Fimnak kan ti lengmang mi hi zumlotu caah si loin Pathian fale kan caah asi deuh. Asinain nihin vawlei kan kalning zaoh ah zumlotu hi afim deuhmi le a hngalh deuhmi ko an lo. Ataktak le ngaingai ahcun zumlotu hmanh an fim le an thiam ahcun Pathian fanu le fapa hi cu kan fim chinchin awk le kan hngalh chinchin awk asi. Bawipa ṭih hi fimnak hramthoknak asi ati bantukin Bawipa a ṭihmi cu Pathian fanu le fapa kan si. Pathian ṭih timi hlan ah hin ahram aum i cucu Jesuh zumh le cohlan hi asi. Jesuh azumlomi le a cohlanglomi nih cun Pathian cu an ṭih bal lai lo I Baibal nih mihrut a timi hna le a rawk dingmi a timi hna an si. (1 Korin 1:18) Bawipa Jesuh Khrih a zumlomi le a cohlanglomi paoh cu mihrut an si lawng siloin zungzal rawhnak ah a rawk dingmi an si. Pathian fanu le Fapa sinak ro zong an co bal lai lo. Pathian aṭihmi le a dawmi cu Jesuh Khrih azumh le a cohlangnak thawngin khamhnak a hmumi kan si i khamhnak ahmuhnak thawngin Thiang Thlarau in hrinṭhannak ahmumi kan si. Thiang Thlarau toih kan si cu Amah ta kan si cangnak hmelchunhnak asi.
Biatak cu minung vialte hi Jesuh Khrih thisen in cawk dihmi kan si, mah caah cun pei Paul nih kan thih zongah kan nun zongah Bawipa ta kan si atinak kha asi cu.. Jesuh Khrih azumlomi cu Pathian fa an si bal lai lo i Pathian fanu le fapa asi lomi nih zeitik hmanh ah Pathian an ṭih ballo caah zeitindah an fim khawh lai. Biatak cu Pathian ṭih hi pei fimnak hramthoknak le hngalhnak hramthoknak cu asi cu. Pathian hi na chungah aummi Thiang Thlarau thawngin na ṭih ko ahcun na fim te hrimhrim ko lai. Amen. Biatak cu Fimnak taktak hi Jesuh Khrih hi asi. Vawlei fimthiam sang hna nih an fimthiam sangnak in an rak hngalh khawhlo caah Fimnak asimi Pathian Fapa, Jesuh Khrih cu an rak thah diam.. Fimthiamnak sangtuk le a hngalhtuk I ruah ruangah hin Fimnak asimi zong an rak thah nain Fimnak lawng hmanh silo in Pathian Fapa bak kan rak thah ti hmanh an rak cohlang duhlo. Nihin zongah hin Vawlei fimnak azultukmi le akawl tukmi nih cun Pathian fimnak le tinhmi le hngalhnak cu an kheng bal lai l0. Vawlei nih akalpi cuahmah thil vialte hngalh le theih hi fim asi loh, Pathian hngalh le hawikomh tu hi fim taktak cu asi. Zeizong vialte Sertupa na hngalh I hawikomhnak nan ngeih ko ahcun aherh atimi vialte cu an hngalhter lai.. Aluanciami theih le fian hngak in ara laimi hngalhcia hi fim asi deuh i Thiang Thlarau lawnglawng nih aralaimi vialte ahngalh dih khawh. Jesuh Khrih na ngeih ahcun ara laimi vialte na herh ning in hngaltu na si ko lai.
Mi nih hngalhciami le ṭialciami rel lengmang lawng hi fim le hngalhnak ngeih asi naisai lo. Vawilei nih fimnak le hngalhnak atimi hi cu Pathian caah cun hruhnak asi. Vawlei nih akalpi cuahmahmi thil dawi lengmang hi fim asi hrimhrim lo. Solomon nih cun pakpalawng asi ati. Nihin zumtu he zumlotu he kan dawimi cu Solomon nih pakpalawng, pakpalawng te an si atimi hi kan dawi cuahmah ko. Biatak cu Jesuh Khrih na zumh thawngin Pathian hi biatak in kawl law na fim ko lai i na nun hi sullam ngei taktak mi ah naa tel ko lai. Thawngpang reltuk hna hi fimnak ah arelmi tampi kan um ko lai, news tampi na rel hnak in Baibal tampi rel law na fim deuh lai i Thiang Thlarau he thlacamnak in hawikomhnak ngei law na fim chinchin lai. Asunglawi bikmi cu Jesuh Khrih vailamcung thihnak thawngin sualnak ngaihthiam lawng hmanh silo in na tuahciami sualnak vialte cinkenpiaklo le hlawnhpiak na si hi naa hngal dek maw? Fimnak ngeih taktak cu Pathian ngeih hi asi. Pathian na ngeihlo ahcun nihin i na ngeihmi zeizong vialte hi pakpalawng an si dih.. Jesuh Khrih thawngin Pathian na ngeih ko ahcun fimnak lawng hlah zeizong vialte ngeitu na si i nihin na ngeihmi le na sining zong hi sullam an ngei i hmual an ngei...
