahhar tuah kha an fial. Beelzebul tthawnnak in si loin Pathian Thlarau tthawnnak tuin ka damter mi asi ti hngalhternak caah hi bianabia hi a chim hna.

Fapa Jesuh hi Biatak cu asi i Fapa nih kan luatter an ti lawngah na luat lai. Biatak cu na hngalh lai i biatak nih cun an luatter lai timi hi minung tampi nih kan chim ciomi le ka duh ciomi a si nain biatak na theih i na theihmi biatak kha fiannak in hngalhnak tiang na phanh caah luatnak na hmuh si loin biatak asimi Jesuh he naa ton taktak lawngah luatnak na hmu lai... Bia in chimmi biatak le nun in i biatak nak hi luattertu si loin minung Jesuh Khrih tu hi Biatak le luattertu cu asi..

Dam in nan um cio hna maw? Nan umnak hmunkip cio ah Bawipa nih thluachuahnak in chapchin cio ko hna seh. Zeidah Bawipa nih tuah hna seh ti a kan duh timi hi fakpi in kawl khawh rak i zuam cio ulaw tiah kan sawm hna.. Nai hrawng cu fak ngaiin khua a ka ruahter ngaimi a um i cucu minung hi khua khangtu maw kan si cang i minung khuakhanmi cungah lung a tlinpitu le tlam a tlintertu, bia a ngeitu men hi maw ka Pathian hi asi cang timi hi ka ruahmi cu asi. Minung hi khuakhan cia chung a duhmi le timh tuahnak ngeih chung a duh ngaimi miphun kan si taktak ko.