Minung vialte hi Pathian he Jesuh Khrih thawngin aipeh ding le hawikomhnak ngei ding in sermi le khamhmi kan si dih. Cucaah cun Pathian kan Pa le Bawipa Jesuh he hawikomhnak in Thiang Thlarau he umttinak cu zumlotu caah si loin zumtu ca, khamhnak a hmu cangmi caah asi.
- Mah chan ah hin Noah lawnglawng Pathian mit hmuh ah MITHA asi.
- Mah chan ah hin Noah lawnglawng PATHIAN LUNG A TONGMI asi.
- Mah chan ah hin Noah lawnglawng Pathian he HAWIKOMH in a nungmi asi.
- A tu kan chan ah hin teh Bawipa nih zei a kan ti ve hnga? Pathian nih MITTHA a timi, PATHIAN nih ka LUNG A KA TONGMI le Pathian nih KEIMAH HE HAWIKOMH IN A NUNGMI a kan ti ve hnga maw?
- Van le vawleipi hi hrawh sisehlaw hrawhmi chungah naa tel ve hnga maw?
- Nihin ah Pathian he hawikomh in na nung ko ahcun hrawhmi chung ahcun zeitik hmanh ah naa tel bal lai lo.
- Pathian he hawikomh ka ti tikah hin nangmah lawngin Baibal relnak, thlacamnak le thangtthatnak hi ka chim duhmi si loin Baibal na rel tikah Thiang Thlarau nih umpi, Thla na cam tikah nangmah lawng si loin Bawipa Jesuh he umtti, hawikomhnak ngeih, Thangthatnak hla in kan thangthat tikah lawmhnak le diriamhnak he Thiang Thlarau umpinak lumsatnak in thangtthat tti hi ka chim duhmi asi.
- Zumtu vialte nunnak ah abiapi cemmi cu Jesuh Khrih he umtti, hawikomhnak ngeihtti hi asi... an tthitu Pa he naa ton bal lo ahcun zeitindah Khamhmi ka si na timi cungah hin na ral a tthat khawh lai? Jesuh Khrih he nan i tong bal maw? Nan i ton bal lo ahcun zungzal nunnak kong ah hin na ral a ttha bal lai lo... Khamhnak a tlinnak cu Jesuh he tonnak, bia i ruahnak hi asi.
- Noah cu Pathian he hawikomh in a nung, nang le kei teh Pathian he hawikomhnak taktak kan ngei ve maw? Jesuh Na ton bal lo ahcun ton ding in thla rak cam. Na ton cang asi ahcun hawikomhnak tampi ngeih khawh rak izuam... A hohmanh nupi/va a ngeimi nih va le nupi kan ngeih cang caah umtti kan hau ti lo a timi nan um maw? Nupi le va kan i ngeih cu umtti dingah pei kan i umh hna cu.... Jesuh nih ham le tthit kan si tikah hin Amah he kan umtti, kan i hawikomhnak hnga caah a si zungzal... Amen!!!
———-
GENESIS 6:9-10
Noah tefa hna cu hihi an si: fapa pathum a ngeih hna, Shem, Ham le Jafeth an si. Noah cu miṭha a si i amah lawnglawng kha cu caan ah cun Pathian lung a tongmi a si; Pathian he i hawikomh in a nungmi a si.