Harnak caan ah zeidah na tuah awk asi

Harnak caan ah Bawipa naa bochan ahcun Amah cu na caah afekmi himnak asi lai! Pathian nih ka chanh seh ti na duh ahcun Amah nih an zohkhenh lai. Halleluijah. Amen! Minung poah nih lawmhnak siseh har caan siseh Pathian kan herh zungzal. Sihmanhsehlaw Pathian loin kan nun khawh lo le kan herh zungzal ti a hngal taktakmi bal tlawmte lawng kan si. Minung tampi nih kan zuan hnawh ciomi cu pawcawm riantuannak le chawva kawl hi asi cio, a rawk khomi chawva le thilri, taksa damnak hna hi kan zuan hnawh hna nain thluachuah ngeitu, damnak ngeitu taktak le chawva ngeitu Pathian cu kan kawl hrimhrim lo. Zeizong vialte ngeitu Jesuh Khrih Min in Pathian hi kawl in panh law na herhmi vialte cu Amah sin in an rat kha an hngalhter lai. Amen! Kan chim dingmi cu Pathian cu kaa bochan in ka chanh seh ti ka duh ko kan ti lai nain a biapimi cu hi hi asi: A fekmi himnak le zohkhenhtu asinak cu na chungah a um na hngalh taktak in na cungah a tling maw? tihi asi. Amen! Sihmanhsehlaw Pathian nih a duhbikmi cu harnak kan tonmi chungin Jesuh Khrih he i ton hi asi i Amah nih a kan chanh hlan le zohkhen hlan ah Jesuh ngeita hna seh ti hi a duhbikmi asi. Amen!

Jesuh Khrih na chungah Thiang Thlarau in a um cang ahcun A Fekmi Himnak a sinak le Zohkhenhtu asi nak a tlinternak cu asi. Amen! Kan Pathian a min thangthat si ko seh. Jesuh Khrih na chungah a um ahcun na caah zei poah a tling dih tinak a si. Zei ruangah tiah cun zeizong vialte asertu le tthawnnak vialte kha na chungah a um cang tinak asi i nangmah nih tthawnnak he an umpitu Pa kha na zumhnak le naa hngakchan ngam ningin riantuan ai tim zungzal mi asi. Amen! A ngan in naa bochan ngam in naa hngatchan ngam le Pathian rianttuan tthawnnak a ngan deuh lai, bit deuh naa bochan in naa hngatchan ngam le bite in a tthawnnak a langhter ko lai. Amah belte nganpi bochan le hngatchan pei a ttha cu kan ti ko lai nain kan cungah nganpi in Pathian nih riantuan a duh taktak ahcun a kan khinhmi thilrit kan phur kho tawn lo i kan lung a dongh tawn caah nganpi rian a ttuan kho bal lo. 

Kan tonmi kip ah Jesuh he ton hi i timh bik cio ko hna usih. Jesuh he i ton taktak ahcun a zungzal in a fekmi kan himnak asi i zohkhenhtu asi zungzal ko. Amen! Jesuh he nan i tong ve taktak maw??? Nan i ton lo ahcun harnak in an chuah can lawngah lawmhnak na ngei lai i a caan a roah cun nangmah ning ah na kir tthan ko lai. Harnak caan ah Jesuh he naa ton ahcun harnak na tonmi kha na lung lawmhnak a tlintertu ah an cang lai. Amen! Harnak rak tong hlah ning law Jesuh he kan i tong hnga lo timi na ruah fate Bawipa nih khuakhanmi cungah naa lawm thiam cang lai. Amen! Harnak caan i Jesuh he ton cu zungzal nunnak he a tthawnnak kan hmuhnak, bochan ngamnak le hngatchan ngamnak kan ngeih chinnak hram asi kha an hngalhter lai i na tonmi kip kha Jesuh nih a tthawnnak a langhternak asi kha an hgalhter chin lai..... Bawipa nih sunparnak co ko seh...

NAHUM 1:7
Harnak caan ah amah aa bochanmi caah cun Bawipa cu a fekmi himnak a si; Amah nih ka chanh seh, ti a duhmi paoh cu a zohkhenh hna.