Nunnak petu thawngtha in Pathian bia ka rak in hrawmh tthan hna. Reltu nan dihlak cungah Bawipa nih athar in Thlarau damnak in pe hna sehlaw taksa damnak le thinlung damnak in lawmhnak zong in chapchih ko hna seh. Amen.
Khrih lamkaltu Johan hmang in Efisa khuami Khrihfabu hna sinah ralrinnak ca arak kuatmi hna cu Keimah ruangah harnak tampi nan ing nain nan lung adong lo sihmanhsehlaw ka lung nan tlin lonak aum: cucu ahlan i nan ka dawt bantuk (hrintthannak nan hmuh kaa bantuk) in nan ka daw lo tiah ralrinnak le theihternak ca a kuat hna. Hi Baibal nih a kan fial ve mi le a kan theihter ve mi cu kan hrintthan kaa le Khamhnak kan hmuhkaa bantuk in Pathian hi kan sining dihlak in kan daw kho peng ve maw? ti hi asi. Pathian nih a kan duhpiakmi cu azungzal in Amah lawnglawng hi zumh le thangtthat aduhmi le dawt peng aduhmi asi. Amen! Pathian dawt kan ti lengmang mi hi kan mah nih kan dawt ruangah si loin Amah nih a Fapa Khrih hmang in a kan dawtnak alanghter hnu ah kan nih zong nih kan van dawt khawh ve nak le dawt kan van thiam ve nak cu asi. Amen! Siah cun Nihin ah i ruahtti hna sih ti ka duhmi cu zeitluk in dah Pathian kan dawt i a duhnak le a nawlbia hi kan zulh timi hi asi. Pathian hi kan duh, kan dawt taktak asiah cun a nawlbia kan zulh peng awk le Khrih nunzia hi kan i hruk awk le kan i cawn zungzal awk asi. Amen!
Ataktak le ngaingai kan tiah cun Khrih he kan i pehtlaihnak thawng hin zumhnak in kan tthangchin lengmang ding le Thiang Thlarau riantuannak hi tampi kan ngeih chin lengmang ding khi asi. Pathian nih a kan kawh tikah hin thluachuah zong tampi pek a kan duh ve ko nain a kan duhpiak ning le tinhpiak ning in hmai ah kal loin hnu lei ah kan kir tawn caah hin a thluachuah hi a kan tinhpiak ning in kan hmu hrimhrim lo. Sawm kan duhmi hna cu kan zumhnak hi tthangchin lengmang hna usihlaw zumhnak kar kan hlaannak ah hin kan hmuh khawhmi thil ah si loin kan hmuh khawh lomi zungzal nunnak caah zumhnak hram kan bunh bantuk hin zei thil poah hi zumhnak in hrambunh chin lengmang ko hna usih. Amen! Bawipa min thangtthat si ko seh!
BIATHLAM 2:3
Na lung a sau, keimah ruangah harnak na in i na lung a dong lo.
BIATHLAM 2:4
Sihmanhsehlaw ka lung na si lonak a um: cucu hmasa i na rak ka dawt bantuk khan na ka daw ti lo.
BIATHLAM 2:7
"Hna nan ngeih ahcun, Thlarau nih Khrihfabu hna sinah a chimmi bia cu ngai ko u! Teitu a simi cu, Pathian Dum chung i a ummi nunnak thingkung theitlai einak nawl kha ka pek hna lai," a ti.
Cu ti cun zumhnak hrambunh in Pathain kan thangtthat i a nawl zulhnak le aduhnak tuah kha kan i hmaithlak ah cun teitu lakah teitu bik kan si lai i Pathian dum chung i aummi nunnak thingkung theitlai einak nawl kha pek kan si ve ko lai. Amen! Teinak ahmumi poahpoah hi inkhawhnak angeimi an si, cu ve bangin inkhawhnak taktak le lungsaunak angeimi cu Thiang Thlarau in a khatmi lawnglawng an si ve. Amen! Thiang Thlarau in akhat ve mi cu Pathian aduhnak atuah pengmi le Pathian nawl azul i adawmi le Baibal rel pengmi, thlacam nun ngeimi, Bawipa he hawikomh nun a ngei peng mi lawnglawng hi an si. Amen! Pathian kan dawt i a nawl kan zulh le aduhnak kan tuah hi kan mah le kanmah kan i dawt taktak le thluachuah kan iham hi asi ko. Amen! Pathian dawtnak le duhnak tuah in a nawl zulh hi zungzal nunnak le Thiang Thlarau bawmtu hmuhnak le damnak, lawmhnak, daihnak hmuhnak hrampi asi. Amen. Bawipa nih sunparnak co ko seh! Cucaah cun kan hrintthan kaa i Pathian kan duh kan dawt hnak tam chin lengmang in daw ko hna usihlaw unau rual taktak bang kutsih in arian thiang tuantti cang hna usih tiah Khrih thisen in tlanh ve mi nan unau nih kan sawm hna.