Zumlotu Pathian fanu le Fapa asi lomi hmanh an fim ko ahcun Pathian Fanu le Fapa cu kan fim in kan hngalh ve hnga lo maw, kan fim in kan hngalh chinchin awk asi. Minung nih fimnak le rumnak kan timi hi minung tahfung in kan i tah lengmang caah hin fimnak le hngalhnak, rumnak kan timi kan i palh. Pathian hmuhning ah hin mifim atimi hna le mirum atimi hna hi tampi kan i dang ko hnga. Ataktak le ngaingai ahcun vawlei mi tahnak le hmuhnak zong ah hin a fimcemmi cu Pathian Fanu le Fapa bak kan si hrimhrim awk asi i asi zong kan si zungzal ko lai. Amen. Fimnak timi cu ara laimi kong tampi hngalhnak angeitu hna le hmailei fale kong thukpi aruat I zohchunhtlak in lam hmuhsaktu hna hi kan si. Cucu Thiang Thlarau nih a kan chimh caah kan hngalh khawhmi asi. Amen. Thiang Thlarau he thukpi in hawikomhnak ngei chin cio lengmang usihlaw kan fim chin lengmang ko hnga i ara laimi kong tampi kan hmuh i kan hngalh chin lengmang ko hnga. Fimank kan timi cu ara lai dingmi ahmu khomi le kan fale hmailei ahmu khomi hna hi an si i cu cu Thiang Thlarau lawnglawng nih ahmuh khawhmi le a kan chimh khawhmi asi. Amen. (John 16:13) Thiang Thlarau he hawikomhnak chungah na luh ahcun fimnak le ara laimi kong an chimh hrimhrim ko lai. Amen..
Nihin ah minung nih ara laimi kong an hmuhmi hna zong hi Thiang Thlarau nih a chimhciami hna le a onpiak ciami hna asi caah asi. Kannih Pathian Fanu le Fapa cu Thiang Thlarau nih umhnawhmi le cawnpiak lengmang mi kan si caah kan fim hrimhrim awk le hngalhnak ah kan rum awk le biatak zong ah kan rum hrimrim bak awk asi. Fimnak timi cu cawnnak in hmuhmi si loin Pathian he hawikomhnak in Amah ṭihnak le ṭhaṭlonak hrialnak in kan hmuhmi fimnak tuhi fimnak taktak cu asi i Amah ṭihnak, ṭhatlonak hrialnak le anawl ngeihnak he ai pehtlai zungzalmi asi. Hngalhnak taktak zong hi ca rel tamnak le theihmi tamnak khi si loin Thiang Thlarau thawngin Biatak hngalh khawhnak tuhi asi deuh. Biatak zong cu lenglei ah kan nun in kan langhtermi khi Biatak si loin kan chunglei ah hmuhkhawh loin Biatak duhnak le Biatak chungah a kan hruai zungzal tu le chung le leng khat in a kan nuntertu khi Biatak asi. Fimnak tling taktak hmuhkhawhnak cu ca relnak lawng hin asi loh Thiang Thlarau he hawikomhnak chung luh lengmangnak lawngin hmuchin lengmangmi asi. Fimnak kan timi cu zumlotu caah si loin zumtu Pathian Fanu le fapa caah an rak si. Chimthiam le tuahthiam, ṭialthiam le ruahthiam hi fim si loin Pathian duhnak hngalh le duhnak zulhtu hi fimnak kan timi taktak cu asi. Amen. Pathian duhnak hngalh le duhnak zulh zong hi Amah he Thlacamnak in hawikomhnak chung I luh lengmangnak lawngin hngalh khawh le zulh khawh asi. Amen.
