Bread of Life

Righteousness = Pathian Dinnak 

Biatak timi cu biachimmi biataknak le tuahnak i fakpi alangmi khi biatak asi ve ko nain chunglei ah hmuhkhawhlomi biatak kha lenglei kan tuahnak in a hunglangmi tu khi asi deuh. Tuahnak in a hunglangmi ka ti tikah tuahnak paoh khi biatak an si ka ti duhnak siloin na chunglei ah aummi biatak kha tuahnak in na langhter tikah na chunglei ah aummi biatak he aikhat in na tuahmi khi biatak ka timi cu asi. Biatak le dawtnak hi hmuhkhawhlomi chunglei ah aithupmi veve an si i an kalning le an sining ailo ngai.

Minung vialte nih kan herhbikmi hi “Nunnak”, asi. Tulio i kan kawl, kan ṭuanmi tampi hna zong hi nun duh ah an rak si i Kan pum in dam kan duh lengmang mi zong hi nun kan duh caah asi. Thuk deuh in kan rak ruahlomi cu Nunnak maw abiapi deuh? Damnak dah abiapi deuh timi kong hi asi. Na dam ruangah na nun si loin na nun rih ruangah damnak na herh asi deuh. Damnak cu anungmi nih kan herhmi asi i athimi caah cun damnak aherhnak a um ti loh.

Fimnak kan ti lengmang mi hi zumlotu caah si loin Pathian fale kan caah asi deuh. Asinain nihin vawlei kan kalning zaoh ah zumlotu hi afim deuhmi le a hngalh deuhmi ko an lo. Ataktak le ngaingai ahcun zumlotu hmanh an fim le an thiam ahcun Pathian fanu le fapa hi cu kan fim chinchin awk le kan hngalh chinchin awk asi. Bawipa ṭih hi fimnak hramthoknak asi ati bantukin Bawipa a ṭihmi cu Pathian fanu le fapa kan si. Pathian ṭih timi hlan ah hin ahram aum i cucu Jesuh zumh le cohlan hi asi.

Tukforhnak hi Pathian Fa Asi rihlomi nih ton zungzalmi asi i Pathian Fa asi cangmi nih Bawipa he thlacamnak in hawikomhnak daithlannak in thlarau thazang der caan ah taksa duhnak ṭhaloin tukforh kan si tawn. Pathian Fa asi rihlomi cu khuachia ta an si caah khuachia nih atuahmi cu ṭhatlonak lawngte asi caah amah ta asimi zong ṭhatlonak, taksa duhnak, lungthin ṭhalomi phunphun, mah le mah thah duhnak, mi thahduhnak, firduhnak, nupa siduhnak, zu, kuak, khaini, hmawmmi le zukmi phunphun tuahduhnak in nifate an chungah aummi duhnak ṭhatlo ningin atukforh zungzal hna.

Jesuh Khrih Nih Thiang Thlarau A Kan Toih Hnu Zultu, Pathian Fale Cu Thih Tiangin Zumhtlakin An Rak Nung.. Biakamhlun Pathian Arak Dawmi Hna Cu An Tlu, Thih Tiang Zumh Atlakmi An Tlawm Timi Hi Hmuhkhawh asi Nain Biakamthar Jesuh Khrih Thihnak In Thawhṭhan Hnu Le Thiang Thlarau Toihmi Pathian Fale Hi An Nunnak Pek Tiangin Zumhawk An Rak Tlak Taktak Tihi Biatak Asi. Nangmah Le Keimah Zong Kan Chungah Pathian, Thiang Thlarau Aummi Thawngin Zumhtlak Kan Si Ve Ko Lai.

Sualnak kan tuahciami kan i ngaihchih tikah Bawipa nih kan ngaihthiam a ti tiang kan i ngaihchih awk asi... Sual ngaihchih hi kan tuahmi sualnak ruangah ṭah tiang lawng le sualnak kan tuahmi mertak tiang lawng silo in Bawipa nih na tuahmi sualnak kan ngaihthiam ati tiang kan i ngaihchih hrimhrim awk asi.. Minung dang cungah sualnak kan tuah tikah ka palh, ka ngaithiam law tiin ngaihthiam kan hal hna tikah ngaihthiam kan halmi hna nih kan in ngaihthiam an ti tik lawngah ngaihthiam taktak cu kan si.

Pathian umnak caah minung kut in sakmi Biakinn na upat le na ṭihzah tlukin Jesuh Khrih nih Amah umnak dingah sakmi na pum hi na ṭihzah in na upat awk le na dawt i na duhpaoh in na hman hrimhrim awk asi lo.

