Hmunzakip ah ai tthenmi ka miphun vialte sinah Pathian bia, biatak le nunnak hram asimi Khrih Thawngtha ka rak in hrawmh tthan hna. Biatak tein na rel i na zumh ve ko ahcun luatnak na hmu taktak ko lai. Thawngtha kan ttialmi hi a reltu na caah cun sullam a ngei hrim lai i luatnak tling cu na hmu hrim lai tiah Bawipa Jesuh ka zumh i kaa bochan ko. Biatak cu sualnak kan tuahlo ruangah le kan tthat ruangah khamh kan co si loin khamhnak kan hmuh cang ruang tu ah hin sualnak kan tuah ti lo le thatnak kan tuah khawh arak si deuh. Chimchih ka duhmi cu vawlei cungah hin zumlotu tampi zong nih thil ttha tampi an tuah taktak ve ko. Sihmanhsehlaw Jesuh Khrih zumhnak tello in thilttha tuahmi vialte hi Bawipa nih a lawmhmi pakhat hmanh aum hrimhrim lo. Cu lawng hmanh si loin Jesuh Khrih zumhnak tello in kan i zuamnak in thilttha kan tuahmi vialte cu pawrhlawtnak le ruamkainak men ah an cang i caansau zong a nguh hrimhrim lo. Zeizong vialte kan tuahmi hna hi zumhnak thawng lawngin an si zungzal awk asi tihi Cathiang nih a kan cawnpiakmi asi. Nawlchih lengmang kan duhmi cu Jesuh Khrih nih vailam cungah a kan limpiak cangmi le a kan champiak cangmi kan zumhnak thawng hin khamhnak kan hmu kan timi le Pathian zangfahnak kan hmu kan ti lengmangmi cu 100% asi.
Pathian zangfahnak kan hmuh cu kan tuahmi ruangah si loin kan zumhnak thawngin asi caah ngeihthiam kan si cang ti kan i hngalh hnu tu ah sual phuannak le sual mertaknak hi Bawipa cohlanmi le biatak asimi Thawngtha cu asi. Azungzal in Thawngtha asimi Jesuh Khrih kong chim fial kan si cu kanmah tuahmi ruangah si loin Amah hrimhrim nih athisen in atuah cangmi le a kan limpiak cangmi kan zumhnak ruangah ngaihthiam le khamh kan si tihi asi. Ngaihthiam le khamh kan si hnu tu ah hin sual phuannak le mertaknak nih a van zulh ve... Sual phuan hnu le sualnak mertak hnu lawngah ngaihthiam le zangfah kan si ahcun kan mah nih sual kan mertak khawhnak le sual kan phuan khawhnak thawngin Khamhnak kan co asi hnga. Cucu asi hrimhrim lo, kan tuahmi ruangah si hrim loin Pathian Fapa nih a kan tuahpiak cangmi kan zumhnak thawng lawnglawngin Khamh le zangfah kan rak si taktak. Sihmanhsehlaw zumtu vialte nih Khamhnak kan co hnu ah kan sual phuan ding le mertak ve ding cu Cathiang nih a kan cawnpiak lengmang mi asi. Hi sual phuannak le mertaknak kong ah hin Khamhnak a co ciami caah cun sualnak kan tuah sual ahcun ngaihchih ding le mertak tthan cawlh ding hi Baibal nih a kan cawnpiakmi asi i Khamh a co rih lomi ca tu ahcun Jesuh Khrih kan zumh hi ka sualnak vialte a ka thianhpiaktu asi tiah kan zumh hrimhrim a herh. Cuticun zumhnak in Khamhnak le zangfahnak kan co hnu tu ah palhnak phuan le Sualnak mertaknak nih cun a van zulh ve hnga.
