Tukforhnak & hneksaknak

Tukforhnak hi Pathian Fa Asi rihlomi nih ton zungzalmi asi i Pathian Fa asi cangmi nih Bawipa he thlacamnak in hawikomhnak daithlannak in thlarau thazang der caan ah taksa duhnak ṭhaloin tukforh kan si tawn. Pathian Fa asi rihlomi cu khuachia ta an si caah khuachia nih atuahmi cu ṭhatlonak lawngte asi caah amah ta asimi zong ṭhatlonak, taksa duhnak, lungthin ṭhalomi phunphun, mah le mah thah duhnak, mi thahduhnak, firduhnak, nupa siduhnak, zu, kuak, khaini, hmawmmi le zukmi phunphun tuahduhnak in nifate an chungah aummi duhnak ṭhatlo ningin atukforh zungzal hna. Tukforhnak kan timi hi taksa duhnak ṭhalomi le thinlung ṭhalomi he pehtlai deuhmi chungin tukforh kan si i cucu khuachiapa sin in arami tukforhnak asi. Tlukforhnak cu zeitikhmanh ah Bawipa sinin arami asi ballo i khuachiapa sinin kan mah nih duhnak ṭhalomi kan ngeihmi hmangin a kan tukforh tawn. Micheu nih zu hi ka duhlo nain ka ding peng an timi bantukin khuachiapa nih zu an dih i an rawhnak hnga, an or nih ahlamlo hmanh ah an din i an rawhnak hnga lam tampi in tukforh lengmang an si.

Pathian Fale asi cangmi nih tukforhnak kan inmi zong aum ve i cucu Bawipa he thlacamnak in hawikomhnak kan ngeihmi ah thlarau in diriamhnak kan ngeihlo caan le Bibal kan relmi chungin thazang kan lakkhawhlo caan, Thawngṭha ngeihnak in thazang kan lakkhawhlo caan le Thawngṭha ngeihnak, Baibal relnak, thlacamnak in kan daithlan tikah kan thlarau thazang ader i kan chungah aummi taksa duhnak le thlarau duhnak kha an ipai tawn, taksa duhnak nih atei deuh tikah taksa duhnak kan ngeihmi lila hmangin tukforhnak kan ing tawn. Bawipa he thlacamnak in hawikomhnak kan ngeihlo tikah kan thlarau duhnak zulhduhnak le zulhkhawhnak kan ngeihmi atlawm i kan taksa duhnak zulhduhnak le tuahduhnak tu aṭhawn deuh caah tukforh kan si. Duhnak ṭhalo in tukforh kan si tikah kan tuah ding le kan ruahding asilo timi kan theihtuk ko nain kan thlarau duhnak hngak in kan taksa duhnak aṭhawn deuh caah micheu cu an tlu kan timi hna khi an si. Biatak cu thlacamnak in Thiang Thlarau he hawikomhnak in diriamhnak na hmuh ko ahcun taksa duhnak in tukforh khawhmi na si bal lailo i tukforh khawhmi na silo caah na tlubal ve lai lo. Amen. Zumhawktlak tein Bawipa cungah nun na duh ahcun nifate in Thlacamnak in Thiang Thlarau he hawikomhnak ngeih zungzal ko law Thiang Thlarau he hawikomhnak lawnglawngin na thlarau diriamhnak na hmu lai i na thlarau diriamhnak na hmuh tikah taksa duhnak nih an zamtak lai, thlarau duhnak zulh lawngin na nung cang lai. Taksa duhnak na chungah ṭhawng ngaiin rian a ṭuan caan khi Thiang Thlarau he hawikomhnak in na daithlan caan le na thlarau thazang ader caan asi i mah caan ah taksa duhnak in tukforh na si tawn khi asi.

Hneksaknak tu hi cu Pathian Fale ca lawngah asi i kan zumhnak afek maw, feklo? atak maw, taklo? ti hngalhnak caah hneksak kan si. Hneksaknak hi minung kip cungah awlte in atu le atu acangmi khi silo in Pathian nih Amah thimmi hna cawisan le thluachuah tam deuh pek aduh caan hna le fakchin in hman aduh hna caan ah hin fak deuh in ahneksak hna i fak deuh in acawisan ve hna. Hneksaknak kan timi hi cu harnak phunphun tam deuh in le lungre theihnak phun tam deuh in hneksak kan si. Acaan ah Job bantukin damlonak zongin hneksak na si kho i Acaan ah David bantukin Goliah le Saul bantuk hmangin hneksak khawh na si kho ko, acaan ah Jereboam sik dingah arami Judah profet Pa bantukin hlenhmangmi tarpa profet bangin hneksak na si ve kho ko. Biapi asimi cu zeibantuk hmanhin hneksaknak na cungah phan kho hmanh sehlaw Bawipa Thiang Thlarau he atak in thlacamnaknak in hawikomhnak chungin lunglawmhnak le thlarau diriamhnak na ngeih ko ahcun hneksaknak cu chuaklak in na pah khawh ko lai. Amen. Zeibantukin Pathian Fale cu kan cungah hneksaknak le tukforhnak zong tlung ko hmanh sehlaw Bawipa sin i kan i dinh i thlacamnak in Amah he hawikomhnak kan kawl ko i Thiang Thlarau he hawikomhnak chungin lunglawmhnak in lungriamhnak le thlarau khahnak in na thlarau nih diriamhnak ahmuh ko ahcun tukforhnak nih an tei kho lai lo i hneksaknak na cung i aphanmi thawngin cawisannak le na thlarau in ṭhannak na hmu lai . Amen..

(Jeim 1:14, 1Peter 1:7)