Ca ṭial thiam zong na si ko lai, ruahnak chuahthiam ngai zong na si ko lai, biachim thiam ngai zong na si ve ko lai i tuahthiamnak phunkip zong na ngei ko lai nain mah hna na hmuhmi le na ngeihmi cu na tuah lengmangnak theitlai an si kho men. Kei nih ka chim lengmang mi Fimnak cu tuah lengmangnak in hmuhmi hi ka chim duhmi si loin Thiang Thlarau sinin kan hmuhmi Fimnak le hngalhnak taktak hi ka chim duhmi asi. Fimnak taktak cu Thiang Thlarau hi asi. Halleluijah. Amen.. Fim taktak na duh ahcun Thiang Thlarau na ngeih hlan tiang thlacam ko. Fimnak taktak cu Thiang Thlarau hi asi. Amen. Pathian Fanu le Fapa kan hruh phung hrimhrim asi loh, aruang cu fimnak hrampi le rumnak hrampi Pathian nih pei a Thlarau in umhnawhmi kan si cu. Halleluijah. Amen. Fimnak le hngalhnak taktak cu Pathian fa keimah ta asi. Aruang cu ka chungah aummi Thiang Thlarau hi fimnak lawng hmanh si loin zeizong vialte hram asi. Asi.. Zeizong vialte an I thoknak taktak cu Pathian kan Pa le thihnak le thawhṭhannak in a kan khamhtu Fapa Jesuh le zungzal in kan chungah a kan umpitu le lam a kan hmuhsak in a kan hruaitu le bawm zungzaltu Thiang Thlarau hna thawng hin asi. Fimnak taktak cu Pathian Fanu le fapa ca hrimhrim ah hin atling bak awk le kan fim, kan thiam awk asi. Fimnak lawng hmanh si loin zeizong vialte hi kan chung le kan cungah atling chin lengmang awk asi i atling chin lengmang ko lai. Halleluijah. Amen. Biatak cu zeizong vialte hi keimah ta an si deuh (Zeizong vialte hi Ka Pa, Pathian ta an si dih bantukin ka Pa ta cu keimah ta an si dih ve, Rocotu ka si ve caah asi). Romans 8:16
Pathian nih hin vawlei cungah hin fimnak kan timi le zeizong vialte hi achiah dih. Cu achiah dih ciami zeizong vialte chung ahcun lungdong loin a kawlmi nih an hmuh ve taktak ko. Fimnak le rumnak a kawlmi zong nih cun an hmuh taktak ve nain cucu cansaupi thluachuah an i copi dingmi asi loh. Biatak cu ngeih luaimai le hmuh luaimai, fimthiam luaimai hi Pathian thinlung si loin zohkhenh thiam le hmanthiam hlei ah Bawipa he hawikomh zungzal tuhi Pathian thinlung le biapimi asi deuh. Zohkhenh thiam le hmanthiam an cawn lai I tampi an thiam taktak ko lai nain a dongh tiang thiamnak cu kan Pathian lawnglawng nih a ngeihmi asi. Cu zohkhenh thiamnak le hmanthiamnak vialte cu Jesuh Khrih kan zumh le kan cohlannak thawng in Pathian nih Thiang Thlarau umpinak he pek le cawmpiak a kan duh. Amen. Biatak cu fimnak le thiamnak, rumnak le zeizong vialte hi vawlei ah Pathian zangfahnak tangah aum dih ko i ahmuh zong na hmuh ko lai i a nuamh zong naa nuamhpi in thluachuah zong naa copi taktak cang ko lai nain adongh tiang thluachuah naa copi khawhnak ding le naa lawmhpi khawhnak ding ahcun Fimnak taktak asimi Pathian Fapa na ngeih le na ṭih lawng si loin Thiang Thlarau he hawikomhnak in Pathian lung na ton le na lawmhternak lawng in asi lai.