Cathiang nih a kan cawnpiakmi cu palhnak a thupmi na si peng rih ko ahcun khuaawng na tong bal lai lo tihi asi. Sihmanhsehlaw palhnak thup ti loin na phuan i na hlawt ahcun zangfahnak na hmuh hrimhrim lai i khuaawng na tong cang lai tiah ati. Biatak cu kan sualnak kan phuan hlan le kan sualnak kan mertak hlan ah kan theih le kan hngalh a herhmi cu na sualnak vialte ngaihthiam dih na si cang timi Thawngtha hi asi i cu Thawngtha cu kan theih hnu ah kan zumh bak a herhmi cu kan sualnak vialte pakhat hmanh tang ti loin hnawtpiak le ngaihthiam cikcek kan si cang timi hi asi. Vailam cungah a ho kan si ruangah si loin Pathian nih a kan dawt hrimhrim ruangah minung vialte caah Fapa Jesuh Khrih thisen in sual leiba a kan champiak dih cang i ahlei in a zummi kan caah zungzal nunnak le luatnak asi khun. Cathiang nih a kan fial bantukin kan sualnak phuan ding le mertak kan timh tikah kan zumhnak thawngin kan hmuhmi Khamhnak ruangah si zungzal ko seh. Zumhnak thawngin Cathiang nih a kan cawnpiakmi hi nunpi cang hna usih law phuan awk kan ngeihmi sualnak vialte hi pakhat hmanh tanglo in Bawipa hmai le na neih bikmi minung hawi hmaiah phuang dih in hlaw dih cang hna usih... Biatak, Biatak, Biatak cu sual kan phuan ruangah ngaihthiam le zangfahnak kan hmuh arak si loh, sual kan mertak ruang zongah ngaihthiam le zangfah kan rak si, asi hlei fawn loh. Ngaihthiam kan sinak le zangfah kan si taktaknak cu vailam cungin Jesuh Khrih thisen aluannak thawng le vawlei sualnak le keimah sualnak kalpitu Jesuh Khrih thawngin asi. Amen. Mi zei hmanh thleidan a um lo, a sual, athiang ti zong a um loh, Pathian Fapa Jesuh Khrih hi minung vialte sualnak le keimah sualnak a kalpi dih cang ti na zumh ko ahcun na caah zangfahnak a um zungzal ko lai. Sual kan phuan le suarnak kan mertak cu kan zumhnak thawngin ngaihthiamnak le zangfahnak kan hmuh cang tinak a langhtertu tehte an rak si deuh. Amen.
- Palhnak a thup pengmi na si rih ko maw? Khuaawng na tong bal lai lo.. Khuaawng na ton lonak cu sualnak le palhnak na tuahmi na thuh peng rih caah asi. Khamhnak a co cangmi nih cun palhnak hi kan thup peng lo.
- Palhnak a phuang ttung i a hlawlomi na si sual maw? Khuaawng na tong rih bal lai lo.. Khamhnak a co cangmi nih cun palhnak kan thup peng ti loin atak zongin sualnak le palhnak cu kan hlawt hna.
- Palhnak hi phuannak tiang lawng si loin hlawtnak tiang tu he zangfahnak a hmu ding kan si... Biakamh kan simi cu na sualnak hi na phuan i na hlawt ko ahcun zangfahnak na hmu hrimhrim lai timi hi biakamh kan simi cu asi.. Biatak cu sualnak na phuan le na hlawt hlan hrimhrim ah Jesuh Khrih thawngin Pathian nih an ngaihthiam i an zangfah cang. Na zumhnak thawngin zangfahnak na hmuh hnu tu ah palhnak phuan le hlawt hi kan thiam a rak si deuh... Sualnak na phuan ko ttung i na mertak hlei lo ahcun Khamhnak na co rih lo ca tu ah arak si ko.
- Pathian fa taktak na si cang maw? Nangmah te nih nai hngalh lai.. Naa hngalh lo ahcun na si rih lo caah asi ko lai. Nain na tlailo, zumhnak taktak he Bawipa Jesuh Khrih rak panh in rak cohlang cang.
