A tang i Pathian ralthuam tling phun (6) ka ttialmi hna hi mit in hmuh khawhmi asi lo nain a takin zumtu nih kan nun ah kan hman a herh taktak mi le kan i nunpi awk le mah thilthuam hi kan i hruk hrimhrim awk an si. Cu lawnglawng ah khuachia pa kan tei khawh peng ve lai. Mit hmuh in si loin zumhnak in van cuan ve law naa hruk lo mi an um sual ve maw? Minung nih hnipuan kan i hruk tikah tling tein kan i hruk zungzal cu chim hau lo asi i zumhnak in ral kan dohnak ah hin teh thlarau thuam tling naa hruk ve maw? Ka nunnak ah a taang i ai tapmi ka ttialnak ah hin ka mithli nih bia a chimmi tampi an um tawn, a ka hmuhpitu cu ka Bawipa lawng hi asi tawn ko. Pathian Bia kan ttialmi hi a tam tuk maw? An thawt teh an thawt ve hna maw? A reltu caah hin teh sullam ngei in tthawnnak a ngei ve hnga maw? Kan sining taktak teh a kan hmuhter kho ve hnga maw? Ca ttial thiam i zuam hi cu za cang sehlaw Thiang Thlarau tthawnnak tu he ka cafung nih hin mi thinlung kipah hnawhkhawh lomi Pathian Bia ttial hram ko seh. A ttialtu ka caah cun ka ttialmi bia hna lawng hi si loin ka mitthli hna nih hin tehte an khan lengmang ko.
Zumtu kan nun ah kan tonmi le kan pahmi ah hin kan i harhmi tampi an um cio lai nain Cathiang nih a kan chimhmi cu khuachia nih an doh hna tik le nan doh tikah a dongh tiang hrimhrim an hmunh tertu hna cu mah hna hi nan i hruknak thawng hin an si lai tiah a ti. Cu Pathian ralthuam hna cu a tang i phun (6) hna hi an si....
- LUCHIN caah KHAMHNAK naa chinh maw? Khamhnak na co taktak maw?
- TANGPHAW caah DINNAK naa hruk ve maw? Dinnak hi na duh in na ttanh peng maw?
- TAISAWMH caah BIATAK naa sawmh ve maw? Biatak hi na duh in nangmah hrimhrim nih teh biatak in na nung maw?
- PHAW caah ZUMHNAK hi i hruk law khuachia nih mei in an kah tikah na rak hmih khawh lai.. Zumhnak in na nung maw? Zumhngamnak nun na ngei maw? Zumhnak cu hmuhkhawh lomi, a um rih lomi zumh khi zumhnak cu asi.. Nangmah nih na tuah khawhmi cung i na ngeihmi kha zumhnak si loin na tuah khawh lomi na cung i a tlungmi Khrih thawngin ka tuah khawh lai ti zumh khi zumhnak timi cu asi..
- THLARAU nih pekmi VAINAM caah PATHIAN BIA (Baibal) hi na rel maw? Na relmi cu naa cinken in na nunpi maw? cu ti na tuah ahcun na vainam cu a haar lai i khuachia cu fawite in na sam khawh ko lai.. Vainam a har le harlo nih tampi a danter hrimhrim lai..
- KEDEN caah DAIHNAK Thawngtha chim thathawhnak na denh maw? Na kalnak kipah na duhmi hi rem daihnak asi maw? Na umnak Khrihfabu sinah, na khuami sinah, na rianttuan hawi sinah, na innchungkhar sinah na duhbikmi hi dawtnak le rem daihnak an si maw? Mi vialte he naa pehnak ah daihnak a duhmi na si ahcun remnak a chuahpitu ti na si lai... Daihnak le rem duhnak an ngeihtertu hrampi cu na ngeih mi Thawngtha (Jesuh Khrih) a si zungzal lai i na kalnak kip i naa zuammi cu na nun ah mikip nih Bawipa an hmuh khawhnak hnga kha asi lai, Cucu Daihnak Thawngtha chim thathawhnak timi cu an si lai i chimduhnak lawng si loin nunpitu na sinak tu nih hin mikip thinlung ah bia a chim deuh lai.. Cu ve bantuk tthiamtthiam in daihnak Thawngtha chim thathawhnak cu ka thathawhnak a si awk asi timi hin si loin chunglei in lenglei tu ah daihnak Thawngtha chim thathawhnak cu Thiang Thlarau riantuannak nih kan nun i fakpi in hmunhma a lak tikah mah zuamnak in si loin fialtu nih an pekmi thathawhnak in an si lai..
