Keimah le keimah kaa theihka in nihin ni tiang ka nuning hi ka ruah, ka tuak lengmang tikah zeitluk in dah asualmi le fihnung ka si hi kaa hmu chin lengmang. Keimah te lawng hmanh in ka kong ka ruah ah hin ka ning a zaak mi sualnak tampi ka ngei. Cucu mi nih an chimmi chungin si loin keimah le keimah ka hmuhmi chungin an si. Cu lawng si loin minung zeizat remruam dah an lung ka hei fahter hna i an ngeih ka hei chiatter hna hnga. Ka sualnak vialte hi ruah tikah hih ttih a nung tuk i thinphang asi i thling hna an za. Minung nih kanmah tuhmi te hi kanmah nih zun ding khi asi (facang le kawm cu lo pakhat chungah kan tuh tti ko hna nain facang ci cu facang kung a kheu i azat tikah facang kan zun ko, cubantukin kawm ci cu kawm kung a kheu i azat tikah kawm bak kan zun ko). Chimduhmi cu sualman hi thihnak asi ti cu kan hngalh lengmang mi asi i kei hi sualman in thi ding ka si nain zeicaahdah ka taksa le ka thlarau hi a thih rih ve ne lo timi hi ruah awk a um ngai.
Ka ruah ngaimi cu Jesuh le Peter bia an i halnak hi asi: jesuh nih A thawh i mi pahnih an um i an boss pa nih phaisa 50 le 500 a cawih hna (mah lio phaisa in cu a tampi lai), an pahnih tein an boss pa cu leiba chamnak an ngeih lo caah an boss pa nih cun phaisa cu pek ti lo dingin a ngeihthiam hna i a hodah a lawm deuh lai tiah Peter cu a hal i a lehmi cu leiba tam deuh a batmi pa teh aa lawmh deuh lai tiah a ti. Jesuh nh na hman; dawtnak nganpi a langhtermi nih khan a sualnak tampi a simi cu ngaihthiam an si cang, ti kha a langhter. An sualnak tlawmte lawng ngaihthiam a simi hna nih cun dawtnak tlawmte lawng an langhter ve,” tiah a ti. Cu ve bangin sualman cu thihnak asi komi nihin ni tiang ka taksa le thlarau a nun ve rihmi cu ka sualnak vialte hnawtpiaktu le ngaihthiam kho u Jesuh Khrih a um kha ka hngalhnak hnga caah a rak si. Amen! Hngalh lawng hmanh si loin ka sualnak vialte hi hnawtpiak cikcek ka si cang ti hi a rak si. Amen! Fiang tein ka hngalhmi cu keimah duh in siloin leiba a cham kho veve lomi hna pahnih lak i tam deuh a batmi pakhat tu hi ka si tihi ka hngalh cang. Cucaah cun kaa lawmhnak hi a ngan i ka Bawipa le Ka Pathian caah zumhtlak tein nun hi kaa thim cang.Halleluijah. Amen!
Nangtah leiba tlawm te champiakmi maw na si? Tampi champiakmi dah? Jesuh cungah dawtnak tampi na langhtermi hin na sualnak vialte an ngaihthiam cangnak na langhter asi hi rak philh ve hlah muh. Jesuh Khrih nih kan sualnak vialte ngaihthiam lawng si loin vawlei ah kan herhmi thluahuahnak zong tampi pek a kan duh hi rak i cinken ve muh! Cucaah cun Khrih thawng in kan sualnak vialte thenhpiak le ngaihthiam kan si mi hi mikip sinah dawtnak tlawm te lawng in maw kan langhter lai? tampi in dah? Dawtnak tlawm te lawng in na langhter ahcun tlawm te lawng ngaihthiam na si tinak asi i Dawtnak nganpi na langhternak nih na sualnak tampi ngaihthiam na si cang ti an langhter kha rak philh hlah. Dawtnak nganpi langhter nai zuammi ruangah si loin chunglei Thiang Thlarau hruainak tuin ruahchannak um loin mikip cungah dawtnak nganpi na langhter mi khi ka chim duhmi asi. Bawipa Thlarau nih in fianter ko hna seh! Amen!
LUKA 7:47
Cucaah hihi kan chimh, dawtnak nganpi a langhtermi nih khan a sualnak tampi a simi cu ngaihthiam an si cang, ti kha a langhter. An sualnak tlawmte lawng ngaihthiam a simi hna nih cun dawtnak tlawmte lawng an langhter ve,” tiah a ti.
LUKA 7:48
Cun Jesuh nih minu cu a thawh i, “Na sualnak cu ngaihthiam na si,” tiah a ti
Biatak cu: Jesuh nih keimah bantuk in “Na sualnak vialte cu ngaihthiam dih na si ve ko,” tiah an ti ve ko caah Thiang Thlarau hruainak in dawtnak nganpi na langhternak in na sualak vialte thianhpiak na si kha tehte rak khang ve. Halleluijah. Amen...