Minung tampi nih Jesuh Khrih hi Baibal kan relnak thawngin le Thawngṭha chimtu nih an chimmi thawngin a kong cu kan theih taktak ko nain a tak in Amah kan hngalh khawhnak ding cu Thiang Thlarau thawng lawnglawng in asi. Jesuh Khrih hrimhrim nih achimmi cu Thiang Thlarau nih Keimah kong kha an chimh hna lai tiah a kan cahtak. Thiang Thlarau lawng nih Jesuh Khrih hi fiang tein a kan hngalhter.. Thiang Thlarau na ngeihlo ahcun Jesuh Khrih na hngal taktak bal lai lo... Jesuh Khrih kong theih le Amah hngalh cu aa dang ngaingai..

DISCIPLES taktak cu Amah duhnak tlinter duh ah Jesuh zulmi si loin azulhmi Jesuh duhnak tlinter dingah azulhmi asi... Jesuh duhnak tlintertu dingah zultu na si ahcun zultu taktak tampi hringtu na si ko lai. Pale aṭhami nih fale aṭhami ahrin ve bang... Bawipa duhnak tlinter ka ti tikah Bawipa nawlngaih hi ka chim duhmi asi.

Vawlei cungah hin harsatnak le retheihnak, lungre theihnak, thluak buainak tonlo in tlamtlinnak taktak le thluachuahnak taktak hmuhkhawh asi hrimhrim lo timi hi biatak bak asi.

Minung vialte nih hin ruahchannak ngei in nung zungzal ding hi Bawipa nih a kan duhpiakmi asi. Ruahchannak angeitilomi paoh cu lungdonghnak in an caan an hmang tawn.. Ruahchannak tling taktak ngeihkhawh zungzalnak ding ahcun Bawipa nih an tinhpiakmi le an fialmi rian na hngalhnak hin asi zungzal lai.. Jesuh Khrih nih Kei ka rawl thawbikmi cu Pathian duhnak tuah le fialmi rianlim hi asi ati. Bawipa nih an fialmi rianlim le duhnak zulh lawng hi lawmhnak tling taktak le ruahhannak taktak cu asi.

Pathian ṭih hi fimnak hramthoknak, hngalhnak hramthoknak le fimnak asi timi cu Baibal nih fian tein a kan chimhmi asi.. Pathian aṭihzahmi hi cu Bawipa nih acawisan zungzal hna i upatmi le ṭihzahmi le bochanmi ah an i chuahdih ko timi cu Baibal chungin siseh nihin kan hmuh cuahmahmi in siseh hmuhkhawh le chim khawh asi ko. Pathian aṭihmi hi cu Pathian fa asimi lawng kan si i Pathian kan ṭihnak kan langhter ning cu aduhnak zulh le fialmi rian kan zulhnak in anawl kan ngaihnmi kan langhter ning hin asi...

Jesuh Khrih thihnak in athawh hnu, zultu sin i voithumnak ailangh ah Peter ahalmi bia asi. Jesuh Khrih na zumh hnu ah na sinah voikhat tal ailangh bal ve maw? Ailangh ahcun zei bia dah an chimh ve i zeidah an fial ve? Jesuh Khrih nih Peter bia ahal le rian afial hi athih hlan ah silo in thihnak in athawh ṭhan hnu ah asi. Biatak cu Jesuh Khrih na zumh taktak i thlacamnak he na hngah peng ko ahcun an ton ve hrimhrim ko lai..

Rawl ka ei tikah rian pakhat ka ngei ti bantukin rianlimnak men in rawl ka ei lengmang ahcun rawl thawtnak ka thlau khawh men… Bawipa nih rawlei hi rian bantukin a kan pekmi silo in thawtnak le lunglawmhnak he eiding ah pek kan si.. Chimduhmi cu Pathian fale asi cangmi zong nih Pathian lawmhter kan i timhnak ah hin kanmah hneknak le teimaknak, rianlimnak in kan zuanhnawh tikah Pathian nih a kan fial ciomi rian kan zuanhnawhnak ah hin thawtnak hmuhchih hna seh atimi vialte kan tlawlh dih..

Atu i ca tawite ka ṭialmi hi hringtu nulepa ca deuh ah asi.. Hringtu nulepa nih hin fale cu kan dawt dih cio ko hna ti cu biatak asi ko. Amah belte kan fale kan dawt ning hna cu kan hmuhkhawhmi an takpum le duhnak zulh hna hi asi deuh... Micheu nulepa cu fale an hngakchiat lio ah hin ihlo bakin kan pawm, kan puak hna i hngilhlo in caan saupi kan um.. Mah ca aṭialtu hi Bawipa zangfahnak thawngin Fapa pahnih le fanu pathum angeimi ka si ve caah fale zohkhenhnak ah tonmi tete cu ka ngei ve.