Bread of Life

Hmunzakip ah aummi ka miphun vialte hna Bawipa kawlduhnak hi nan thinlung chungah Thiang Thlarau nih inkhahter cio hram ko hna seh. Kawl zungzal cem dingmi hi zeidang si loin Bawipa kan hmuh i kan i hawikomh zungzal tiang hi kan kawlcem ding arak si. Nangteh an khamhtu na Bawipa hi na tong bal maw? Na hmu bal maw? Hawikomhnak nan ngei bal maw? Biatak cu Bawipa Jesuh Khrih he nai Na ton ve taktak tik lawngah na hngalh dih te lai, a tu lioah ka theih in ka fian ko i ka hngalh ko tiah na ruahmi hi na hngalh taktak mi le na pemh cangmi si loin fiannak tiang lawng na phanhmi an si kho men.

Minung tampi nih fimnak a ngeimi kan timi hna hi cawnnak sang a ngeimi le cathiammi an si kan ti dih cio lai dah. Nu hrinnak zong in a fim kan timi hna tampi an um ve ko lai nain Baibal nih fimnak le hngalhthiamnak a ngeimi a ti hna lo. Cun minung kan ruahnak ahcun fimnak hmanh a ngeilomi nih cun hngalhthiamnak an ngei lai ti zumh cu a fawilo chinchin... Cawnnak le thiamnak zeihmanh ngei hmanh hlahlaw Pathian attihmi le tthatlonak ahrialmi na si ko ahcun thluachuah nganbik na ngei..

Bawipa Jesuh Khrih zumhnak thawngin Pathian fa taktak ah a cangmi unau na sinah biahal ding pakhat te kan ngeihmi aum. Mah bia hi a tang i Baibal ka rel fate keimah le keimah ka hal lengmang mi asi: Nai te taktak lawngah Thiang Thlarau bawmhnak thawngin ka nunnak ah fiannak ngaingai ka ngeihmi aum. Kan halmi hi nangmah le nangmah na leh hnu ah keimah nih kaa fianmi le kaa nunpi mi hi rak rel ve law na thinlung ah hmunhma alak ahcun rak i nunpi ve tiah kan sawm. Biatak cu nifa tein na vailam put in Bawipa Jesuh Khrih zulh ve ding hi zumtu na si bak in ai awt cangmi na rak si awk asi.

Na fale na vuak tawn hna le fak deuh in na chimh hrin tawn hna kha na mit thlam a cuang ve maw? Fale hi zeitindah kan chimh hrin cio hna hi fak deuh in kan ruah a hau cang. Kan lung an kan ton lo tik le kan thin an kan hanter tikah diriam tuk in kan fale kan chim hrin hna in fak tuk in kan vua sua hna maw? Mah hmanthlak na zohnak nih hin na thinlung ah bia tampi a chim lai i tampi an cawnpiak lai tiah zumhnak ka ngei. Kan fale hi kan duhtuk ko hna i kan dawttuk ko hna nain kan ing a puang cio cang ahcun duh tawk tein vuak hmangmi kan si hi a poi ngai tawn tiah ka ruah.

Nihin Khrihfa ai timi kan miphun tampi nih kan uar ngaimi le kan chim ngaimi cu a lamkip in tthang usih ti hi asi. Mah Baibal hi khamhnak aco rihlomi caah si loin Khamhnak ahmu cangmi hna kan caah asi. Khamhnak na co ve rihlo asi ahcun Khamhnak tling na co taktak nak hnga, Khamhnak tling an pe khotu Bawipa Jesuh hi na zumhnak an cohlang ve tiang na lungthin taktak in rak zum ko. Lungthin taktak azummi caah cun Khamhnak tling kan pek cang ti kan i hngalhnak dingah Thiang Thlarau toih kan si. Amen.

Kan Pathian nih cun kan hmailei kong hi a kan theih dih hirhiar ko. Israel mi cu a kamhmi hna ram an phak tikah an tlamtling i Bawipa philh in ram dang pathian an biak laimi a hmuhcia mi nih a lung a fahter ngaingai. Cu bangin nupi kan tthit dingmi nu le va kan ngeih lai dingmi pa nih hin pa dang a kan duh tak ding le nu dang a kan duh tak te ding hi hngal cia cio usihlaw kan tthi in kan va hrim hna hnga lo, nain Bawipa nih cun a thimmi le a dawtmi a fale kan cung tu ahcun a cung i zumhtlak kan si lai lo hi hngalh ko buin thluachuah pek le thiamcoh kan si zungzal.

Nikhat cu Baibal ka rel i a tang i ka van langhtermi Baibal hin Pathian nih a ka chawnh bak tiah ka zumh i ka nun ah um kholo in mah Pathian bia hi ka rak ttial. Rak rel ve law na Pathian nih zei an tinak kong hi van ka hrawmh ve tuah. Ka Pathian, mah na bia nih hin ka nun ah tthawnnak nganpi a ka pek i ruahchannak thar a ka pek tthan. Zeitlukin dah na ka dawt kha a ka hmuhter chin i na rak ka thim cianak na chim tthanmi bia nih hin voi tampi lawmhnak le ruahchannak in raltthatnak an ka phurh tthan. Ka Pa, Bawipa ka Pathian nih a ka timi cu hitihin asi:

Naomi le Ruth tuanbia in ka nunnak ah biatak tein thazang ka laknak ka rak in hrawmh ve. Fakpiin ka ruahpi ve law na nunnak ah hmunhma rak ka chiahpiak ve ti kan duh. Naomi cu Moap ram ah kumhra a um hnu ah Judah ram ah kir dingin timhtuahnak angei. Athi cangmi a fapale, nupi pahnih cu ka ramah ka kir tthan cang lai i nan inn teah va kir cang u, keimah cungah le mithi hna cungah nan tuah bantukin Pathian nih nan cungah zangfahnak tuah ve ko seh tiah ati hna. Ruth nih achimmi bia nihi hin ka thinlung ah fak tukin bia achim.