PATHIAN RALTHUAM PHUN (6) hi zumlotu caah si loin Hrintthan cangmi nih kan ngeih awk le kan i nunpi awk an si. A tang i ka van ttialmi hna hi na mitthlam in minung pum ah van suai law cu cungah hmumhma van lakter hna hmanh law cu nih cun tampi an bawmh lai. Mah vialte ka chimmi hna zong hi theihnak le fiannak tiang lawng i na taan ko rih ahcun teinak taktak le thluachuah a comi na si bal lai lo. Theihnak le fiannak tiang lawng si loin nunpinak le hrukaihnak taktak lawng nih hin teinak tling le thluachuahnak tling cu an phakpi lai. A kalning taktak cu hi ti hin asi. (LU IN TANG, TANG IN KUT PAHNIH AH, KUT PAHNIH IN TAI AH, TAI IN KE PAHNIH AH) LU in TANG (thinlung) ah, Minung vialte nih kan ngeih a herh hmasa cemmi cu Khamhnak hi asi. THINLUNG in KUT PAHNIH AH, Zeitlukin dah dinnak na duh le na ttanh cu na thinlung in a hung chuakmi te hin an lang lai. Na thinlung in a hung chuakmi hna nih cun na kut le na ke kha rian a fial hna lai. Cu na fialmi hna lam cu dinnak le daihnak lam, Pathian duhmi lam an si hnga dek maw? Kut pahnih sullam cu Orhlei kut in Pathian Bia (vaiman) THIANG THLARAU hruainak in Baibal na rel, Thiang Thlarau nih na nun ah an fiantermi kha naa cinken i naa cinkenmi kha naa nunpi lawngah na vainam cu a har lai, Kehlei kut in na put dingmi cu Phaw asi i cu Phaw cu zumhnak kan timi cu asi. Kan zeizong vialte vennak ahcun zumhnak lawnglawng hi asi i hmuh khawhmi siseh hmuh khawhlomi vialte chung in siseh a kan khamh khotu cu zumhnak ngeih lawnglawng hin asi. Kan zumhmi cu kanmah tuah khawhmi le tthawnnak hi si loin kan caah a thi i thihnak le zeihmanh nih a teilomi Jesuh Khrih hi asi. KUT PAHNIH in TAI ah, nu ca zongah, pa ca zongah naa biatak le biatak lo cu TAI ah hin a um.. TAI IN KE PAHNIH ah an hung kal. Ke hi zeitik hmanh ah a dangdang in an kal kho lo i an pahnih in an kalnak ai khat peng.. Kut tu nih hin cun orhlei nih a dang kehlei nih a dang tiin an put khawh ve.. Ke Pahnih hna nih an zulhmi lam hi daihnak lam a zul duahmah mi an si awk asi. Na ke hna nih hin zei lam dah a kal tawn lengmang ve?
Khamhnak a comi na si maw? Dinnak a duh in a ttanhmi le ai nunpi mi na si maw? Baibal hi Thiang Thlarau hruainak in a relmi le a duhmi na si maw? Thiang Thlarau nih hrilhfiahmi Cathiang hi aa cinken in ai nunpimi na si maw? Phaw bantukin fek tein an vengtu dingah zumhnak hi naa tlaih peng maw? Biatak hi teh na duh in na tanh taktak maw? Biaktak in teh nangmah hrimhrim hi a nungmi na si maw? Diahnak Thawngtha chim thathawhnak teh na ngei maw? Daihnak na duh maw? Daihnak na duh lo ahcun remnak a um kho lai lo. Biatak cu daihnak le remnak hi tthen khawhmi an si lo. Biatak kan chimh lai muh.. Zumtu taktak nih kan ngeihmi cu KHAMHNAK, DINNAK, PATHIAN BIA, ZUMHNAK, BIATAK, DAIHNAK hna hi an si i a lengah ngeihmi si loin mit in hmuh khawhlomi kan chunglei ah thukpi in a ummi hna an si. Hi hna hi an dihlak in rian an ttuantti lawnglawngah vawlei kan nun chungah zumtu ttha le teitu taktak cu kan si lai. Biatak cu Jesuh Khrih he kan i peh lawngah tthawnnak he a cang kho dihmi an si. Bawipa nih sunparnak co ko seh...
—-
EFESA 6:13
Cucaah atu hin Pathian ralthuam kha i hruk u. Cun ni ṭhalo kha a hung phanh tikah nan ral cu nan rak doh khawh lai i a donghnak tiang nan i tuk hnu zongah nan hmun ah cun fek tein nan dir kho lai.
EFESA 6:14
Cucaah timhcia tein dir u: nan taisawm caah biatak kha fek tein i sawmh u; nan ṭangphaw caah dinnak kha i benh u;
EFESA 6:15
nan kedan caah daihnak Thawngṭha chim thathawhnak kha i danh u.
EFESA 6:16
Zumhnak kha phaw caah i ken zungzal u law cu phaw cun Khuachia nih mei bantuk a simi thal in an kah hna tikah nan rak hmih khawh hna lai.
EFESA 6:17
Cun luchin caah khamhnak kha i chinh u law Thlarau nih an pekmi hna vainam caah Pathian bia kha i lak u.