Bawipa nih a chimmi cu temhinnak mei chungah kan hneksak hna nain santlailo nan si, hneksak tlak nan si lo ee tiah a ti, cucu si ti hram hlah usih. Zumtu tampi nih kan ruahchih ve a haumi cu zumhnak in ruahchannak ah kan nunnak ah hin kan tak maw, taklo ti hngalhnak ah harnak le temhinnak in hneksak ve kan si tihi kan philh ve lo awk asi. Cu ve bangin kan cung i a tu lio a tlungmi harnak le kan tonmi cio hna zong hi Bawipa nih an kan hneksannak a si kho ko, cucaah a dongh tiang ingkholo si lion Bawipa zumhnak he tei khawh i zuam ko hna usih. Zumhnak in na tei hnu lawnglawng ah inkhawhnak na ngei lai... Biatak cu kan tonmi harnak le temhinnak vialte hi zumhnak in kan tei hmasa lawngah a dongh tiang inkhawhnak kan ngei lai i a dongh tiang inkhawhnak nih cun hneksak na simi cungah suisit na sinak na langhter ve lai. Bawipa nih zumhnak in teinak in pe hna seh law zumhnak in teinak na hmu hnu ah Bawipa nih an tinhpiakmi hmun le can na phak tiang inkhawhnak in pechin ko seh... Biatak cu harnak le temhinnak in hneksak na si tikah inkhawhnak na ngeih hnu ah zumhnak na ngeih le teitu nasi si loin zumhnak in na tei hnu tu ah inkhawhnak na ngeih asi deuh... Temhinnak in hneksaknak cu zumhnak in na tei tikah inkhawhnak na ngei i inkhawhnak na ngeihmi nih cun a dongh tiang baulo in inkhawhnak an pek lai i nunnak cu nangmah ta na si kha tehte an khan lai. A dongh tiang inkhawhnak na ngeih ruangah na nun si loin a dongh tiang inkhawhnak an petu Jesuh Khrih na chungah aum caah na nun tu asi. ISAIAH 48:10
Ngun cu somei chungah hneksak a si bangin temhinnak mei chungah khan kan hneksak hna. Asinain santlailo nan rak si.
Paul nih a kan cawnpiakmi cu zumhnak a nungmi na si le si lo hngalhnak cu hneksaknak nan innak ah khan nan tluk sual dah ti lo ahcun Jesuh Khrih nan chung a um kha a fiang ko tiah a ti. Jesuh Khrih na chungah a umnak nih hin heksaknak na inmi ah a dongh tiang inkhawhnak le teinak an pek lai, cucu a nungmi zumhnak timi cu asi i na zumhnak a nun caah na nung si loin na zumhmi Pa, Jesuh Khrih a nun ca tu ah na nun asi deuh. Sihmanhsehlaw minung tampi nih kan zumh kan ti cio ko nain zumhnak a nungmi, Jesuh Khrih kan chungah kan ngeih lo caah hneksaknak ah kan tlu lengmang i zumhnak thi timi kan si. Nang ahodah na si, zumhnak nun a ngeimi maw? Zumhnak a thimi dah na si? Zumhnak nung timi cu kan zumhmi Jesuh Khrih kan chung i a ummi hna khi zumhnak nung timi cu kan si. Zumhnak a thi timi hna cu an zummi Jesuh Khrih an chungah a um lomi hna khi zumhnak thi kan timi hna cu an si ve. Kan zumh, kan zumlo tinak tiang lawng hin si loin kan zumhnak thawng lawngin kan hmuh khawhmi nunnak, kan zumhmi Jesuh Khrih kan chung a umnak lawnglawng hin nunnak taktak cu kan ngei kan ti lengmang mi cu asi. Cu ve bangin mikip cungah hneksaknak a tlung cio ko lai nain a dongh tiang hneksaknak a ing khomi le teitu taktak cu Jesuh Khrih a chungah aummi hna lawng hi kan si ko lai. Amen! 2 KORIN 13:5
Nanmah le nanmah kha ṭha tein i hneksak tuah u: zumhnak nunning khan a nungmi nan si maw? I hneksak tuah u. Hneksaknak nan innak ah khan nan tluk sual dah ti lo ahcun, Khrih Jesuh cu kan chungah a um ti kha nan hngalh ko a si lo mei?