Pathian na ṭih le na ngeih, lawmhter khawhnak ding ahcun Fapa Jesuh Khrih na zumh le na cohlan aherh, Jesuh Khrih na zumh le na cohlannak thawngin Pathian Fa cannak na hmuh lai I Pathian Fa taktak na si cang langhternak ah Thiang Thlarau in hrin na si lai. Thlarau in hrin na si cu Pathian Fa na si cang ti hmelchunhnak asi, Pathian na ngei cang tinak le Pathian zong Thiang Thlarau bawmhnak thawngin na ṭih kho cang tinak le Thiang Thlarau he hawikomhnak thawngin Pathian lung na ton khawh i na lawmhter khawh tinak zong asi, Jesuh Khrih le Thiang Thlarau zong na ngei cang tinak le Thiang Thlarau he hawikomhnak zong nan ngei kho cang tinak asi. Jesuh Khrih kan zumh caah Pathian kan ngei i Pathian Fa kan si, Pathian Fa kan si caah Thiang Thlarau kan ngei ve. Thiang Thlarau kan ngeih cang caah Thiang Thlarau he hawikomh khawhnak kan ngei i Thiang Thlarau he hawikomhnak le umṭi zungzalnak lawngin Pathian lung kan ton khawh i kan lawmhter khawh ve. Pathian lungtonnak le lawmhnak lawngin na ngeihmi zeizong vialte hi adongh tiang lunglawmhnak he thluachuah naa copi khawhmi asi. Amen.
Thiang Thlarau he umṭi zungzalnak ding ahcun ahmai na kawl ve le a duhning na nun ve ahau. Aduhning in na nun ve nak ding ahcun aduhnak na hngalh hrimhrim an hau i a duhnak na hngalhnak ding ahcun ahmaika ah na kunnak in ahmai na kawl lengmang ve an hau. (Joshua 7:6) Ahmaika na kun khawh ve lengmangnak ding zongah lungthawhnak le ahmai kawl duhnak Thiang Thlarau nih an pek ṭhiamṭhiam ahau. Lungthawhnak le hmaikawl duhnak na ngeih zungzal khawhnak ding ahcun Thiang Thlarau nih hawikomh an duh caan tlawlhlo tein hmanṭi thiam aherh taktak. Thiang Thlarau nih hawikomh an duhcaan I nan I hawikomh lengmang tikah Pathian duhnak hngalh khawhnak lawng hmanh si ti loin duhnak zulhkhawhnak tiang an pek lai. Pathian duhnak na zulh lengmang khawhnak nih Pathian lungton le lawmhter lawng si loin Thiang Thlarau zong na lawmhter chin lai I cu lawmhternak nih cun Amah he hawikomh chin lengmangnak le umṭi zungzal duhnak cu achuahpi chin lai. Biatak cu Thiang Thlarau nih hin a kan umpi zungzal taktak ko nain Pathian kan lawmhter lo tuk caah hin kan sinah aum zungzal kan hngalh khawhlo arak si deuh bia tu asi. Na ngeihmi zeizong vialte zohkhenh thiamnak le a dongh tiang thluachuah naa copinak ding ahcun Thiang Thlarau lawmhternak lawngin asi lai. Pathian na cungah ai lawmhlo ahcun zeitik hmanh ah Thiang Thlarau cu na cungah ai lawm kho bel lai lo. Na ngeihmi le ka ngeihmi vialte hnak in abiapi cemmi cu Pathian lawmhter le lungton hi asi.
Pathian hi Fimnak cu asi. Jesuh Khrih hi Fimnak cu asi. Thiang Thlarau hi Fimnak cu asi. Fimnak kan timi cu Jesuh Khrih zumh le Pathian zumh hi asi. Fimnak kan timi cu Pathian ka chungah anung ti hngalh hi asi. Fimnak kan timi cu Jesuh Khrih mah chungah ngeih hi asi. Fimnak kan timi cu Thiang Thlarau ngeih hi asi. Fimnak kan timi cu Thiang Thlarau he hawikomh hi asi. Fimnak kan timi cu Pathian ṭih le duhnak zulh hi asi. Fimnak kan timi cu Jesuh Khrih cohlan hi asi. Fimnak kan timi cu Pathian dawt hi asi. Fimnak taktak cu dawt hi asi. Fimnak kan timi cu Pathian nawlngaih hi asi. Fimnak kan timi cu mah le mah dawt hi asi. Fimnak kan timi cu Nu le Pa, Nupi/Va le fale , unau/midang dawt hi asi. Fimnak kan timi cu ara laimi kong hngalhkhawh hi asi. Fimnak kan timi cu ngeihmi zohkhenh thiam hi asi. Fimnak kan timi cu Thiang Thlarau he hawikomh hi asi.