Bawipa lawmhter na duh ahcun mah hna hi zumhnak he rak tuah hna law rak i nunpi ve hna:
 

Nihin Khrihfa ai timi tampi hi lungthlennak um lo bakin Khrihfa ka si aitimi le ka Hrinthan a timi tampi kan um. Lungthlennak um loin cun Thawntha chimtu caah siseh ngaitu caah siseh kan au lengmang mi le caan kan pek lengmangmi hi sullam a ngeih hnga hme maw? Paul nih Rome khuami hna sinah ca kuat a ttialmi cu Thawngtha asimi Jesuh Khrih kong ka chimnak ah Jentailmi hna sinah lungthlennak a um bantukin Rome khua zongah lungthlenmi umter ve cu ka duh hringhran tiah ati.

Zumtu paoh nih cun a kan sertu hi Pathian asi tiah kan zumh dih cio. Minung lawng hmanh si loin hmuh khawhmi si hna seh hmuh khawhlomi si hna seh Pathian sermi an si dih ko tihi kan zumh ciomi asi i ataktak in a kan sertu hna hi Pathian kan Pa,Fapa Jesuh Khrih le Bawmtu Thiang Thlarau hna an si. Atu i ka ttialmi hna hi catlak cung ttialmi in le Thawngtha chimtu nih chimnak tiang lawngin na kawl ahcun tampi naa harh ko hna lai. Biatak cu Pathian, Jesuh Khrih le Thiang Thlarau he nai ton ve hnu lawngah a tu i ka ttialmi hi atak in na zumh khawh ve hna lai.

Hmunzakip ah aummi ka miphun sinah a tu lio i ka nunnak ah a um tukmi le kan sining taktak asimi kong Thawngtha ka rak ttial. Reltu vialte nan cungah mah le mah kan i dawt bantukin midang dawtnak, kan miphun dawtnak, atlaumi dawtnak tiang Bawipa nih nan thinlung cungah chia hram ko seh. Dawtnak taktak hi minung nih kan ngeihmi nih a phakmi si loin Thiang Thlarau sin lawnglawng in kan hmuh khawhmi asi i Thiang Thlarau bawmhnak lawngin kan hman khawh tthiamtthiammi asi. Khua ka ruah lengmang mi cu kan miphun dihlak nih Pathian kan duhning le Pathian kan biak ning hi asi.

Hmunzakip ah aithekmi ka miphun, unau vialte hna Bawipa nih nan umnak cio ah a dawtnak thukchin in inhngalhter ko hna seh. Ka hngakchiat tein Jesuh Khrih hi Pathian fapa, vailam cungah ka sualnak vialte a thihpitu asi i thawhtthannak he nunnak a ka serpiaktu asi tihi ka rak zumh lengmang ve ko nain Khamhnak tling taktak ka hmuh, Thiang Thlarau ka chungah a um ka hngalh cu Pathian ka Pa nih a ka chimh ningin kum (27) na si ah Khamhnak na hmu ti ka si. Amen. Nangteh na biak lengmangmi Pathian nih zeitik ah dah na hrintthan an ti ve? An chim ve cang maw?

Bawipa Jesuh nih a kan fialmi cu Keimah nih kan dawt hna bantukin pakhat le pakhat i daw uh tihi asi. Nihin zumtu vialte nih kan i dawt awk asi timi cu kan chim cio ko nain kan i daw taktak ne maw tihi ruah caan aza cang. Kan i dawt cionak hi kan kaa lawng le kan tuahnak lawng cun a ngah lai lo. Caan tampi ahcun kan kaa hin biadawh le biattha kan chim, tuah awk zong kan tuahpiak ko hna hnga nain kan thinlung cun kan rak rem ziar tawn hna loh.  Cun minung vialte hmuh ah thilttha tampi a tuah bantuk cun kan tuah taktak ko nain kan thinlung hmutu cu Bawipa tthiamtthiam asi ko.

Hmunzakip ai tthenmi zumtu vialte hna Bawipa nih Amah duhnak zulh nan duhnak kha in hngalh piak hna sehlaw nan duhnak kha tlinter ko seh. Nan duhnak kha tlinter ko seh ka timi cu nanmah taksa duhnak, thinlung duhnak le thlarau duhnak khi chim duhmi si loin Pathian duhnak zulh nan duhmi, duhnak tu kha tlinter ko seh ti khi ka chim duhmi asi. Amen. Zumlotu si loin zumtu nih hin zeitindah Pathian duh ning in kan thinlung kan khahter cio lai tihi ruahlo awk a tthalomi asi. Minung tampi cu kan thinlung put hi zumlotu he kan i tluk lengmang.

Mizei hmanh Pathian riantuan kan duh ahcun kanmah duh ruangah si loin midang nih a kan fial ruang zongah si loin Pathian fialnak le kawh auhnak in Pathian rian hi kan rak ttuan awk te arak si. Genesis in Biathlam tiang kan rel tikah Pathian riantuantu vialte hna hi Pathian kawh auhnak (Calling) lawng tein a rian an rak ttuan hna. Nihin zumtu vialte hna hi teh zeitindah Pathian riantuan kan i timh ning le kan ttuan ning cio asi hnga? Pathian nih Amah riantuantu dingah kawh auhmi na si ko ahcun phang hlah, khuaruahhar in Amah tthawnnak bak he an hruai hrimhrim lai.