Chambaunak tampi angeimi ka si ko lio ah Jesuh Khrih nih athisen in cawkmi ka si cang kha a ka hngalhternak thawng in nan sin ah kan nunah thazang ka lakmi le hrawmh kan duh vemi hna Thawngttha tawi tete in kan rak thlah lengmang. Minung zoh loin Bawipa mithmaitu kawl ko hna usih. Areltu nan dihlak cungah ka lawm i Bawipa nih thluachuah in pe ko hna seh!
1 KORIN 8:9
Asinain ralring te tu in um u law nan luatnak kha zumhnak a dermi sualnak chung i a tlaktertu siter sual hlah u.
1 KORIN 8:12
Cuticun nan unau hna cung i sualnak nan tuahnak thawng le a derthawmmi an chiaṭha thleidannak nan hliam hna ruangah cun Khrih cungah sualnak nan tuah a si.
Pathian dawtnak chungah ka um hnu ah hin nikhat hnu nikhat in Pathian kilvennak le huhphenhnak tangah khua ka sa i Pathian cu ka si khawh chung in ka thangtthat zungzal ko. Amen! Ka si khawh chung in ka thangtthat ko ka ti tikah hin minung si khawhnak le tuahkhawhnak vial lawng hi ka chim duhmi cu asi i Sihmanhsehlaw minung kan derthawmnak cu sehtan nih hmang riangmang in minung sinak level itah lengmangnak in le inkhawhnak tlawmte lawng kan ngeihmi kha hmang in sehtan nih hmunma alak tawn i lungawttawm ngaiin le thintawi ngaiin ka um tawn ve nain Bawmtu Thiang Thlarau thawng in ka lung zei tik hmanh ah adonghter lotu Pathian hi ka thangtthat peng. Amen! Vawlei kan tei khawhnak dingah cun pei bawmtu Thaing Thlarau cu pek kan si cu! Amen!
Acung i Pathian bia hi ka rel deuhdeuh lengmang tikah hin kaudeuh in Zumtu asimi nih kan ngeih dingmi theihthiamnak le i ralrin dingmi tampi a ka cawnpiak. Paul nih Korin khua i zumtu mi hna bawlnak sa einak/eilonak kong he pehtlaiin ca akuatmi hna hi asi i zei rawl poah hi ei ko, Pathian kan zumhnak ah thurhnawmhtertu an um lo tiah ati asinain cu kan einak ruangah zumhnak adermi kan tluk rilhter hna ah cun sual asi tiah ati tthan. Chim duhmi cu Pathian dawtnak tling tein angeimi kan si cio dih ko hna nain zumhnak ah athawngmi le adermi hi kan um zungzal ti hi kan philh lo awk asi i Pathian bia kan aupi tik ah maw, thazang pakhat le pakhat kan i pek tikah maw kan i ralrin deuh cu ahau ko rua tiah ka ruah. Ralrin deuh ka ti tikah hin minung kan fimnak hmangin ralrin ding timi si loin Thiang Thlarau hruainak le bawmhnak in ralrin ding khi ka chim duhmi asi. Pathian na ttanhnak hi nangmah pumpak in cun thuk taktak in ttanh law zum ko sihmanhsehlaw na nunnak tuin na zumhnak cu lang ko seh! Amen! Zumtu atampi cu achim hi cu kan tthawng ngai ko nain kan nunnak ah alang in athei atlaimi atlawmtuk tawn, keimah zong kai tel ve ko lai. Abik in ka chim duhmi cu kan zumhnak ngantuk ruang le Pathian kan ttanhnak afahtuk ruang i zumhnak adermi kan hnursuan i an tlukrilhter sual ahcun Bawipa mawhchiatnak kan cungah atlung sual lai caah ralring tein Pathian bia ttanh in kan nunnak tuin langhter in athei kan tlai khawhnak hnga Bawipa nih kan duhnak le kan ttanhnak hi thluachuah pe ko seh. Amen!
1 KORIN 8:3
Sihmanhsehlaw Pathian a dawmipa kha Pathian nih a hngalh.
1 KORIN 8:6
Sihmanhsehlaw kannih caah cun Pathian cu pakhat lawnglawng a um i amah cu kan Pa, zeizong vialte Sertu kha a si i kannih hi amah ca i a nungmi kan si; cun Bawipa cu pakhat lawnglawng a um i cucu Jesuh Khrih kha a si i amah thawng cun zeizong vialte kha ser an si i amah thawng cun kannih zong hi kan nung.