Vawlei cung minung vialte nih an kawlmi le an ngeihmi, hmuhmi vialte hi ataktak le ngaingai ahcun kanmah Pathian Fanu le Fapa caah an kan kawlpiak cia le an kan khawnpiak ciatu asi deuh. Aruang cu kannih Pathian fanu le Fapa asimi hna cu kan kawl hmasami fimnak le rumnak si loin rumnak le fimnak , Nunnak ngeitu Jesuh Khrih le Pathian le Thiang Thlarau tuhi asi. Pa Pathian sin phanhnak lam cu Jesuh lawng asi. Pathian nih alawmhmi cu fimnak le rumnak kawl hmasa hi si loin Amah hrimhrim kan ngeih le kan hmuh tiang Jesuh Khrih zumh thawgin kawl hmasa hi asi. Amen. (Mathai 6:33) Mifim taktak timi minung cu zeizong vialte a kawl hlan ah Bawipa Jesuh Khrih zumh thawngin Pathian a kawl hmasa mi le Pathian thinlung ahaltu hna hi kan si i Pathian kan hmuh le Pathian thinlung kan theih tikah zeizong vialte kawl ding le tuah ding hi Pathian chungin an rak i thawk asi. Fimnak taktak cu Pathian kawl hmasa hi asi i Pathian ṭih kan timi zong hi Amah ngeihnak lawngin ai thawkmi asi.
Pathian a ṭih kan timi hna cu zumlotu hna hi si loin zumtu Pathian Fanu le fapa hna kan ta taktak asi. Pathian na ṭih ve khawhnak ding ahcun Jesuh Khrih na zumh le na cohlan taktak aherh ve. Jesuh Khrih zumh le cohlan kan timi cu Pathian nih keimah sualnak ṭawlpiaknak caah vailam ah a Fapa Jesuh Khrih athah, cu vailam cungin Pathian nih Fapa a thahnak thawngin kan sualnak a kan ṭawlpiak I sualnak ṭawlpiaknak in sual ngeihthiamnak, sual in luatnak, sualnak kan tuahmi cinken piak tilo le Thlarau, thinlung, taksa, ruahnak in damnak kan hmu tiah kan zumh tikah le Pathian nih a Fapa athah lawng si ti loin zungzal nunnak ah athawhter, Zungzal Nunnak ah a thawhternak aruang cu Amah azum I cohlangmi vialte cu thihnak in kan tho ṭhan lai i zungzal nunnak kan ngei ve hrimhrim lai timi biakamnak le Pa Pathian he kan i rem cang timi biakamnak le a thimi he a nungmi he kan Bawi asi nakhnga Jesuh Khrih kan zumh le kan cohlan timi cu asi. Jesuh Khrih zumh le cohlan timi cu athihnak kan thi ve i a thawhṭhannak ah kan thoṭhan ve tinak asi. Amen.
Fimnak taktak cu Pathian chung lawnglawng ah aum i Pathian nih Jesuh Khrih zumh le cohlannak thawngin Thiang Thlarau pek hnu ah hrawmh le pek a kan duh. Amen. Fimnak taktak kan hmuh khawhnak ding cu Thiang Thlarau he atak in kan i hawikomhnak lawnglawng in hmuh khawhmi asi ve. Pathian lawmhter le lungton khawhnak zong hi Thiang Thlarau he thlacamnak in hawikomhnak lawnglawng nih ahrinmi asi ve. Thiang Thlarau he thlacamnak in hawikomhnak nih Pathian duhnak le thinlung hngalh khawhnak ahrin I cu ahrinmi zong atak in kan tuah khawh le kan zulh khawhnak dingah Thiang Thlarau he nifate hawikomhnak ṭhiamṭhiam in zeitik caan ah kan tuahawk le kan zulh awk asi ti hngalh khawhnak zong kan ngei. Tuah awk le zulhawk hngalknak kan ngeihmi zong cu ralṭha tein kan tuah/zulh khawhnak ding ahcun Thiang Thlarau he hawikomhnak in ralṭhatnak ahrin ve ṭhiamṭhiam. Amen.. (Joshua 7:10-25)
FIMNAK CU THIANG THLARAU ASI. JOHN 16:13