2 KORIN 13:6
Hneksaknak i kan rak tluk lo kha nan hngalh ko lai, tiah ka ruah.
Bawipa nih cawnpiak a kan duh tikah hin harnak caan chungah a kan luhpi tawn. Bawipa kut in kan cungah a phanmi harnak le hneksaknak asi ko ahcun cu harnak chungah cun kanmah nih kawl hau loin Bawipa hrimhrim kha kanmah cawnpiaktu le bawmtu ah a rak um ko lai. Harnak caan chung i cawnpiaknak nih hin phan hna seh ti a kan duhmi hmun phanhnak lawng hmanh si loin cu hmun kan phanh hnu ah zeitindah kan nun lai timi tampi hmuhsak le cawnpiak kan si. Amen! Mikip hi harnak chung kan luh tikah kan lung dongh hmangmi le pial hmangmi kan si zong kha Bawipa nih a kan philhlo caah keh le orh kan pial sual caan hmanh ah lam ding taktak cu mah lam hi asi i zul uh tiin Bawipa aw nem hrimhrim kha kan hnulei in kan theih lai. Amen! Bawipa ta ka si ko a ti ve ttung i a pial caan hmanh ah Bawipa aw nem nih na zulhmi lam hi a hmanlo a ti lo ahcun lakfa kan si caah asi sual hnga maw tihi ruah caan a phan cang.
Chim ka duhbikmi cu Bawipa hrimhrim nih hin Amah dawtnak thuk deuh na theihnak hnga le tthang seh ti an duhning in na tthannak hnga ding caah harnak mei chungah le harnak caan chungah luhpi in hneksak na si tawn lai, cu caan ah maw lung dong in um lai ci. Biatak cu na chungah na zumhmi Jesuh Khrih a um ko ahcun zeibantuk harnak le hneksaknak siseh hneksaknak phunkip si ko hmanh sehlaw a dongh tiang tlu loin na zumhmi Jesuh Khrih chungah fek tein an dirter khotu le inkhawhnak an petu cu Amah Jesuh Khrih hrimhrim asi lai. Amen! Amah belte a karlak ah na inkhawh lengmang lo i na tluk lengmang tu ahcun na chungah Jesuh Khrih a um lo ca tu ah asi ko lai. Na chungah Jesuh Khrih a um lo cu na zumh ve ko nain na zumhnak hi Bawipa sin a phanlomi zumhnak, a thimi zumhnak, khamhnak tiang a phanlomi zumhnak asi caah asi. Harnak in maw? a dangdang in hneksak na si tikah mi thluachuak ah i rel ko law Bawipa nih a ka pekmi asi tiin zumhnak in tei ko, zumhnak in na teinak nih inkhawhnak an pek lai i a dongh tiangin inkhawhnak le an hmunter khotu taktak cu na zumhnak thawngin na chungah a nungmi Jesuh Khrih hrimhrim asi ko lai. Amen! Jesuh Khrih cu na chungah a um ko ahcun zeibantuk harnak le hneksaknak hmanh nih an tei bal lai lo, aruang cu kan Bawipa Jesuh Khrih caah a si kholomi a um lo caah asi. Amen! Jesuh Khrih cu Nunnak asi, Teitu asi, Teinak petu asi, Inkhawhnak petu asi, Zumhnak le Zumh khawhnak petu asi i zeizong vialte kan herh ningin le kan duhning in petu asi. Amen! Bawipa min thangthat si ko seh...
—-
ISAIAH 30:20
Bawipa nih harnak caan chungah an luhter hna lai, sihmanhsehlaw khi chungah khan nanmah cawnpiak awkah amah hrimhrim kha a rak um lai i nanmah nih amah kha kawl a herh ti lai lo.
ISAIAH 30:21
Lam in kehlei orhlei ah nan pial sual ahcun, "Lam cu hika leiah hin a si. Lam kha zul u," tiah nan hnulei in a aw kha nan theih lai.