Pathian hi pakhat lawnglawng kan ngei i Amah cu kan Pa zeizong vialte sertu Pathian cu asi. Amen! Bawipa le Uktu zong pakhat lawnglawng kan ngei i cucu Jesuh Khrih hi asi. Amen! Jesuh Khrih thawng cun zeizong vialte hi Amah caah sermi an si dih i kan nih zong Amah sunparnak caah nunding in sermi kan rak si. Amen! Pathian nih a kan dawttuk ruangah cu adawtnak cu mikip sinah phanh seh ti aduhtuk i anunnak tiang pek in vawlei cu a khamh. Amah nih a kan dawt hmasa ruangtu ah hin Zumtu poah nih Pathian hi kan dawt khawh ve. Amen! Fale nih Nu le Pa dawt hmasa hnu ah Nu le Pa nih Fale dawt ve ti aum bal lo i Nu le Pa sin aluangmi dawtnak ruangtu ah hin Fale nih Nu le Pa tlaihchan in dawt le an nawlzulhnak tang khuasak khawhnak cu achuahpi. Amen! Cu ve bang in Pathian nih Thlarau in hrinmi fale kan sinak cu kan thinlungah dawtnak in a kan hmuhter i adawtnak cu atoih in a kan toihnak thawng in ka Pa tiin auh thiamnak kha a kan cawnpiak. Amen! Kan chung i aummi le a kan pekmi dawtnak nih cun fale taktak kan sinak cu um thiam loin ka Pa ka Pa tiah a kan auter. Amen! Pathian a dawmipa na si ahcun Pathian nih an hngalh ve ko lai. Biatak cu Pathian a dawmi lawng hi Pathian nih a kan hngalh ve taktak...
Ataktak le ngaingai tiah cun lakfa nih Pa dawtnak atheih kho taktak lo bantuk in Thlarau in hrin lomi fale poah nih cun Pathian dawtnak taktak hi an hngal kho ve hrimhrim lo, Sihmanhsehlaw kan nih cu fa tak kan sinak nih khan Pa le dawt le tleihchan kha a kan thiamter. Pathian kan dawt le a nawl kan zulh cu a kan hngalh i a thladem tangah him tein khua a kan sakter. Amen! Bawipa dawt hi kan mah le kan mah kan rak i dawt taktak cu asi. Dawt ding vialte lakah dawt cem ding cu Pathian hi asi i Jesuh Khrih thawng lawnglawng in Pathian he remnak kan hmuh i kan dawt khawh taktak ve. Vawlei na nun chungah himnak, lawmhnak, daihnak, hnangamnak, tlamtlingnak, rumnak, harnak in khawhnak le tei khawhnak hmuh na duh ahcun Pathian kan Pa hi rak daw ko. Pathian kan dawt ve ka ti tikah theihnak tiang lawng si loin Thiang Thlarau he hawikomhnak kan ngeih hnu ah hngalhnak tling kan ngeihmi in dawtnak khi ka chim duhmi asi. Biatak cu Pathian na dawt hi nangmah le nangmah na dawt taktak cu asi. Baibal nih a ka cawnpiakmi cu mah nunnak khamh ai zuammi nih anunnak a sung lai, Sihmanhsehlaw Keimah caah nunnak a sungmi nih anunnak a hmuh tthan lai tiah Bawipa Jesuh nih bia a kan kamh. Amen. Kan Pathian na dawt taktak khawh ve nak cu nangmah ruangah si loin na chungah aummi Thaing Thlarau tthawnnak thawngin asi. Pathian a daw taktak mi kan caah cun vawlei na nun chung ca he zungzal nunnak ca he kamhchih zungzal in thluachuah pek kan si. Peter nih zeizong vialte kaltak in kan in zulh, zeidah kan hmuh lai tiah Jesuh a rak hal bal i Jesuh nih a lehmi cu vawlei na kaltakmi vialte cu a let zakhat in na hmuh tthan lai i zungzal nunnak zong pek hrimhrim na si lai tiah arak ti. Amen! Pathian na dawt taktak nak hi nangteh zeitindah na langhter ve lai? Peter le lamkaltu hna nih cun an taksa duhnak kaltak lawng si loin zeizong vialte kaltak in le nunnak pekin Pathian an dawtnak an rak langhter.? Nang le kei ta zeitindah Bawipa kan dawtnak kan langhter ve lai? Bawipa nih sunparnak co ko seh!