- Minung vialte hi kan sual dih cio ko nain Bawipa Jesuh Khrih nih kan sining in a kan cohlan dih cio. Amah belte sualnak phuanlo le thuhmi ngeih rih, sualnak hlawt loin fuhpanhnak cu a cohlang lo. Mah ruangah nihin zumtu kanmah ning peng kan sinak hi asi. Sihmanhsehlaw sual phuanlonak le sual mertak lonak a sullam cu Khamhnak kan hmuh taktak rih lo caah asi i Pathian Zangfahnak in Khamhnak a hmu cangmi hna nih cun sual phuan le sual mertak cu kan i thim hmasa zungzal mi damnak phunkhat asi.
- Zumhnak in Khamhnak na hmuh hnu ah na sualnak cu na thuh ti lo, Bawipa sinah na phuan ko i na hlawt ko ahcun zangfahnak cu na hmu hrimhrim lai i thluachuahnak nih a van zulh ve lai.
- Nan sualnak kha ngaihthiam nan si nakhnga nan sualnak kha mertak hna uh tihi Peter nih Judah mi hna a cawnpiakmi hna cu asi. Biatak cu Sualnak mertaknak tello cun ngaihthiamnak a um kho ve lo i Ngaihthiamnak tling tein co ve ttung lo ahcun sualnak mertak khawhnak lam a um ve lo. Ka chim duhmi cu Sualnak mertak khawhnak taktak le Ngaihthiamnak tling hmuhnak taktak zong hi Jesuh Khrih thihnak le thawhtthannak kan zumhnak thawng lawngin kan hmuh khawhmi an si tihi asi.
- Jesuh Khrih kan zumhnak thawngin ngaihthiam kan si i Ngaihthiam kan si hnu tu ah sualnak mertak khawhnak tling kan hmuh, cucu Khamhnak kan hmuh kan timi cu asi. Khamhnak kan hmu cang ti asullam cu Pathian Fa kan si cang tinak asi i Pathian Fa kan si hngalhnak ah Pathian laksawng Thiang Thlarau kan hmu.
- Ngaihthiamnak le zangfahnak in Khamhnak, Khamhnak in zungzal Nunnak kan hmuhnak taktak cu kan sual kan phuan ruangah le kan sualnak kan mertaknak ruangah si hrim loin Fapa Jesuh nih vailam cungah kan sualnak leiba vialte a kan champiak dih cangmi kan zumhnak thawngin asi. Cucu Fapa Jesuh nih a kan tuahpiakmi a zummi caah cun ruahchannak a um zungzal i zangfahnak le ngaihthiamnak cu zeitik hmanh ah innkaa ai khar bal lo... Zangfahnak le ngaihthiamnak in Khamhnak le Nunnak kan hmuhmi cu Fapa Jesuh Khrih Thihnak le thawhtthannak thawng lawngalwng in asi. Amen.
- Sualnak kan phuan i kan hlawt ruangah zangfahnak kan hmuh si loin Pathian Fapa Jesuh Khrih kan zumhnak thawng tuin arak si diam. Sihmanhsehlaw Fapa a zummi paoh nih cun sualnak cu a phuan ve lai i a hlawt ve hrimhrim lai tihi Cathiang nih a kan cawnpiakmi cu asi... Sualnak na phuan lo i na hlawt ve rih lo ahcun Pathian zangfahnak na hmuh rih lo caah asi. Pathian zangfahnak na hmuh cang ruang tu ah hin sualnak na phuan le na mertak a rak si deuh.... Pathian Zangfahnak in Khamhnak a hmu cangmi hna nih cun sual phuan le sual mertak cu kan i thim hmasa zungzal mi damnak phunkhat le kan rawltha phunkhat an si....
PHUNGTHLUKBIA 28:13
A palhnak kha a thupmi cu khua-awng a tong lai lo, sihmanhsehlaw a phuang i a hlawmi nih cun zaangfahnak a hmuh lai.
LAMKALTU 2:38
Peter nih annih cu a thawh hna i, “Nan dihlak in, pakhat hmanh bau loin, nan sualnak khan i mer tuah u, nan sualnak kha, ngaihthiam nan si nakhnga nan sualnak khan i mer u law Jesuh Khrih min in tipilnak ing tuah u; cun Pathian laksawng Thiang Thlarau kha nan hmuh lai.